Урт нарийн хуруу нь хийл хөгжим дээр бүжихэд хэн бүрхний сэтгэлийн утсыг хөндсөн уянгалаг ая эсвэл босоод бүжиглэмээр цоглог аялгуу эгшиглүүлдэг хийлч Б.Билгүүнтэй ярилцлаа. Тэрбээр зургаан настайгаасаа хийл хөгжимтэй найзалсан бөгөөд оюутан байхдаа “Чайковскийн үдэш” нэртэй анхны бие даасан тоглолтоо хийж байжээ. Германы оркестртой хамт Европын орнуудаар аялан тоглолт хийсэн тэр Америкийн алдарт Карнеги холлд тоглосон анхны монгол хөгжимчин билээ.

-Манай уншигчдад өөрийгөө танилцуулах уу?

       -Намайг Баярцогтын Билгүүн гэдэг. Монгол Улсын Консерваторыг бакалаврын зэрэгтэйгээр 2017 онд, АНУ-ын Охайо мужийн Оберлинг Консерваторыг 2021 онд төгссөн. Одоо “Fantasia” студийн уран бүтээлчээр ажиллаж байна.

-Яагаад хийл хөгжмөөр хичээллэх болсон юм бэ?

       -“Disney” анимейшны ард үргэлж сонгодог оркестрын ая тоглогддог. Үзэж байхдаа аяыг нь сонссоор байгаад сонгодог хөгжимд дуртай болсон. Сонгодог хөгжмийн зэмсгүүд дундаас хийлийг сонгосон шалтгаан нь хамгийн тансаг дуугардаг учраас мөн оркестр тоглож байх үед хийлчид нүүрэн эгнээнд суудаг юм. Хүүхэд байхдаа хүн бүрд харагдахыг  хүссэн байх.

-Анх хийл тоглож сурах ямар байсан бэ?

         -Бусад хөгжмийн зэмсгээс утсан хөгжмийн зэмсэг сурахад хамгийн хэцүү нь. Жишээ нь, төгөлдөр хуурын товчлуур бүр ямар нот гаргах нь тодорхой байдаг. Гэтэл утсан хөгжмийн зэмсэг тоглохын тулд хурууны мэдрэмж хамгийн чухал. Ямар өнгө гаргах нь хөгжимчнөөс шалтгаална. Хурууны мэдрэмж чухал байдаг учраас анх тоглоход сайхан ая эгшиглээгүй. Гэхдээ сайн багш, үргэлж дэмждэг гэр бүлийнхээ ачаар тоглож сурсан. Олон улсын тэмцээнд есөн настайдаа оролцож, тэр тайзан дээр анхны бүрэн хэмжээний аяа тоглож байлаа.

-Оюутан байхдаа анхны бие даасан тоглолтоо хийж байсан юм билээ. Тус тоглолтын талаар ярихгүй юү?

                -Хөгжимчнөөр сурдаг хүүхдүүд багаасаа тоглолтод оролцож, тайзан дээр гарч сурсан байдаг. Анхны бие даасан тоглолтоо Дуурь бүжгийн эрдмийн  театрт “Чайковскийн үдэш” нэртэйгээр хийж байлаа. Анхны тоглолт бол нэлээн том даваа байсан. Тоглолтын турш би тайзан дээр байх ёстой. Бараг хоёр цагийн турш тасралтгүй хөгжимдөх амаргүй юм билээ. Гэхдээ өөрийнхөө дуртай бүх хөгжмийг тоглосон учраас сайхан байсан.

-“Degi 22” тоглолт дээр анх удаа поп ая болон дууны ковер хийсэн гэсэн. Сонгодог хөгжмөөс өөр ая хийлээр тоглох ямар байсан бэ?

          -Хийл хөгжмөөр ямар ч аялгуу гаргаж болно. Цахилгаан хийлээр гитарын ая гаргах боломжтой. Поп ая тоглох нь сонгодог хөгжим тоглохоос илүү амархан санагдсан. Сонгодог хөгжмийн тоглолтод оролцоход бүх зүйл нь тогтсон дүрэм, ёс журамтай. Зогсох газартаа зогсоно, тайзан дээр илүү хөдөлгөөн хийж болохгүй. Гэтэл “Degi 22” тоглолтод поп, цоглог хөгжим тоглож байгаа учраас үзэгчдийг өөртөө татаж, тэр цоглог аяыг биеэрээ илэрхийлэх хэрэгтэй болсон. Энэ нь шинэлэг бөгөөд намайг сорьсон үйл явдал байсан даа.

-Сонгодог хөгжим тоглож сурах гэж байгаа хүүхдүүд болон эцэг, эхчүүдэд ямар зөвлөгөө өгөх вэ?

           -Хүн бүр сонгодог хөгжимчин болох албагүй ч энэ урлагийн талаар мэддэг, гоо зүйн мэдрэмжтэй байх хэрэгтэй. Энэ нь тухайн хүүхдийн суурь хүмүүжилд асар эерэг нөлөөлдөг. Хүүхэд хэрэв сонгодог хөгжимд сонирхолтой л байвал дэмжих хэрэгтэй. Манай “Fantasia” студи хүмүүст хөгжмийн боловсрол олгоход анхаарч ажиллаж байгаа.

-Хөгжим тоглож  байх үедээ юу мэдэрдэг вэ?

          -Би их дотогшоо, мэдрэмжээ төдийлөн илэрхийлж чаддаггүй төрлийн хүн. Хийлээр илэрхийлж чадаагүй мэдрэмжээ гаргадаг. Тэр утгаараа миний биеийн салшгүй нэг хэсэг. Мэдрэмжээ хүмүүст хүргэнэ гэдэг сайхан шүү дээ.

-Байнгын бэлтгэлтэй байдаг уу. Өдөрт хэдэн цагийг хийлтэйгээ өнгөрүүлдэг вэ?

           -Америкийн Нэгдсэн Улсад сурч байхад манай мэргэжлийн багш “Хэтэрхий их давталт үр дүнгүй байдаг. Өдрийн хичээлээс гадна хөгжимчний хувийн бэлтгэл таван цагаас хэтрэх хэрэггүй. Учир нь, таваас илүү цаг бэлтгэл хийвэл тархи ядарч, хийсэн бэлтгэлүүд чинь зүгээр л механик давталтууд болно. Тархиндаа юу ч хүлээж авахгүй, зөвхөн гар л хөдөлнө” гэж хэлдэг байсан юм. Бидний мэргэжил гаднаас нь харвал гоё хувцастай тайзан дээр гараад хэдхэн минут хөгжим тоглоод болчихож байгаа юм шиг харагдаж болох ч цаана нь асар удаан хугацааны бэлтгэл, хүч хөдөлмөр байдаг.

-Билгүүн ямар үед өөртөө хамгийн итгэлтэй байдаг вэ?

            -Тайзан дээр хийл тоглож байхдаа өөртөө хамгийн итгэлтэй байдаг. Билгүүнийг илэрхийлдэг зүйл нь хийл. Хийл бол миний нэртэй үргэлж хамт байж, намайг тодорхойлдог зүйл.

-Таны дараагийн зорилго, төлөвлөгөө юу вэ?

                -Хөгжимчин хүнд оргил гэж үгүй. Тиймээс үргэлжлүүлэн сурах зүйл олон байна. Дэлхийн алдартай тайзан дээр тоглохыг хүсдэггүй хийлч, уран бүтээлч байдаггүй байх.