-ЧУУЛГАН ӨНДӨРЛӨХ ҮЕЭР ИДЭВХТЭЙ ХАРАГДАХГҮЙ БОЛ БОЛОХГҮЙ ГЭХ ЧИГЛЭЛ УИХ-ЫН ГИШҮҮД АВСАН УУ-

          Намрын чуулган өндөрлөчихлөө. Өнгөрсөн хэдэн сард дуу нь гардаг юм уу гэмээр нам жим байсан УИХ-ын гишүүд “Ард түмнээ, өндөр настнаа, хүүхдүүдээ, жирэмсэн ээжүүдээ, малчдаа чи бодохгүй байна. Би бодож байна. Танай нам хариуцлагагүй байна, манайх ийм байгаагүй” гэх мэтээр сүүлийн хоёр өдрийг их л идэвхтэй өнгөрүүллээ. Ерөнхий сайд ч Засгаасаа нэг сайдаа халуун бүлээр нь сугалж, орных нь хүнийг хэдхэн цагийн дотор томилоод авлаа. Утаанаас болж явуулсан сайдын дуулиантай давхцуулан гадаад улсад Монголыг төлөөлөх гурван ч Элчин сайдыг батламжлаад авлаа. Гэсэн ч Засгийн халаа сэлгээ ойрын өдрүүдэд үргэлжлэхийг, Ерөнхий сайд хол явах замд нь саад болоод байгаа хэдийгээ Засгаасаа эвтэйхэн зайлуулж, өнгөрсөн сонгуулиар амласан албан тушаалын шахаануудаа цэгцлэх ажил өрнүүлнэ гэж байгаа. Өөрөөр хэлбэл, уламжлал ёсоор томоохон баяр, наадмын уур амьсгалыг далимдуулан хийдэг төрийн томилгооны ажил энэ удаад ч өрнөнө гэсэн үг. Ийм томилгооны үеэр УИХ, чуулган, ер нь улс төр нам гүм байвал ард иргэдийн анхаарал томилгоо, халаа сэлгээ, хуулийн нэмэлт өөрчлөлт, элдэв шийдвэр рүү нь чиглэж, “Засгийн газарт өөр хийх юм алга уу” гэх мэтээр бухимдал хүчээ авдгийг тэд юу эс андах. Энэ ч үүднээс УИХ дахь хэл амтай байж мэдэх, попорч дөнгөдөг хэдийгээ ийм үед зориудаар идэвхжүүлж, хэлж ярих сэдэв, санааг нь “батлан” гаргаж, заримд нь хэвлэж тараадаг гэх яриа ч мэр сэр гардаг. Энэ л жамаар өнгөрсөн хоёр өдөр МҮОНРТ-ийн Үндэсний зөвлөлийн төсөв, тайлан, БОАЖЯ-ны халаа сэлгээ, агаарын бохирдол, утаатай тэмцэх нийслэлийн хурган дарга нарын ажлаа өгсөн, өгөөгүй асуудалтай зэрэгцүүлэн үеийн үед ярьж ирсэн тэтгэвэр нэмэх нэмэхгүй, хүүхдийн мөнгийг олгох, олгохгүй асуудлыг том асуудал болгож чадлаа, тэд.

Уламжлал ёсоор томоохон баяр, наадмын уур амьсгалыг далимдуулан хийдэг төрийн томилгооны ажил энэ удаад ч өрнөнө гэсэн үг. 

           УИХ дахь зарим гишүүн телевизийн камер, сэтгүүлчдийн өмнө ярьдаг шигээ үнэхээр шударга юм бол энэ өдрүүдэд Минжийн застав руу онгоцоор нисэж, зугаалангаа цэргүүдэд ковид халдварлуулсан байх магадлалтай эмэгтэй гишүүдийн нэрийг Чуулганы индэр дээр зарлаад, хариуцлага, ёс зүй нэхээд зогсож байх байлаа. Гэвч нэгнийх нь ч амнаас тэдний тухай, тэнд халуурч, бүлээрч байгаа цэргүүдийн талаар ганц ч үг гарсангүй.

      Намрын чуулганаар хэлэлцэхээр хүргүүлсэн саналууд, чухал ажлууд, хуулийн төслүүдийн цөөнгүй нь коронавирус болон ийм тийм асуудлаас болж хэлэлцэгдсэнгүй. Үүнийг манай гишүүд тоож байгаа ч юм алга. Болдог юм болдгоороо л болж байгаа аятай Чуулган завсарлахыг хүлээн олонх нь эвшээж, энэ удаад гол дүрээр сонгогдсон хэд нээх ач холбогдолгүй асуудлуудаа ууртай, омогтой, итгэл үнэмшилтэйгээр ярьцгаасаар энэ удаагийнх завсарлаж таарах нь. Өөрөөр хэлбэл, УИХ-д ард түмнийг төлөөлж суугаа эрхэм гишүүдэд нэг тийм ард түмний төлөө том зорилго, түүнийгээ биелүүлэх гэсэн чин хүсэл, боломжийг эрэлхийлэх  тэмцэл, санаачилга алга гэмээр.  

           Ковидын улмаас төсөв тасрах, эдийн засгийн уналтад орох, эд бараа материал, нэн чухал шаардлагатай эм, эмнэлгийн хэрэгслийн гачигдалд орж байгаа, хил хаалттай, хоёр хөрш “түгжээтэй” гээд тулгамдаж буй бүх асуудлыг тэд харзнасан, ажигласан байдалтай, зарим үед ард иргэдээсээ ч унж дорой сууцгааж байна. Зарим нь бүр бурхны хөшөө барьж, монголчуудын эрүүл мэндийг хамгаална, утаа бууруулна, ядууралтай тэмцэнэ гэж хүртэл “даажигнаж” байна. Энэ бүхнээс харахад, УИХ тэр дундаа улс төрийн намууд чуулган нээх, хаах үеэр зориуд “идэвхжүүлэлт”, гишүүд санал зөрж, хэрэлдэж, муудалцаж байгаа мэт дүр зураг харуулаад, бусад цагт унтаа, ээлж өнгөрүүлсэн тэр л загвар энд ч үргэлжилж байна.

          “Идэвхжээрэй, манай асуудал орлоо” гэхээр нь нүдээ эрмэлцэж байгаад хэрэлдэж, муудалцаж, онцын шаардлагагүй үед нь омикрон, ковид туссан шиг л сууна даа, манай УИХ-ын гишүүд.

УИХ-д ард түмнийг төлөөлж суугаа эрхэм гишүүдэд нэг тийм ард түмний төлөө том зорилго, түүнийгээ биелүүлэх гэсэн чин хүсэл, боломжийг эрэлхийлэх  тэмцэл, санаачилга алга гэмээр