Орон Сууц Нийтийн Аж Ахуйн Удирдах Газраас 2021-2022 оны өвлийн бэлтгэл ажилд 168 Ус дулаан дамжуулан төв, 360 Бага чадлын ус дулаан дамжуулах төвийн хоёрдугаар хэлхээний 1910 орон сууцны байр, 405 амины орон сууцны 103546 өрх, 65 сургууль, 117 цэцэрлэгийн шугам сүлжээний дүүргэлтийн ажлыг хийж гүйцэтгэж байна.

2021-2022 оны өвлийн халаалт залгалтын ажлыг төлөвлөгөөний дагуу энэ сарын 14-нөөс Сонгинохайрхан, Баянгол, Хан-Уул, Чингэлтэй дүүрэг орчмын хэрэглэгчдийн халаалтыг залгаж, 15-нд Баянзүрх, Сүхбаатар, Чингэлтэй дүүргийн хэрэглэгчдийн халаалтыг залгажээ.  Орон Сууц Нийтийн Аж Ахуйн Удирдах Газраас өөрийн хөрөнгө оруулалтаар их засварт 5.3 тэрбум, урсгал засварт 2.4 тэрбум төгрөг төлөвлөж, 2020 онд батлуулсан бөгөөд их засварын 28 ажлаас 25, урсгалын засварын 36 ажлаас 31-ийг нь бүрэн хийж дуусаад байгаа юм байна.

Эрчим хүч хэмнэх зорилгоор 60 ялтсан дулаан солилцуур шинээр суурилуулж, хэрэгцээний халуун усны 24 насос нэмж тоноглон, 127 километр урт ариутгах шугам, 5000 орчим худгийг лайдаж, 298 худгийн тагийг шинэчлэн сольж, халаалтын 490, хэрэглээний халуун усны 483 ялтсан дулаан солилцуурыг угааж, дулаан дамжуулалт сайжруулах шахалт хийж, халаалт залгажээ.

Орон Сууц Нийтийн Аж Ахуйн Удирдах Газраас инженерийн шугам сүлжээний засварын ажлын явцад авто зам, явган хүний зам талбайг нөхөн сэргээх ажлыг “Улаанбаатар зам арчлалтын газар”-тай гэрээ хийж гүйцэтгүүлэн нийт 811.46 метр квадрат талбайг нөхөн сэргээсэн юм. Орон Сууц Нийтийн Аж Ахуйн Удирдах Газар нь нийслэлийн 344 Сууц өмчлөгчдийн холбоотой хамтран ажилладаг бөгөөд дундын өмчлөлийн 240 засварын ажлын 80 хувийг нь гүйцэтгэжээ. Харин 254 өрхийн 1069 метр урт халаалтын шугам, 772 метр урт хэрэгцээний халуун усны шугам солих засварын ажил 81 гүйцэтгэл байгаа юм байна.