-Бид цаашид хотхон, хорооллуудыг заавал улсын сургууль, цэцэрлэгтэй нь хүлээж авдаг болох ёстой-

         Баянгол дүүргээс сонгогдсон УИХ-ын гишүүн Х.Ганхуяг “1,7 сая хүн амьдарч байгаа нийслэл хотод түгжрэл, утаа, сургууль цэцэрлэгийн хүртээмж, нийтийн тээврийн хүрэлцээ гээд тоочоод баршгүй түмэн зовлон бий. Нийтийн тээврийн хүртээмж хангалтгүй байж иргэдээ унах унаа, зорчих таксигаар нь хааж, хөдөлгөөн сийрүүлнэ гэдэг бол арга ядсан зохицуулалт. Асуудлыг том зургаар нь бид харах ёстой” гэж хэллээ.

БАЯНГОЛ ДҮҮРГИЙН 10 ХОРООНД СУРГУУЛИЙН АСУУДЛЫГ ШИЙДСЭН НЬ 100 ГАРУЙ МЯНГАН ИРГЭНИЙ АЖИЛ, АМЬДРАЛТАЙ ШУУД ХОЛБООТОЙ

        Мөн тэрбээр үргэлжлүүлэн “Намайг 2020 онд анх гишүүн болоход Баянгол дүүргийн 34 хорооны 11-д нь улсын сургууль байгаагүй. Тэр бүүхэл 13 хороо нь цэцэрлэггүй байсан. Өнөөдрийн байдлаар бүх хороон 100 хувь цэцэрлэгтэй болсон. Мөн 10 хороонд шинээр сургуулийн асуудлыг шийдээд байна. Баянгол дүүргийн нэг хороо дунджаар 10 мянган оршин суугчтай гэж бодоход 10 хороо гэвэл 100 гаруй мянган иргэний асуудал шийдэгдсэн гэсэн үг шүү. Иргэд хүүхдээ -40 хэмийн хүйтэнд хөтлөөд 40-50 минут автобус хүлээж зогсох хэцүү. Тиймээс зээлээр ч болсон машин аваад л өнөөх түгжрэлдээ орно. Түгжрэл бууруулахад том нөлөө үзүүлэх зүйл бол хороо бүр сургууль, цэцэрлэгтэй байх.  Сургууль барих төсвийг суулгах нь асуудал биш. Газар чөлөөлнө гэдэг бол том асуудал юм байна. Улаанбаатар хотод барилгын компаниуд ноёрхож, даам гарсан гэж хэлж болно. Учир нь, орон сууцны захиалга авахдаа сүртэй гоё зураг төсөл, сургууль цэцэрлэгтэй гэчихээд ашиглалтад ороход аль алийг нь шийдээгүй, захиалагч нар аа хуурч, хулхиддаг. Хамгийн сүүлд 16 мянган оршин суугчтай “Алтай” хотхонд сургуулийн газрыг чөлөөлөх гэж “Тайгам Алтай” компанитай хэд хэд уулзах хүсэлт тавиад сүүлдээ бүр иргэдтэйгээ жагсаал тэмцэл хийж байж үр дүнд хүрсэн. Бид цаашид хотхон, хорооллуудыг заавал улсын сургууль, цэцэрлэгтэй нь хүлээж авдаг болох ёстой. Одоо манай дүүргийн 29 дүгээр хороонд сургуулийн асуудал шийдэгдээгүй байна. Тэнд “Эрин”, “Өнөр” гэх мэт томоохон орон сууцны хороолол байгаа ч мөн л улсын сургуулийг нь шийдээгүй. Хүүхдээ сургахын тулд нэгдүгээр  хорооллоос 10 дугаар хороолол руу зөөнө гэдэг иргэдэд үүсэж байгаа нэг том хүндрэл.  Тиймээс тухайн бүсэд байгаа хувийн сургуулийг улсад авах эсвэл түрээслэх санал тавиад байна. Энэ хороонд сургуулийн асуудлыг шийдсэнээр Баянгол дүүргийн 34 дүгээр хороо улсын сургуультай болж иргэд хүүхдээ гэртэйгээ ойрхон сургуульд сургана. Хамгийн сайн сургууль бол гэртэйгээ ойрхон сургууль юм шүү” гэлээ.