Монгол Улсын Хөгжлийн банк “арга тасарч”, найдваргүй зээлдэгчдээ олон нийтэд зарлаж, 2014-2019 оны хооронд авсан зээл нь “Чанаргүй зээл”-ийн ангилалд шилжсэн 26 компанийг шүүхэд өгч, 841 тэрбум төгрөгийн нэхэмжлэл гаргаад буй.

           Эргэлт.мн мэдээллийн сайт Хөгжлийн банкнаас олон тэрбумаар зээлчихээд буцааж төлөө “мартчихсан” компаниудын авсан зээлийн талаар цувралаар танилцуулж байгаа. Харин энэ удаад Хөгжлийн банкийг “дампууруулах дөхсөн” чанаргүй зээлдэгчдийн тайлбарыг хүргэж байна.

“ЭНСАДА ИСТЕРН” ХХК: Барьцаа хөрөнгөөрөө Хөгжлийн банкнаас авсан зээлээ дарна

Монгол Улсын Хөгжлийн банкнаас 2018 онд “Энсада Истерн” ХХК-д 26.8 тэрбум төгрөгийг зээл олгосон байдаг. Гэсэн ч “Энсада Истерн” ХХК-иас авсан зээлдээ ногдох хүүг төлөхгүй байсаар өдгөө өр хуримтлагдаж, “Энсада Истерн” ХХК-ийн нэр дээр 34.5 тэрбум төгрөгийн зээл “Чанаргүй зээл”-ийн ангилалд шилжсэн байна.

           Бид үүнтэй холбоотойгоор “Энсада Истерн” ХХК-ийн ерөнхий менежер Х.Байгальмаатай холбогдож тодруулсан юм. Тэрбээр “Энсада Истерн” ХХК 2018 онд Монгол Улсын Хөгжлийн банканд “Экспортод зориулсан гурилын үйлдвэр, гурилан бүтээгдэхүүн”-ий төслийн хүрээнд зээлийн хүсэлт гаргаж, 26.8 тэрбум төгрөгийг зээл авсан. Манай компани Хөгжлийн банкнаас зээлсэн мөнгөө зээлийн хүсэлтэд тусгасны дагуу зориулалтаар нь буюу экспортод зориулсан гурилын үйлдвэр, гурилан бүтээгдэхүүнд ашигласан. Энэ хүрээнд “Энсада Истерн” ХХК шинэ үйлдвэр ашиглалтад оруулж, 68 ажлын байр шинээр бий болгосон юм. Үүнийгээ баримтаар баталгаажуулсан.

           “Энсада Истерн” ХХК Хөгжлийн банкнаас зээл авснаасаа хойш нийт 2-3 тэрбум төгрөгийг зөвхөн зээлийн хүүнд өгсөн. Гэвч цар тахлын үед ААН-ийг үйл ажиллагаа зогсож, Хөгжлийн банкнаас авсан зээлийн эргэн төлөлтөө өгөх боломжгүй болсон. Тухайн үед нь манай компанийн зүгээс Хөгжлийн банканд мэдээлэл, албан хүсэлт хүргүүлж, зөвлөгөө хийж байв.

           Харин 2021 онд Монгол Улсын Хөгжлийн банкнаас “Энсада Истерн” ХХК-ийг шүүхэд өгч, шүүхээс манай компанийн нийт өр, алданги зэргийг тооцож гарган Хөгжлийн банкнаас зээлсэн мөнгөө барьцаа хөрөнгөөрөө болон мөнгөн дүнгээр төлж, барагдуулах шийдвэр гараад байгаа. “Энсада Истерн” ХХК Монгол Улсын Хөгжлийн банкнаас 26 тэрбум төгрөг зээлэхдээ 33 тэрбум төгрөгийн барьцаа хөрөнгө тавьсан байдаг. Харин одоо манай компаниас барьцаа хөрөнгөөрөө Хөгжлийн банкийг хохиролгүй болгох хүсэлтээ гаргаад байна” гэлээ.

“ТӨРИЙН ОРОН СУУЦНЫ КОРПОРАЦИ” ТӨҮГ: Хөгжлийн банкнаас авсан зээлийн талаар мэдэхгүй

           “Төрийн орон сууцны корпораци” ТӨҮГ нь 2015 онд  “Шинэ яармаг” орон сууцны хорооллыг барихаар Монгол Улсын Хөгжлийн банкнаас 142 тэрбум төгрөг зээлсэн. Гэвч “Төрийн орон сууцны корпораци”-ийн авсан зээлийн хугацаа 56 сараар хэтэрч, 2020 онд Улсын дээд шүүхэд шилжсэн байдаг.

           Бид “Төрийн орон сууцны корпораци” ТӨҮГ-ын Монгол Улсын Хөгжлийн банкнаас авсан зээл, зээлийн эргэн төлөлттэй холбоотой мэдээлэл авахаар тус газрын хэвлэлийн төлөөлөгч н.Энхцэцэгтэй холбогдоход “Манайх гар утсаар мэдээлэл өгдөггүй” гэв. Улмаар тус газрын нягтлан бодогч н.Нямдуламтай холбогдоход “Хөгжлийн банкнаас авсан зээлийн талаар мэдэхгүй” гэсэн хариулт өгсөн юм.

“МОНГОЛ ЭМ ИМПЕКС КОНЦЕРН” ХХК: Хөгжлийн банкнаас авсан зээлээ бүрэн төлж, барагдуулсан

           Монгол Улсын Хөгжлийн банкнаас 2018 оны гуравдугаар сард “Монгол эм импекс концерн” ХХК-д 7.2 тэрбум төгрөгийн зээл олгосон. Тэгвэл Хөгжлийн банкнаас өнгөрсөн сард гаргасан мэдээллээр тус компанийн зээлсэн 7.2 тэрбум төгрөгийн зээлийн үлдэгдэл 4.6 тэрбум төгрөг “Чанаргүй зээл” ангилалд шилжсэн юм.

           Бид энэ талаар “Монгол эм импекс концерн” ХХК Маркетингийн албаны дарга А.Наранчимэгээс тодруулав. Тэрбээр “Манай компаниас албан ёсны цахим хуудастаа Хөгжлийн банкны зээлтэй холбоотой мэдээллийг цаг тухай бүрд нь мэдээлж ирсэн. Графикын дагуу “Монгол эм импекс концерн” ХХК Монгол Улсын Хөгжлийн банкнаас зээлсэн мөнгөө 2023 оны нэгдүгээр сарын 8-нд төлж, дуусгах ёстой байсан. Гэвч сүүлийн үед Монгол Улсын Хөгжлийн банкны зээлтэй холбоотойгоор байгууллагын нэр, төр рүү халдсан сөрөг, ташаа мэдээлэл цахим сүлжээнд түгэж байсантай холбогдуулан хугацаанаас нь өмнө төлөх болсон. Улмаар энэ сарын 1-нд “Монгол эм импекс концерн” ХХК Монгол Улсын Хөгжлийн банкнаас зээлсэн мөнгөө бүрэн төлж, барагдуулсан” гэв.