Эдгээр байршилд Геодези, усны барилга, байгууламжийн газраас хөрсний усны урсгалыг сааруулах, суваг татах зэрэг ажлыг үе шаттай хийж байна. Тухайлбал, өнөөдөр ЧД-ийн 18 дугаар хороо, Чингэлтэйн сувагт үүссэн халиа тошингийн байршилд нийт 20 хүний бүрэлдэхүүнтэй шуурхай бригад ажиллалаа. 

ГУББГ-ын Тээвэр үйлчилгээний инженер Д.Ариунбаатар "Халиа тошин үүсэж байгаа гол шалтгаан бол хур бороо их орсонтой холбоотой тухайн нутаг дэвсгэр дээр хөрсний ус нэмэгдэх, гарч ирэхтэй холбоотой. Үерийн хамгаалалтай ойрхон байгаа барилга байгууламжийн халиа тошинг Геодези усны барилга байгууламжийн газар (ГУББГ) хариуцна. Халиа тошингүй газар тухайн дүүргийн дэд бүтэц буюу онцгой байдал хариуцаад байгаа. Нэн тэргүүнд авч буй арга хэмжээ бол тухайн айлуудыг нүүлгэн шилжүүлэх. Дараагийн шатанд булга шандын суваг татах, халиа тошинтой мөстэй хэсгийн сувгийг татаад мөсөөр нь далан босгох, илүүдэл мөсийг нь хогийн цэг рүү буулгах ажлуудыг хийж байгаа" гэлээ.