Монголын эмэгтэйчүүдийн холбоо 100 жилийн ойн хэмжээгээ энэ сарын 7-нд зохион байгуулж, таксаа сая төгрөгөөр худалдсан нь олны шүүмжлэл дагуулаад байгаа юм. Тэгвэл энэ талаар бид Монголын эмэгтэйчүүдийн холбооны Ерөнхийлөгч Б.Оюунгэрэлтэй холбогдож тодруулахад "Манай холбоо 100 жилийн ойн арга хэмжээний таксаа сая төгрөгөөр борлуулсан нь үнэн. Бид төрийн бус байгууллагын статусаар үйл ажиллагаа явуулдаг. Монголд 30 мянган ТББ бий. Бүгд хандив, татвараар үйл ажиллагаа явуулж байгаа. Ямар ч байгууллага хэдэн төгрөгийн ямар зардалтай үйл ажиллагаа хийх нь ардчилсан Монгол Улсад байх асуудал. Бид ямар ч хууль зөрчөөгүй. Энэ арга хэмжээ бол хөрөнгө босгох үйл ажиллагаа байсан. 

      Тиймээс бизнес эрхлэгч эмэгтэйчүүдэд сая төгрөгийн такстай арга хэмжээ зохион байгуулах гэж байгаа саналаа тавьж, таксаа худалдаж авсан хүмүүс арга хэмжээнд оролцсон. Хэн бүхэнд нээлттэй байсан. Нийт 150 гаруй хүн оролцсон. Одоогоор арга хэмжээний тооцоо бүрэн гараагүй байна. Ойролцоогоор 60 гаруй сая төгрөг хандивт цугласан. Бид хулгай хийгээгүй.  Өнөөдөр 100 мянган төгрөгийн такстай арга хэмжээ зохион байгууллаа гээд хоолны мөнгөндөө хүрэхгүй шахам болчихсон цаг үе. Үйл ажиллагаанаас олсон мөнгөө бид эмэгтэйчүүдийн холбооны үйл ажиллагаанд зарцуулна. Бид сая төгрөгийн тасктай ийм арга хэмжээ дөрвөн удаа зохион байгуулсан" гэлээ.