Улс төрийн намууд энэ долоо хоногт сонгуульд нэр дэвшигчдээ зарлаж,  уурлаж, уйлж, урвайж, урваж шарвасан, усны сав шидэлцсэн  халуун үйл явдлууд өрнөлөө. Тэр дундаас улс төрийн хоёр том хүчин гэгдэх МАН, АН-аас тойргийн болон жагсаалтаар нэр дэвшигчдээ зарлах гэж намын байраа “түйвээх” дөхөв.

      Ардын нам арай туршлагатай дотооддоо асуудлаа дарчихдаг юм гэсэн дээ нэр дэвшигчдээ зарлаад, хэрүүл маргаанаа намын байрандаа үлдээж, шинэ боловсон хүчнээр хүч сэлбэж байгаагаа мэдэгдээд сонгогчдын дунд хүлээлт үүсгэж хурлаа өндөрлүүллээ. Алдсан хүн арван тавтай гэгчээр Ардчилсан намын хэрүүл лавтай сонгууль хүртэл үргэлжлэх юм байна. Нэр дэвшигчдийг зарласан даруйд хэрүүл, зодоон болж, тэр байтугай нэр дэвших эрхээ авсан гишүүд эхнээсээ намаасаа татгалзаж, нэрээ татаж байгаагаа мэдэгдсэн нь бий.

        Цаашлаад өмнөх хоёр удаагийн алдаагаа ахиад давтахыг ч үгүйсгэх байдалд байгаа нь нэр дэвшигчдийг тодруулах үйл явцаас ил харагдаж байна.

        Тэр дундаа фракцын “зодоон”-оо дийлэхгүй сөрөг хүчний байр сууриа дараагийн намдаа тавьж өгөхийг үгүйсгэхээргүй байна. Ардчилсан намын дарга Лу.Гантөмөр ямар ч эрх мэдэлгүй гэдгээ нэр дэвшилтийн үеэр тодорхой харууллаа. Тэр бүлэглэлийнхээ эрх ашгийг хангах гэж хэдэн талд тэлээ хурга шиг гүйсээр эцэстээ намаа тарааж дөхснийг олон нийт ил далд шүүмжлэх болов.    

     Ардчилсан намд  “Алтангадас”, МҮДН, “Шонхор”, “Нэг ардчилал” МоАХ, гэх хуучин фракц бий. Шинээр улс төрд гарч ирж буй залуу үеийнхэн “Морьтон” “Од”, “Монде” “Хийморь” гэх улс төрийн клубуудыг байгуулсан. Гэвч энэ удаагийн сонгуульд Ерөнхийлөгч асан Х.Баттулгыг тэргүүлсэн МоАХ, Ц.Элбэгдоржийн бүлэглэлээс нэр дэвшигчдийн олонх тодорч, хэн нь намаа атгах вэ гэдэг дотоод “дайн” дахин эхлүүлээд байгаа аж.

       Ингэснээр Ардчилсан нам эрх баригч намтай биш нам дотроо өрсөлдөх нь гарцаагүй болов.  

Ц.ЭЛБЭГДОРЖИЙН БҮЛЭГЛЭЛ ЖАГСААЛТАД ТЭРГҮҮЛЖ, Х.БАТТУЛГЫН БҮЛЭГЛЭЛ ТОЙРГОО ТОЙГЛОНО

         Лу.Гантөмөрийн хувьд эхийг нь эцээж, тугалыг нь тураачихгүй сонгуулийг даваад гарах бодлого нам дотроо барьж байгаа. Намаа нэгтгэх талаар бодохоо ч больсон биз. Гишүүдийнхээ тоогоор жин дарж буй хоёр том бүлэглэл тунаж үлдсэн тул жагсаалт, тойргоо тэнцүү хувааж өгчихөөд чимээгүй ажиглаж суугаа нь энэ. Мэдээж аль нэг нь давуу эрх авах гэж үзнэ. Тиймээс нэр дэвшигчидийн нэр ил болмогц намын горилогчид нь тойргоо голж, тэр байтугай “Намаасаа гарна” гэдгээрээ түрий бариад ч хамаагүй эрх мэдэлд хүрэхээр улайрч эхэлсэн нь энэ.

     Жагсаалтад багтагсдын 80 орчим хувийн Ерөнхийлөгч асан Ц.Элбэгдоржийн бүлэглэлийнхэн эзэлж байна хэмээн улс төрийн хүрээнийхэн нэр дэвшигчдийн нэрс зарлагдахтай зэрэгцээд жиг жуг гэх болсон.

      Тухайлбал, С.Одонтуяа, А.Ганбаатар, Х.Отгончулуун, Н.Жавзанпагма, Э.Галбадрал, О.Чулуунбилэг зэрэг Ерөнхийлөгч асан Ц.Элбэгдоржийн “бойжуулсан” улстөрчид жагсаалтад эрэмбэлэгдсэн. Ц.Элбэгдорж ТЕГ-ын дарга асан Б.Хурц тэргүүтэй хууччуулаа зүгтгүүлсэн ч харамсалтай нь амжилт олсонгүй. Гэвч үхэхдээ үхэр буугаа тавина гэгчээр залуу гишүүдээсээ жагсаалтын дээгүүрт оруулах гэж нэлээд шуугиан тарих шиг боллоо. Улмаар урлаж, уйлсан гишүүдийг түр амсхийх хооронд жагсаалтад гишүүдээ сэм багтаасан гэх яриа ч Ардчилсан намынхныг бухимдуулаад авав.

               Түүнчлэн “Шонхор”, “Нэг Монгол”, “Монде” фракцын нэр дэвшигчдийг Сангийн сайд асан С.Баярцогт зүтгүүлж байгаа гэдгийг намын гишүүд шүүмжилж эхэлжээ. Ингээд үзэхээр жагсаалтын эхэнд эрэмбэлэгдсэн Х.Тэмүүжин, Ж.Баярмаа, Э.Одбаяр, П.Батчимэг, Г.Очирбат, Б.Жаргалан, Д.Оюунцэцэг, Б.Пунсалмаа нарын гишүүн багтаж байгаа юм. Нэг ёсондоо нэмэгдэхүүний байрыг солиход нийлбэрийн чанар өөрчлөгдөхгүй гэгчээр С.Баярцогтыг тойрог руу нь “хөөсөн” ч ард нь асаалттай үлдэх улстөрчид хэвээр үлдэх нь.

       Харин МоАХ буюу Ерөнхийлөгч асан Х.Баттулгын талаас Ж.Батсуурь, Ө.Шижир, С.Цэнгүүн, К.Жандос нарын гишүүдийг жагсаалтад оруулаад байна. Тойрогт нэр дэвшигчдийн МоАХ-ны нэр дэвшигчид голлох байр суурийг эзэлж, Х.Баттулгын талаас чамгүй олон нэр дэвшигч тодроод байна.

      Тухайлбал, УИХ-ын ээлжит сонгуулийн I тойрогт горилоод буй А.Адъяасүрэн, О.Алтангэрэл, С.Ганбаатар, III тойргоос Б.Бейсэн, IV тойргоос Б.Ариун-Эрдэнэ, Х.Эрдэнэбаатар, Ж.Батзандан, V тойргоос Ц.Туваан, С.Эрдэнэболд, VI тойргоос Н.Ганибал, Э.Төмөрбаатар, Ш.Батдэлгэр, VII тойргоос Л.Мөнхбаясгалан, Р.Сэддорж, Л.Одсэр, Н.Энхбат, VIII тойргоос Т.Батцогт, IX тойргоос И.Мөнхжаргал нарын МоАХ-ын гишүүд нэр дэвших эрхээ өвөртөлсөн.  Ингэснээр Х.Баттулгын бүлэглэл, тойрогтоо тэргүүлж, Ц.Элбэгдоржийн бүлэглэл жагсаалтаа “атгаж” эхэллээ.

       Хэдийгээр намын дарга Лу.Гантөмөр фракцын эрх ашгуудыг хангасан шийдвэр гаргаж байгаа мэт боловч намынхаа талцал хуваагдал туйлд нь тулгаж байна. Эндээс харахад бүлэглэлүүдээ бойкотлуулсан Ардчилсан намаас энэ сонгуулиас үр дүн хүлээгээд хэрэггүй нь бололтой.