• Өнөөдөр 2022-08-20

ТОЙМ: Дэлхийн даяар эдийн засгийн уналт үргэлжилж, инфляц “тэнгэрт” гарлаа

2022-07-01,   107

Зүүн Европт болж байгаа геополитикийн асуудалтай холбоотой эдийн засгийн хямрал үргэлжилж байна. Дэлхийн олон орны 2022 оны эхний улирлын тайланд маш олон улс “муу” авчээ. ОХУ, Украины нөхцөл байдал эргэн хурцадмал байдалд шилжиж болзошгүй энэ эгзэгтэй үед тал талд л эдийн засгаа сэргээж, өсгөх бодол “өвөрлөж” яваа бололтой.

-ШИ ДАРГА “МАКРО БОДЛОГЫН ЗОХИЦУУЛАЛТАА ЭРЧИМЖҮҮЛЖ, ЭДИЙН ЗАСГАА СЭРГЭЭНЭ” ГЭЖ АМ ГАРАВ-

Энэ долоо хоногийн эхэнд урд хөршийн эдийн засагчид БНХАУ-ын 2022 оны ДНБ-ий өсөлтийн төсөөллөө 4.1 хувь болгон бууруулжээ. ДНБ-ийн өсөлтийн төсөөллийг бууруулсантай холбоотойгоор БНХАУ-ын дарга Ши Жиньпин “БНХАУ макро бодлогын зохицуулалтаа эрчимжүүлж, “Ковид-19” нөлөөллийг багасгах, 2022 онд нийгэм, эдийн засгийн хөгжлийн зорилтоо биелүүлэхийн тулд илүү үр дүнтэй арга хэмжээ авна” гэсэн байна.

Дээрх тайлбарыг өгөх үедээ буюу БНХАУ-ын дарга Ши Жиньпин “БРИКС”-ийн орнуудын виртуал бизнес форумын үндэсний илтгэлдээ “Эдийн засгийн өсөлтийн зорилтоо биелүүлж чадахгүй болсон” талаар баталсан гэнэ. БНХАУ-ын Үндэсний статистикийн товчоо болон “Bloomberg”-ийн судалгаагаар эдийн засагчид урд хөршийн ДНБ-ий хэтийн төлөвийг бууруулсан нь энэ улиралд ДНБ-ийг бага ч болов бууруулна гэсэн итгэл төрүүлж байгаа аж.

-ОХУ-ЫН ЭДИЙН ЗАСАГ “ШАЛДАА БУУЖ”, ИНФЛЯЦ СҮҮЛИЙН 10 ЖИЛИЙН ДЭЭД ТҮВШИНД ХҮРЭХЭД ОЙРХОН БАЙНА-

Өнгөрсөн хоёрдугаар сарын 24-нд ОХУ Украин руу цэргүүдээ оруулж, дэлхийн орнууд ОХУ-ын эсрэг хориг арга хэмжээ авснаар эдийн засаг нь уналтад орсон. Тавдугаар сард жижиглэнгийн худалдаа 10.1 хувиар буурч, олон салбар уналтад орсноос жилийн дүнгээр автомашины үйлдвэрлэл 96.7 хувиар буурсан байна. Дайн, тулаантай холбоотой асуудлаар эдийн засаг нь уналтад орж, инфляц нь сүүлийн 10 жилийн дээд түвшинд хүрэхэд ойрхон байгаа ОХУ-д цалингийн хэмжээ эрс буурчээ.

ОХУ Украины руу цэргүүдээ оруулсны дараах үеийг бодвол, өнгөрсөн сард ОХУ-ын ажилгүйдлийн түвшин нэг хувиар буурч, 3.9 хувьд хүрсэн. Барууны олон брэнд, бүтээгдэхүүн, дэлгүүр ОХУ-аас гарсны “шок” нэг өдөр дахин ирж, ажилгүйдэл нэмэгдэнэ гэж мэргэжилтнүүд таамаглаж байгаа аж. Дайн, хориг арга хэмжээ гэх зэрэг шалтгаанаас үүдэн ОХУ-ын эдийн засаг өнгөрсөн оны энэ үетэй харьцуулахад 4.3 хувиар буурчээ.

-ЭДИЙН ЗАСАГ НЬ 1.6 ХУВИАР БУУРСАН АНУ УНАЛТААС БОЛГООМЖИЛНО ГЭВ-

Цар тахал, омикрон хувилбарын давлагаанаас үүдэлтэй үр нөлөөг байж болох хамгийн үр дүнтэй аргаар зохицуулж, 2021 оны төгсгөлд эдийн засгаа сэргээгээд байсан АНУ-ын эдийн засаг энэ оны эхний улирал 1.6 хувиар буурчээ.

                  АНУ-ын Эдийн засгийн шинжилгээний товчооноос саяхан гаргасан судалгаагаар энэ улиралд дахин 1.5 хувиар буурах урьдчилсан тооцоо гаргасан байна. ОХУ, Украины геополитикийн асуудлаар үүссэн дэлхийн хэмжээний нийлүүлэлт, санхүү, эрчим хүчний зах зээлийн уналтаас “сэргэг” гарч ирэхийн тулд АНУ-ын холбогдох яам, байгууллага “няхуур” үзэж, эдийн засгийн уналтаас болгоомжилж байгааг албаны эх сурвалж мэдэгджээ.

Хямралын үед нэг унасан эдийн засаг дор хаяж, хоёр улирал дараалан буурна гэдэг. Тэгвэл дахин уналтад орохгүйн тулд өрхийн санхүү, хэрэглэгч болон бизнесийн хатуу тэнцлийг хадгалах ёстойг санхүүгийн үйлчилгээний “Wells Fargo” компани онцолжээ.

-АМ.ДОЛЛАРТОЙ ХАРЬЦАХ ИЕНИЙ ХАНШ СУЛ БАЙГАА НЬ ЭДИЙН ЗАСГИЙН ӨСӨЛТИЙН ТӨЛӨВИЙГ СААРУУЛЖ БАЙНА-

ОХУ, Украины асуудал дэлхийн дахины валютын ханшид хамгийн их нөлөөлсөн байж болзошгүйг зарим шинжээч дурдаж байгаа. Өнгөрсөн гуравдугаар сард ам.доллартой харьцах иений ханш 120 давсан. Дэлхийн дахинд өрнөж байгаа геополитикийн асуудалтай холбоотойгоор АНУ-аас хэрэгжүүлж байгаа мөнгөний бодлого нь эсрэгээрээ бусад валютаа “залгиж” байгаа явдал болжээ.

Олон улсын шинжээчид ОХУ, Украины асуудал болон Японы эрчим хүчний импортод тулгуурласан эдийн засаг ам.доллартой харьцах иений ханшийг илүү сулруулна гэж үзэж байна. Харин зарим нь Японы төв банкны бодлогоор иений ханш суларсан ч, инфляцид бага зэрэг, эдийн засгийн өсөлтөд дунд зэрэг нөлөө үзүүлнэ гэв.

 


ТОЙМ: Дэлхийн даяар эдийн засгийн уналт үргэлжилж, инфляц “тэнгэрт” гарлаа
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188