Л.Оюун-Эрдэнийн Засгийн газар өнгөрсөн хугацаанд чамгүй олон ажлын эхлэлийг тавьлаа. Хэрэгжүүлж, хийж, хэлсэн дээ хүрч чадвал энэ Засгийн газар бүрэн эрхийнхээ хугацаанд чамбай сайн ажилласан гэж харж болохоор ажлууд ч санаачилсан. Эхлэлийг нь зөв тавиад, зөв арга замаар хэрэгжүүлчихвэл бодлого шийдвэрүүд ард түмний амьдралд мөн ч их дэм болохоор байна.

         Тэр тусмаа сүүлийн хэдэн саруудад Засгийн газар үр дүнтэй хуралдаж, нэлээд хэдэн зоригтой алхамуудыг ч хийв. Хэдийгээр олон нийтийн дунд “Сонгуульд дөхчихсөн энэ үед улс төрийн шинжтэй үйл ажиллагаа хэрэгжүүлж эхэллээ” гэх шүүмж, хардлага олон нийтийн дунд байгаа ч хэзээ эхлүүлэхдээ чухал биш, цаашдаа ажил хэрэг болгочихвол эдийн засгийн үр өгөөж талаасаа ч ард түмний аж ахуйн амьдралд ч нөлөөлөх сайн санаачлагууд олон байна. Эргээд сөхвөл Л.Оюун-Эрдэнийн Засгийн газрын эхлүүлсэн хамгийн том ажил нь авлигатай тэмцэх эхний алхам байсан. Хэдийгээр  авилгатай тэмцэх ажил ард түмний сэтгэлд нийцэхээр хангалттай сайн биелэлээ олоогүй ч энэ ажлын эхлүүлж, “эрүү, толгойгоор нь” ялгаж салгах шаардлага Монголын төрд байсан уу гэдгийг тэд олж харсан. Харин эхлүүлсэн жишгээ үргэлжлүүлээд ус, тосоор нь ялгаж, үр дүнг нь үздэг байвал Монголын төрд мөн ч дэм болох юм. Засаглал сайжрахын хэрээр байгалийн үр өгөөжөөс хүртэх үүд хаалга ард түмний өмнө нээлттэй болох ажлуудыг энэ Засгийн газар эхлүүлсэн. Хамгийн сүүлд гэхэд л Монгол Улс Үндэсний баялагийн сангийн хуультай болж, Үндсэн хуулиар олгогдсон байгалийн баялагийг тэгш хүртэх эрхээ бүх нийтээрээ эдлэх боломжтой болсон. Тодруулбал, Үндэсний баялагийн сангийн хуулиар стратегийн ордуудын 34 хувийг Баялагийн санд хуримтлуулах олон жил ярьсныг ажил хэрэг болгож, эрх зүйн орчинг бүрдүүлж өгсөн.

        Хуулийн хэрэгжилт дээр ард түмэн хяналтаа сайн тавьж, зөв замаар хэрэгжүүлж чадвал Монголын ирээдүйд мөн ч хэрэгтэй хуулийг тэд санаачлан батлуулсан даа.  Түүний хамгийн ойрын жишээг авч үзвэл Засгийн газрын шийдвэрээр “Эрдэнэт” үйлдвэрийн овоолгыг 100 хувь төр мэдэлдээ авч олон жил хаягдал хэмээн хэдхэн хүний халаасыг түнтийлгэж байсан асуудлыг таслан  зогсоосон. Өөрөөр бол, Засгийн газраас “Ачит Ихт” компанийн 34 хувийг төр авах найман жилийн хугацаанд олсон ашгийн 34 хувийг нөхөн төлүүлэх цаашид Эрдэнэтийн овоолго 100 хувь "Эрдэнэт үйлдэр" ТӨҮГ-ын өмч байхаар шийдвэр гаргаад буй.

               Түүнчлэн “Эрдэнэс Тавантолгой” ХК-ийн ногдол ашгийг энэ онд хоёр хуваан олгосон. Хэдийгээр олон нийтийн дунд сонгууль дөхчихсөн үеийн улс төрийн ажил, сонгуулийн өмнө “мөнгө тараалт” гэж шүүмжлэх хардах нэгэн байгаа ч ард түмэн ногдол ашиг хүртэх эрхтэй. Эрхээ ч бүрэн эдлэх ёстой. “Эрдэнэс Тавантолгойн ногдол ашгийг иргэн бүрт олгож, ногдол ашиг хүртэх эрхийг нь төр ч эдлүүлэх үүрэг хүлээсэн. Угтаа бол ногдол ашгийг сонгуулийн жилд олгоод чимээгүй болчихдог бус жил бүр олгох, ашгаа тайлагнах үүргийг ч “Эрдэнэс Тавантолгой” ХК-ийн удирдлагууд хүлээх нь зүйн хэрэг юм аа.

       Засгийн газар өнгөрсөн долоо хоногт 20 минутын стандарт хотыг бий болгох эрх зүйн орчин бүрдүүлэхээр хуулийн төсөл өргөн мэдүүлсэн. Сүүлийн хэдэн жил нийслэлчүүдийн толгойны өвчин болсон утаа, түгжрэл агаарын бохирдлыг нэг мөр шийдэх боломж ч байж мэдэх юм аа. Хуулийн төсөлд тусгаснаар Улаанбаатар хотоос гадна Хөшигийн хөндий буюу Шинэ зуун мод хот, Шинэ Хархорум, Дархан, Эрдэнэт, Багануур, Налайхыг улсын зэрэглэлтэй хот болгон хөгжүүлэх, цаашид бүс бүхэн, боомт бүр улсын зэрэглэлтэй хоттой болох эрхзүйн боломж бүрдүүлэх нь. Улаанбаатар хотыг дараах 14 хотод хуваан бие даан хөгжүүлэхээр болсноо зарлаад буй. Үүнд Хан-Уул хот, Яармаг хот, Буянт-Ухаа хот, Сонгинохайрхан хот, Толгойт хот, Баянхошуу хот, Өнөр хот, Баянгол хот, Чингэлтэй хот, Сэлбэ хот, Сүхбаатар хот, Дарь-Эх хот, Баянзүрх хот, Амгалан хот хэмээн нэрлэж, иргэн бүр төрийн үйлчилгээг 20 минут дотор авахаар их өгөгдөлд тулгуурласан цахим төлөвлөлт бүхий нэгдсэн стандарт тогтоох санаачлага гаргаад буй. Мөн Бага тойруугийн төвлөрсөн эрх мэдлийг задлахын тулд Засгийн газрын харьяа байгууллагуудыг Хөшигийн хөндийд шилжүүлэн байршуулахаар төлөвлөсөн. Бага тойруугаас-Хөшигийн хөндийг Дүүжин гүүр болон туннелээр шууд холбож 20 минутийн дотор Төрийн ордны Чингисийн хөшөөнөөс Чингис хаан нисэх онгоцны буудалд шууд очдог байх боломжийг ч бүрдүүлэхээ мэдэгдээд байгаа юм. Ямартай ч Засгийн газар Улаанбаатарын утаа түгжрэлийг бууруулах арга зам хайж, туршлага судалж, ийм шийдэл олоод байгаа юм байна.

       Цаашлаад Улаанбаатар гэлтгүй хөдөө орон нутагт хөгжлийн ямар бодлого хэрэгжүүлж болох вэ гэдэг дээр гарц гаргалгаа ярьж эхэллээ. Өнгөрсөн өвлийн зуд малчдын шандсыг сорьсон. Тиймээс цаг уурын энэ нөхцөлд хоршоо байгуулж, хамтарч ажиллах нь зөв юм байна гэдэг дээр төр засгаас ч санаачлага гаргаад эхэллээ.

      Өчигдөр гэхэд л Засгийн газрын хуралдаанаас Үндэсний орон сууцжуулах хөтөлбөрийг  баталж, Бөөрөлжүүтийн цахилгаан станцыг ашиглалтад оруулах ажлыг эрчимжүүлэхээр болсноо зарлав. Цахилгаан станцын ажлыг урагшуулчихвал өнгөрсөн өвлийг өлгөн салган давсан эрчим хүчний салбарт мөн ч их дэмтэй байна даа.

     Ингээд харахаар Л.Оюун-Эрдэнийн Засгийн газар эхлүүлсэн ажлуудынхаа үр дүнг үзэх нь юу юунаас илүү чухал байна. Засгийн газрын эхлүүлсэн ажлууд сонгуулийн дараа ч  үргэлжилдэг байвал Монголын ирээдүй гэрэлтэй байна.