АHUNA буюу Э.Ууганбаяр: Миний дуу хэн нэгнийг тэвэрч байгаа юм шиг мэдрэмж өгөөсэй гэж хүсдэг

О. Эрдэнэтунгалаг:
Гэрэлт ирээдүй- Түүчээ

2023-02-07, 1446

Өвөрмөц дүрс бичлэг, сонсголонтой хоолойгоороо сонсогчдын дуртай “Хайр гаргийн охин” дуугаараа олны танил болсон залуу уран бүтээлч Ahuna буюу Э.Ууганбаяртай ярилцлаа. Багаасаа дуучин болохыг хүссэн тэрбээр өдгөө 19 настай бөгөөд анхны цомгоо гаргахаар хичээнгүйлэн ажиллаж байгаа аж.

-Танд энэ өдрийн мэнд хүргэе. Таны тайзны нэр их өвөрмөц шүү дээ. Ahuna нэрийг хэрхэн өгсөн бэ?

-Миний тайзны нэрийг ээж минь өгсөн юм. Ээждээ уран бүтээл хийх хүсэл, сонирхолтой байгаагаа хэлээд уран бүтээлчийн хувиар ашиглах нэрийн талаар ярилцсан. Утгын хувьд саран дээр байдаг уул болон зөвхөн монголд байдаг шувууны нэр юм билээ.

-Яагаад дуучин болохоор шийдсэн бэ. Анхны уран бүтээлийнхээ талаар ярихгүй юу?

-Ер багаасаа л дуу хөгжимд дуртай хүүхэд байлаа. 17 настайгаасаа дуу хийх гэж оролдож эхэлсэн дээ. Анхны уран бүтээлээ долоо хоногийн дотор зохичихсон. Гэхдээ студид дуу бичүүлэх мөнгөө ажил хийж цуглуулсан учраас дуугаа бичүүлэх гэж бага зэрэг хугацаа орсон.

-“Хайр гаргийн охин” дуугаар нь сонсогчид сайн танина шүү дээ. Тус дууны талаар ярихгүй юу?

-Энэ дууг олон нийтэд хүргэхээсээ өмнө “love planet” буюу “Хайр гариг” гэсэн цомгийн ажил эхлүүлчихсэн байсан. Тэгээд цомогтоо зориулж тус дууг бичсэн дээ. Аян дээрээ нэг өдрийн дотор шүлгийг нь бичсэн. Тус хурдан хийгдэж бэлэн болсон ч гэсэн олон нийтэд хүрэхийн тулд нэг жил хадгалагдсан.

-Тус дуу гарсан даруйдаа олны анхааралд орж, хит болсон шүү дээ. Хүмүүсийн хариу үйлдэл эерэг байгааг харах ямар байсан бэ?

-“Хайр гаргийн охин” дууг хит болно гэж огт төсөөлөөгүй. Анх удаа цахим сүлжээнд уран бүтээлээ гаргаж байгаа шүү дээ. Гэтэл хүмүүс эергээр хүлээж авч, хит болж байгааг харах үнэхээр сайхан байсан.

-Урлагийн чиглэлээр суралцдаг уу. Хичээл уран бүтээл хоёрыг хэрхэн зохицуулдаг вэ?

-Би урлагийн чиглэлээр сураагүй ээ. Маркетинг менежментээр суралцаж байгаа. Аль алныг нь орхигдолгүйгээр авч явахыг хичээдэг. Өнгөрсөн жил эрүүл мэндийн асуудлаас болоод уран бүтээл төдийлөн хийж чадаагүй. Тиймээс энэ жил сургуулиасаа чөлөө аваад бэлэн болсон уран бүтээлүүдээ сонсогчдодоо хүргэнэ.

-Тэгэхээр бэлэн болсон уран бүтээлүүд олон байгаа юм уу. Одоогоор хэдэн дууны шүлэг дээр ажилласан байна вэ?

-Миний олон нийтэд хүргэсэн дуу цөөхөн байх. Бэлэн болсон дуу олон бий. Тэр дунд гаргах, гаргахгүй дуу хэд хэд бий. Эхэлсэн цагаасаа бүх дууныхаа шүлгийг өөрөө бичсэн.

-Үлгэр дуурайлал авдаг уран бүтээл байгаа юу?

-Үлгэр жишээ болсон уран бүтээлчид олон бий. Өдөр тутамдаа дэлхий дахинд гарсан шинэ уран бүтээлүүдийг сонсож, цаг үетэйгээ хөл нийлүүлэн алхахыг хичээдэг дээ.

-Залуу уран бүтээлчид олон болсон шүү дээ. Бусад дуучдаас ялгарах таны онцлог юу вэ?

-Миний бодол, бичсэн үгс намайг илтгэдэг нь бусдаас ялгарах онцлог байх. Үеийн залуу уран бүтээлчдэдээ үнэхээр дуртай, тэднээр бахархдаг. Бид бүгд тус тусдаа оршихуй, бүгд өөрсдийн шийдлээр уран бүтээлээ гаргаж, түүгээрээ онцгойрдог.

-Дуу хөгжим таны хувьд юу вэ?

-Дуу хөгжмийг хүмүүс олон талаар нь хардаг, мэдэрдэг байх. Миний хувьд намайг илэрхийлэх зүйл, салшгүй нэг хэсэг юм даа.

-Олны танил болсны дараа сайн, муу хандалт олон ирсэн байх. Тэр бүрийг хэрхэн хүлээж авсан бэ?

-Магтаал, шүүмжийг дотортой, тэвчээртэй, ухаантай хүлээж авахыг хичээдэг. Ал алиныг нь уран бүтээлч хүн хэт тусгаж аваад байвал нэг хайрцагт орчих юм шиг санагддаг. Би гаргахыг хүссэн хөгжмөө бүтээнэ шүү дээ. Гэтэл нэг хүн ирээд хийж байгаа зүйлийг минь шүүмжилж, магтахад нь тухайн хүний үзэл бодолт тааруулан өөрчилбөл тэр хүний хайрцагт орчихсон байна гэсэн үг шүү дээ.

-Дуугаа хэрхэн дүрсжүүлдэг вэ. Продакшнтай хамтарч ажилладаг уу?

-Өмнө нь “Xposes” продакшнтай хамтарч ажилладаг байсан. Хэд хэдэн уран бүтээл дээр хамтарч ажилласан. Одоо бол уран бүтээлч “Nene”- тэй хамт “Afterland Records” продакшнд харьяалагдаж байгаа. Продюсертойгоо хамтран энэ жил олон уран бүтээл гаргаж ажиллахаар төлөвлөөд байгаа.

-Сонсогчидтойгоо уулзсан анхны тайз нь хэзээ байсан бэ. Тайзан дээрээс авсан мэдрэмж ямар байсан бэ?

-Анх Digital Nation шоуны тайзан дээр гарч байлаа. Тухайн үедээ их сандарч байснаа санадаг юм. Тэгээд тайзан дээр байх үедээ тайвширчихсан. Ямар ч тайзан дээр гарч уран бүтээлээ хүргэхдээ баяртай байдаг. Хийсэн уран бүтээлээ хүмүүст хүргэнэ гэдэг гайхалтай шүү дээ.

-Уран бүтээлээрээ дамжуулж сонсогчдодоо ямар мэдрэмж өгөхийг хүсдэг вэ?

-Дуу минь хэн нэгнийг тэвэрч байгаа юм шиг мэдрэмж өгч байгаасай гэж хүсдэг. Хэн нэгэнд хэлж чадаагүй үгээ дууны үгээр минь дамжуулан хэлдэг байгаасай.

-Ирээдүйн зорилго, төлөвлөгөөнөөсөө хуваалцахгүй юу?

-Удаан төлөвлөсөн “Love Planet” цомгоо бодож, зорьсон шигээ гаргамаар байна. Хийнэ гэж ярих бус хийж дууссан уран бүтээлээрээ сонсогчидтойгоо уулзахыг хичээж байгаа. Үргэлж намайг хүлээж, хайрлаж байдаг хүмүүстээ баярлалаа.

-Ярилцлага өгсөн танд баярлалаа.

АHUNA буюу Э.Ууганбаяр: Миний дуу хэн нэгнийг тэвэрч байгаа юм шиг мэдрэмж өгөөсэй гэж хүсдэг

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 4

Сэтгэгдэл үлдээсэн: 2023-02-13 18:48:25

tsetseg: Amjilt
Сэтгэгдэл үлдээсэн: 2023-02-08 10:52:21

Bayraa: Nziin mini xuu bn shdee.eej ni bas medremjtei goyo duuldag shuu.uran buteeliin undur amjilt xusii.bidnii baxarxal bolj bn shuudee
Сэтгэгдэл үлдээсэн: 2023-02-07 19:32:41

[email protected]: Goe
Сэтгэгдэл үлдээсэн: 2023-02-07 19:15:28

Enerel: Hamaatnii ahiigaa ingej aldartai mundag ywj bgaag haraad mash ih baharhaj bn