Засгийн газрын ээлжит хуралдаан хуралдаж, 35 асуудлыг хэлэлцэж, шийдвэрлэсэн. Энэ үеэр ЗГХЭГ-ын дарга Д.Амарбаясгалан “Монгол Улсын баялагийн сангийн хуулийн талаар УИХ-ын шийдвэр гарч, Засгийн газарт боловсруулж, танилцуулах үүрэг хүлээснийхээ дагуу “Эрдэнэс Монгол” ХХК-ийн захирал С.Наранцогтоор ахлуулсан Ажлын хэсэг ажилласан. Мөн намууд хоорондоо Баялагийн сангийн тухай ойлголцож, санамж бичигт гарын үсэг зурж, хаврын чуулганд өргөн барьж батлуулах шийдвэр гарсан. Намуудаас гарсан Ажлын хэсэг хуралдаж шийдвэрээ танилцуулсан. Баялагийн сан нь гурван сантай байхаар зохицуулагдсан. Нэгдүгээрт, Ирээдүйн өв сан буюу хууль эрх зүйгээр зохицуулагдаж байгаа нөөц ашигласны орлогоос 65 хувиар санхүүжиж хуримтлал үүсгэх сан. 2030 он хүртэл хуримтлал үүсгэх тус сан нь 2031 оноос хуримтлалаараа хөрөнгө оруулалт хийх томоохон бодлогыг хэрэгжүүлэх зорилготой. Хоёрдугаарт, Хуримтлалын нэгдсэн сан байгуулна. Тус сангаар иргэн бүр өөрийн нэрийн данстай байх хуулийн зохицуулалтаар хангагдана. Хуримтлалын нэгдсэн сан дээр төвлөрсөн хөрөнгийг иргэн бүр бэлэн бус аргаар зарцуулах боломжтой болох юм. Тухайлбал, орон сууцны хөтөлбөр хэрэгжүүлэх, боловсрол, эрүүл мэндийн чиглэлээр захиран зарцуулах хязгаарлагдмал сан. Гуравдугаарт, Хөгжлийн сан байгуулсан. Бүс нутгийн хөгжлийг дэмжих зорилгоор Хөгжлийн санг нээсэн. Аймаг, сумын асуудлыг хэлэлцэхээс илүүтэйгээр бүс нутгийн хөгжлийг Монгол Улсын урт хугацааны бодлоготой уялдуулж, захиран зарцуулна. 2023 оны Монгол Улсын татварын орлогын эх үүсвэрийг авч үзсэн. Төрийн өмчид хувьцаат компаниудын ашгийн 25 хувийг хуримтлалын санд төвлөрүүлнэ” гэв.