• Өнөөдөр 2024-03-28

Польшид унасан пуужин Украиных гэж өрнөд нотолж, харин Володимир Зеленский үүний эсрэг байна

2022-11-18,   464

     Украины Ерөнхийлөгч Володимир Зеленский мягмар гарагт Польшийн нутагт тусаж, хоёр хүний аминд хүрсэн пуужингийн цохилтод Украин буруугүй гэдэг нь эргэлзээгүй гэж мэдэгдсэн байна. Уг пуужин өөрийнх нь биш гэдэг баталгааг дээд командлалынх нь зүгээс өгсөн гэдгийг Володимир Зеленский мэдэгджээ. Бас дэлбэрэлт болсон газарт Украины албаныхныг очуулж, мөрдөн шалгалтад оролцуулахыг тэр уриалсан байна. НАТО-гийн Ерөнхий нарийн бичгийн дарга Йенс Столтенберг пуужинг Киевийн агаарын довтолгооноос хамгаалах системийнх байж болзошгүй гэж мэдэгдсэний дараа Володимир Зеленский ийм мэдэгдэл хийжээ.

     Польшийн ГХЯ-ны мэдээгээр, мягмар гарагт Польшийн Украинтай залгаа хилээс 6 км зайтай Пшеводов сууринд пуужингийн дэлбэрэлт болсон. Украин дахь Оросын түрэмгийлэл эхэлснээс хойших хамгийн хүчтэй пуужингийн цуврал цохилт тухайн өдөр болсны улмаас Украины агаараас хамгаалах систем бүрэн ажиллагаанд байжээ. Индонез улсад Хорийн бүлгийн дээд хэмжээний уулзалт болж байх үеэр болсон энэ халдлага олон улсад асуудал дэгдээж, улмаар НАТО-гийн гишүүн улсын нутагт пуужин унаж дэлбэрлээ гэдэг мэдээлэл дайн аюултай хэмжээнд шатлан өргөжих нь гэдэг айдас түгшүүр газар авсан. Гэвч Польшийн Ерөнхийлөгч Анжей Дуда болон НАТО-гийн Ерөнхий нарийн бичгийн дарга Йенс Столтенберг нар Польшид унаж, хоёр хүний аминд хүрсэн пуужинг Оросын цэргүүд бус, Украины агаараас эсэргүүцэн хамгаалах системийнх гэж мэдэгдсэн. “Бидэнд болон манай холбоотнуудад байгаа мэдээллээр, энэ нь Зөвлөлтийн үеийн, С300 гэх хуучин пуужин байна. Мөн үүнийг Оросын талаас харвасан гэж үзэх нотолгоо байхгүй байна. Тиймээс үүнийг Украины агаараас хамгаалах системээс харвасан байх магадлал өндөр байна” гэж Польшийн Ерөнхийлөгч Анжей Дуда мэдэгджээ.

     С300 загварын ийм пуужинг Орос, Украины аль аль нь хэрэглэдэг байна. Москвагаас гадна Франц, АНУ-ын удирдагчид мөн дээрхийн адил байр суурь илэрхийлсэн. Тэрчлэн НАТО-гийн тэргүүн Украины эсрэг харгис түрэмгий дайн өдүүлээгүй бол энэ бүхэн болохгүй байсан учраас эцсийн хариуцлага Оросод ногдож байна гэдгийг өчигдөр "Би Би Си"-д өгсөн ярилцлагадаа мэдэгджээ. Украин хэдийгээр гишүүн нь биш ч гэлээ НАТО тус улсад үзүүлж байгаа цэргийн өргөн хүрээтэй тусламжийн хүрээндээ агаарын довтолгооноос эсэргүүцэн хамгаалах “илүү боловсронгуй систем” нийлүүлэх үүрэгтэй болж байгааг Столтенберг мөн дурдсан байна. Тэрчлэн Орос НАТО-гийн эсрэг цэргийн хүчээр довтлохоор зэхэж байгаа гэх ямар ч шинж байхгүй байгаа гэдгийг Умард Атлантын эвслийн тэргүүн энэ үеэр дурджээ. Үүний зэрэгцээ Польш улсад хочр хүний аминд хүрсэн пуужингийн цохилтын асуудлаар НҮБ-ын Аюулгүйн зөвлөл өчигдөр хуралдсан байна. Энэ үеэр АНУ, Их Британийн зүгээс Оросыг энэ хэргийн цаад буруутан гэж шүүмжилсэн байна.

      Харин НҮБ дахь Оросын байнгын төлөөлөгч Василий Небензя пуужинг Оросоос Польш руу харвасан гэдэг бол ээлжит худал мэдээлэл боловч НАТО-г Оростой шууд мөргөлдөөнд турхирах гэсэн санаатай оролдлого гэж мэдэгджээ.

 

Польшид унасан пуужин Украиных гэж өрнөд нотолж, харин Володимир Зеленский үүний эсрэг байна
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 2
  • Сэтгэгдэл үлдээсэн: 2022-11-19 21:07:50
    Зочин: УКРНАЦИСТУУД ХИЛ ОЙРОЛЦОО УЛСУУДАА ПУУЖИНДЧИХААД БИД БИШ ОРОС ГЭЭД БАЙВАЛ БУСАД НЬ ОРСЫН БУРУУ ГЭЭД НАТОг ДАЙНд ТАТАН ОРУУЛАХ ЮМ БАЙНА Л ДАА . ХОШИН ШОГ ӨРНӨСӨӨР
  • Сэтгэгдэл үлдээсэн: 2022-11-19 09:12:52
    зочин: Бүх л үед зелинский өөрийгөө цагаан хун гэж урьдчилан зарладаг болохоор би түүнд итгэхээ болтчихож,
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188