Улаанбаатар төмөр зам түрээслэгчидтэйгээ харилцан тохиролгүйгээр түрээсийн гэрээний төлбөрөө нэмсэн асуудлаар “Сауд гэйт” ХХК  компанийн захирал Б.Батболд мэдээлэл өглөө.

Тэрбээр “Манай компани Дорноговь аймгийн Замын-Үүд суманд нурмаг ачааны гаалийн  хяналтын бүсийн үйл ажиллагаа явуулдаг. Нурмаг ачаа буюу вагоноор ирсэн нүүрсийг автомашинд шилжүүлэн ачдаг. Анх УБТЗ-аас "Ашигладаггүй талбай дээр хөрөнгө оруулаач" гэсэн хүсэлт тавьсан. Ингэж түрээсийн гэрээ байгуулсан. Анх хэлэхдээ түрээсийн гэрээгээ 10 жилээр байгуулна гэхдээ Замын даргын эрх мэдлийн хүрээнд гурван жилээр нь сунгаж ажиллана гэж хэлсэн. Тиймээс манай компани одоо ашиглаж байгаа талбайдаа 2.3 тэрбумын хөрөнгө оруулалт хийсэн. Бид өдөр тутам гаалийн байгууллагатай хамтран ажиллаж, мэдээлэл өгдөг. Бид нэг жилийн хугацаанд бүтээн байгуулалт хийсэн. Ингээд 2019 онд Эрээн хотод цар тахал илэрсэн учир Замын-Үүд боомтыг хаасан. Түүнээс хойш хоёр жилийн хугацаанд автын гарц бол бүрэн хаалттай байлаа. Бид цар тахлын хугацаанд түрээсээ төлж, ажилчдаа цомтгоогүй үйл ажиллагаагаа явуулсан учир 2021 оны жилийн эцсийн тайлангаар 1.7 тэрбумын үйл ажиллагааны алдагдалтай гарсан. Цар тахлын нөхцөл байдал намжиж, үйл ажиллагаа хэвийн болгож, түрээсээ сунгахаар бэлдэж байтал 2021 оны арванхоёрдугаар сард  УБТЗ-аас тарифын үнэлгээгээ өссөн, танай түрээсэлж байгаа талбайн үнэлгээ 14000 хувиар нэмэгдсэн гэсэн албан бичиг ирсэн. Уг нь гэрээн дээр хоёр талаас харилцан тохиролцож байж үнийг дүнд өөрчлөлт оруулна гэсэн заалт бий. Нэмэгдсэн үнээр манай компани үйл ажиллагаа явуулах боломжгүй гэсэн албан бичиг явуулахад  үнийг 4000 мянган хувиар өсгөх хариу ирсэн. Бид УБТЗ-аас тарифын өссөн үнээсээ тодорхой хэмжээний хөнгөлөлт үзүүлээд, дахин гурван жилийн хугацаа олгооч энэ хугацаанд хөрөнгө оруулалтынхаа алдагдлын нөхөөд гарья гэсэн хүсэлт тавьж байгаа. Бид нийт дөрвөн тэрбум төгрөгийн алдагдалтай байна.Манайх бусад түрээслэгчдээс ганцаараа автомашинд ачиж тээвэрлэдгээрээ онцлог. Өнгөрсөн нэгдэх өдөр Замын-Үүдийн талбай дээр гүйцэтгэх үйл ажиллагаа явуулсан. Бид Засгийн газраас мөн алдагдсан боломжийг маань олгож өгөөсэй гэж хүсэж байгаа” гэв.