Нийслэлийн хот тохижилтын газрын талбайн чиглүүлэгчээр ажилладаг Б.Мягмарсүрэн ажлаа хийж байхдаа тракторт дайруулж, гурван удаа хагалгаанд оржээ. Түүнийг эмнэлэгт эмчлүүлж байхад ХАБ-ын мэргэжилтэн нь түүнийг согтуу байсан, осолд орох үедээ ажлын талбай дээр байгаагүй зэрэг худал мэдүүлэг өгсөн байна. Тухайн үед юу болсон талаар Б.Мягмарсүрэнгээс тодрууллаа.

-Та хэдэн сард осолд орсон бэ. Тухайн үед юу болсон талаар ярьж өгөөч?

      -Би Нийслэлийн хот тохижилтын газар талбайн чиглүүлэгчээр 13 жил ажилласан. Өнгөрсөн оны арванхоёрдугаар сарын 2-нд ажлын талбай дээр ажил үүргээ гүйцэтгэж байхдаа гинжин тракторт дайруулж, хүнд бэртсэн. Түүний улмаас дөрөв дэх удаагаа мэс засалд орохоор хүлээж байгаа. Тухайн өдөр би Улаанчулуутын хогийн цэг дээр ажиллаж байсан. Цайны цагийн үед тус осол болсон. Харин ослын талаар ХАБ-ын мэргэжилтэн Цэвэлсүрэн намайг “Осолд орох үедээ ажлын талбай дээр байгаагүй. Архи уудаг учир тухайн үедээ согтуу байсан” зэрэг худал мэдүүлэг цагдаад өгсөн байсан. Харин цагдаа нар надаас мэдүүлэг аваагүй. Би өөрөө очиж учир байдлыг тайлбарлаж хэлсэн. Мөн намайг дайрсан Бэгзсүрэн өнөөдрийг хүртэл ажлаа хийж байгаа.

-Нийслэлийн хот тохижилтын газраас танд ямар тусламж үзүүлсэн бэ?

     -Манай захирал гурван сая төгрөгийн буцалтгүй тусламж үзүүлсэн. Би дөрөвдүгээр сараас хойш ямар ч нөхөн төлбөр ажлаасаа аваагүй. Хөдөлмөрийн чадваргүй болсон учраас ямар ч мөнгө олох боломжгүй байна. Би дөрөвдүгээр сар хүртэл эмнэлэгт хэвтэн эмчлүүлсэн.

-Та хэдүүлээ, хаана амьдардаг вэ?

    -Би айлын хашаанд ахынхаа гэрт охинтойгоо амьдардаг. Цалингийн зээлтэй учир амьдрахад хэцүү байна. Хөл минь эдгээгүй ч гэлээ тэмцэж босоод өөрийнхөө төлөө ажлуудаа хөөцөлдөж байгаа. Миний талаар худал мэдүүлэг өгсөн Цэвэлсүрэн, намайг дайрч, хөдөлмөрийн чадваргүй болгосон жолооч хоёрт их гомдолтой байна.

-Таны хөл хэдий хугацаанд бүрэн эдгэнэ гэсэн бэ?

   -Хөлөө эдгээхгүй яваад байгаа учир эдээлж, шархалсан байна. Шархаа хүндрүүлсэн байна гэж эмч хэлсэн. Би одоо суга таягтай явдаг. Гам сайн барих юм бол 2-3 жилийн дараа бүрэн эдгэрнэ гэсэн. Харин эдгэхээс нь өмнө яваад байх юм бол суугаа ч болж мэднэ гэж анхааруулсан. Гэлээ ч өөрийнхөө төлөө худал мэдүүлэг өгсөн хүмүүсийн эсрэг тэмцэхгүй бол болохгүй байна.