Нийслэлийн Засаг дарга Д.Сумъяабазар болон нийслэлийн удирдлагын баг “ Нээлттэй Улаанбаатар” хэвлэлийн хурлыг тогтмол зохион байгуулж байгаа билээ. Тэгвэл өнөөдөр тус хурлаар өвөлжилтийн бэлтгэл болон Улаанбаатар хотыг 2040 он хүртэл хөгжүүлэх мастер төлөвлөгөө болон цаг үеийн асуудлаар мэдээлэл хийлээ. 

     Тус хуралдаанаар Улаанбаатар хотыг 2020 он хүртэл хөгжүүлэх ерөнхий төлөвлөгөөний биелэлт хангалтгүй байсныг хотын дарга онцолсон бөгөөд 2040 он хүртэлх ерөнхий төлөвлөгөөг сайтар боловсруулах шаардлагатайг дурдлаа.

        Хөгжлийн ерөнхий төлөвлөгөө боловсруулах ажлийн хүрээнд есдүгээр сарын 29-нөөс аравдугаар сарын 29 хүртэл сарын хугацаанд иргэдээс санал авах бөгөөд иргэд, олон нийт https://ulaanbaatar2040.mn/  вэб хуудас, "Улаанбаатар 2040" Facebook, twitter, Instagram, YouTube зэрэг олон нийтийн цахим сүлжээний хэрэгслүүд болон харьяа хороогоор дамжуулан Хөгжлийн ерөнхий төлөвлөгөөний төслийн талаарх мэдээллийг авч, саналаа өгөх боломжтой. 

    Мөн Улаанбаатар хот түүхэндээ зургаан удаа хөгжлийн ерөнхий төлөвлөгөө боловсруулсан бөгөөд Улаанбаатар хотыг хөгжүүлэх шинжлэх ухааны үндэслэлтэй, урт хугацааны анхдугаар хөгжлийн ерөнхий төлөвлөгөөг 1954 онд ЗХУ-ын мэргэжилтнүүд хийж гүйцэтгэсэн бөгөөд үүнээс хойш 1961, 1976, 1986, 2002, 2013 онд хөгжлийн ерөнхий төлөвлөгөөг боловсруулжээ

М.Жавхлан