Засгийн газрын ээлжит хуралдаан өнөөдөр боллоо.

    Энэ үеэр Барилга, хот байгуулалтын сайд Б.Мөнхбаатар “Өнгөрсөн хугацаанд олон улсад үүссэн нөхцөл байдал давагдашгүй хүчин зүйл. 2021 оны зургадугаар сараас эхэлсэн үнийн өсөлт барилгын салбарт олон сорилт авчирсан. УИХ-аас 88 дугаар тогтоолыг гаргаж, барилгын материалын үнийн өсөлтөд нөлөөлж байгаа хүчин зүйлсийг тодорхойлох үүрэг даалгавар өгсөн. Барилга, хот байгуулалтын яамнаас төсвийн 16 яам, найман ерөнхийлөн захирагчаас бүрдсэн ажлын хэсэг байгуулсан. Монгол Улсад улсын төсвийн хөрөнгө оруулалтаар хийж байгаа нийт бүх төсөл арга хэмжээний тоог гаргасан. Нийт 1153 төсөл, арга хэмжээний тоог авсан. Эндээс улсын төсвийн бус эх үүсвэртэй  болон төсөл, арга хэмжээ давхацсан зэргээс шалтгаалан 31 төсөл, арга хэмжээг хасаж, 2022 оны тавдугаар сарын 12-ны байдлаар 1122 төсөл, арга хэмжээний жагсаалт гарсан. Ингэж жагсаагаад маргааш нь бүх зүйл бэлэн болохгүй. Нийт төсөл, арга хэмжээний тоог нэгтгэсний дараа төсвийн ерөнхийлөн захирагч буюу сайд нараас 2022 оны тавдугаар сарын 15-ны байдлаар таслал болгож, зургадугаар сарын 8-нд Засгийн газарт танилцуулсан. Учир нь, энэхүү мэдэллээ ирэх долдугаар сарын 1-нд танилцуулах ёстой юм. Иймээс зургадугаар сарын 15-ны байдлаар 271 төсөл, арга хэмжээг хасуулахаар холбогдох сайд нар мэдээлэл өгсөн. Би нэгтгэх үүрэгтэй. Ингэхдээ Барилгын хөгжлийн төв, Зам тээврийн хөгжлийн төв, Эрчим хүчний хөгжлийн төвүүдтэй хамтарсан. Нийтдээ 851 төсөл, арга хэмжээ цугласныг өнөө өглөөний гурван цагийн байдлаар эцэслэн дүнг гаргасан. 800 төсөл арга хэмжээнээс 524 төсөл, арга хэмжээнд магадлал хийсэн. Өөрөөр хэлбэл, нийт ажлын 61.8 хувь нь байгаа юм. Үүнээс нээс 327 төсөл, арга хэмжээ магадлан ирүүлээгүй. Тэгээд энэхүү төсөл арга хэмжээнээс 105 нь баримт бичгийн иж бүрдэл дутуу байна. Зарим нь бүр өгөөгүй. Гадаа зогсож байгаа барилгачдынхаа зовлонг бид ойлгож байгаа. Зарим хүнтэй уулзаж байгаа. Зургадугаар сарын 15-нд магадлалаа дуусгана гэхэд зарим нь “Битгий магадлал хийлгээрэй, очоорой” гэж хэлж байсан. Тэгээд өөрсдөө хийлгэсэн. Ингээд нийт 524 төсөл арга хэмжээнд магадлал хийхэд, 269.1 тэрбум төгрөгийн зөрүү гарч ирсэн. Энэ асуудлыг Сангийн яамны сайдтай ярьж, хамгийн эцсийн дүнгээр 270 орчим тэрбум төгрөгийн үнийн зөрүү гарч ирлээ. Энэ байдлаа бид өнөөдөр Засгийн газрын хуралд танилцуулаад, цааш УИХ-д өргөн барина. 270 тэрбум төгрөгийн үнийн зөрүүг улсын төсөвт суулгах асуудлыг ярьж эхэлнэ. Мэдээж төсвийг эцэслэн шийдэх асуудал бол УИХ-ын бүрэн эрхийн асуудал байгаа. Энэ хүрээнд зарим барилгын салбарын тавьж байгаа асуудал гэвэл бүрэн гүйцэт хийхгүй, зарим гарч байгаа асуудлыг бодохгүй байна гэж ярьж байна. Энэ эдийн засгийн давагдашгүй хүчин зүйл төрд ч, хувийн хэвшилд ч хэцүү байна. Гэхдээ бидэнд хөнжлийнхөө хэрээр хөлөө жийх тоо хэмжээ байгаа. Энэ дотор мөн тээврийн зардал, бусад зүйл орж байгаа. Иймээс тусгайлан бодоод ирэхээр асуудал шийдсэнгүй гэх аргагүй” гэв.