“ТАХИР СОЁОТ”-ООС ГАРЧ ИРЖ БУЙ Б.ГАНХУЯГИЙГ ТУСГААР ТОГТНОЛЫН ОРДОНД ХЭН ТОСОЖ АВАХ ВЭ

Б. Цогтбаяр:
Улс төр- Анхаарлын төвд

2026-03-27, 248

“Тахир соёот”-ын хорихоос Тусгаар тогтнолын ордон зүг Б.Ганхуяг айсуй. “Нүүрсний хулгай”-н жинхэнэ хэрэгтнүүдийг хамаатнууд шигээ сайн таних хүн бол тэр. Энэ хэргийн талаар А-Я хүртэл нь мэдэх цагаан толгой л гэсэн үг. Тэр шүүхийн танхимаас “Би энд золиослогдож, тэд тэнд засагтай, тамгатай, төртэйгөө үлдэж болохгүй” хэмээн хөмхий зууж хэлчихээд хорих руу ачигдсан. “ЭТТ”-г эрхшээж байх үед нь атга нүүрс ч голохгүй царайчилж байсан Ардын намынхан нь ачигдахаас авраагүйд, ачигдаад явахад араас нь сүү ч атугай өргөөгүйд тэр гомдолтой яваа.

Тэр тусмаа, Б.Ганхуяг задарч явах яг ид үед нь зангиаг нь тайлж, зоосыг нь хурааж, засаг хоолонд оруулсан Л.Оюун-Эрдэнэд өш зангидчихсан яваа. Хорихын хашааны хог шороо шүүрдээд зогсож байхдаа Б.Ганхуяг гараад хэрхэхээ, хэнтэй хамтран хорсолоо тайлж, хундага өргөхөө тооцоолсон л байж таарна. Туулсан намтрыг нь харсан ч туг тахигдаад, эсхүл хийсэн хэрэгтээ гэмшиж хэлээ хазаад амьдрах хүн яавч биш. Ардын намынхаа ах нартай тэрсэлдэж, Тусгаар тогтнолын ордны үүдэн гэр бариад зусаж байлаа. Хэлмэгдэгсдийн хөшөөг тойруулан хэдэн арван улаан майхан зоогоод, Ардчилсан намын эсрэг акцалж ч явлаа. Хэнтэй хамтарч, хэний өөдөөс хэрхэн “зодолдох”-оо мэддэг хашир толгой.

Хүүхдийн хориход номын санч хийж байсан Т.Аюурсайхан сарын өмнө суллагдсан. Хэд хоног дусал залгуулж тэнхэрээд ХЗДХ-ийн сайд Б.Энхбаяртай нийлчихсэн. Төрийн ордонд ХЗДХ-ийн сайд Б.Энхбаяр “Т.Аюурсайхан ялаа эдлээд дуусчихсан юм чинь одоо айх юмгүй өөрөө гарч ирээд наад нөхдүүдийнхээ булайг ярих хэрэгтэй” гэж Л.Оюун-Эрдэнэ рүү чиглүүлж мэдэгдэл хийгээд л, маргааш нь Т.Аюурсайхан телевизэд Л.Оюун-Эрдэнийг муулаад сууж байх жишээтэй.

Тэгэхээр шүүхийн танхимд ч, шоронгийн торны цаана ч нэгнээ матаж, нүүрсний нууцаа дэлгэж нөхөрлөлөөсөө урваагүй Б.Ганхуяг, Т.Аюурсайхан хоёр наранд гарч ирчихээд сална гэж байхгүй. Түрүүлж наранд гарсан Т.Аюурсайхан нь хэний дэргэд тухалчихсан байна, тэнд Б.Ганхуяг очиж таарна. Тийм ч учраас “Тахир соёот”-оос айсуй Б.Ганхуягийг Тусгаар тогтнолын ордонд хамгийн түрүүлж тосож авах хүн нь ХЗДХ-ийн сайд Б.Энхбаяр байх болов уу. Бүр хоёр алгаа үрээд хүлээж байгаа ч байх.

Уржигдар ХЗДХ-ийн сайд Б.Энхбаяр экс Ерөнхий сайд Л.Оюун-Эрдэнэд хаяглаж “Энэ бүлэглэсэн хулгайчдын ард заавал гарч, үнэнийг нь нотлох ёстой гэдэг шазуур буцалж байна” гэж бичсэн байна лээ. Б.Энхбаярын буцалсан шазуур, Б.Ганхуягийн зангидсан өс хоёр нийлвэл Л.Оюун-Эрдэнэд өөрийнх нь хэлдгээр шорвог, бас амаргүй байх болно.

Гэхдээ Л.Оюун-Эрдэнэ Б.Энхбаярын эсрэг гар хоосон биш. Удахгүй А.Амундра Шанхайгаас ирнэ. Ирээд Л.Оюун-Эрдэнийн ярьсныг буюу ХЗДХ-ийн сайд Б.Энхбаярын “Бодь”-иос авсан 1.3 сая ам.долларын авлигыг АТГ-т гэрчилнэ гэдгээ мэдэгдчихсэн. Товчхондоо, Б.Энхбаяр, Л.Оюун-Эрдэнэ хоёр Б.Ганхуяг, А.Амундра гэх нэг, нэг цэнэгтэй “зэвсэг”-тэй болж аваад, өнөө “халуухан хавар” гэгчээ үзүүлэх нь бололтой.

“ТАХИР СОЁОТ”-ООС ГАРЧ ИРЖ БУЙ Б.ГАНХУЯГИЙГ ТУСГААР ТОГТНОЛЫН ОРДОНД ХЭН ТОСОЖ АВАХ ВЭ

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.