21 аймгийн барилга хот байгуулалтын газрын дарга нарын уулзалт Барилга хөгжлийн төвийн байранд 10:00 цагаас эхэлсэн юм. Уулзалтыг нээж тус төвийн захирал Ц.Амарсанаа өнгөрсөн хоёр жилийн хугацаанд барилгын салбар хүндхэн байсныг онцолсон. Тэрбээр “ Тээвэр ложистикоос болж барилгын материалын үнэ өсөж, үүний улмаас бүтээн байгуулалтын ажилд хүндрэл бэрхшээлүүд тулгарсан. Уг асуудлыг шийдвэрлэхээр өнгөрсөн 2021 оны арваннэгдүгээр сарын 12-нд УИХ-аас цар тахлын улмаас барилгын салбарт хүндрэл үүссэн төслүүдийн зураг төслийг дахин магадлал хийх, барилгын материалын үнийн индексийг гаргах үүргийг БХБЯ-нд үүрэг болгосон. Энэ хүрээнд бид улсын төсвийн хөрөнгө оруулалтаар хийгдэж байгаа төсөл хөтөлбөрүүдийн тоо хэмжээг нь гаргаж, үнийн нөхцөл индексийг нь гаргах зэрэг ажилд анхаарч ажиллаж байгаа. Түүнчлэн бид хоёр жил цахимаар зохион байгуулж байсан газрын харилцаа, барилга, хот байгуулалтын удирдлагуудтай хийх уулзалтаа энэ жил танхимаар зохион байгуулж, өнгөрсөн хугацааны гүйцэтгэл, асуудал, энэ ондоо хийж хэрэгжүүлэх ажлынхаа төлөвлөгөө, гүйцэтгэл, төсөл хөтөлбөрүүдийн хэрэгжилт зэрэгт анхаарч, хэлэлцэж байгаагаараа энэ удаагийн уулзалт онцлог болж байна. 2021 оны хувьд улсын төсвийн болон гадны зээл тусламж, хөрөнгө оруулалттай ажлын гүйцэтгэл 73 хувьтай хэрэгжсэн. Барилга хөгжлийн төв нь уг төсөл, хөтөлбөрүүдэд захиалагчийн хяналтыг хэрэгжүүлэн ажилладаг. Энэ хүрээнд 2021 онд улсын хэмжээнд нийт 10 эмнэлэг, 11 цэцэрлэг, 15 сургуулийн барилгад захиалагчийн хяналт хэрэгжүүлэн ашиглалтанд оруулсан байна. 2022 онд улсын хэмжээнд улсын төсвийн хөрөнгө оруулалтаар 38 цэцэрлэг, 54 сургууль, 30 эмнэлэг, 18 дотуур байр, инженерийн шугам сүлжээний 26 төсөл хэрэгжихээр төлөвлөгдсөн” гэв.

 

 

 

-БАРИЛГЫН МАТЕРИАЛЫН ҮНИЙН ӨСӨЛТИЙН АСУУДАЛ ХҮНД БАЙНА-

 

    Бид аймаг, орон нутгийн  зарим дарга нараас нөхцөл байдлыг мөн тодрууллаа. Дундговь аймгийн ГХБХБГ-ын дарга Э.Чагнаадорж “Манай Дундговь аймгийн хувьд хоёр жимлийн хугацаанд нэлээд хүнд жил байсан. Гэхдээ бид хүндрэлийг амжилттай даван туулсан. Манай аймаг 2022 онд томоохон бүтээн байгуулалтыг хийхээр төлөвлөсөн. Тухайлбал, 1000 хүний суудалтай спорт компликс барих гэж байна, мөн аймгийн төвд 960, 640 хүүхдийн сургууль зэрэг хөрөнгө оруулалт хийгдэнэ. Түүнээс гадна хот төлөвлөлт болон дэд бүтцийн ажлыг эрчимтэй явуулахаар ажиллаж байна. Одоо бол бараа материалын үнин өсөлтийн асуудал хүндрэлтэй байна. Өнөөдрийн байдлаар Сангийн яам барилгын материалын үнийн өсөлтийн асуудлыг хэлэлцэж байна” гэв.

 

-ДОРНОД АЙМАГТ ИНЖЕНЕРИЙН БҮТЦИЙН АСУУДАЛ ИХ ТУЛГАМДАЖ БАЙНА-

 

    Харин Дорнод аймгийн Газрын харилцаа, барилга хот байгуулалтын газрын хэлтсийн дарга  Х.Гүенбат орон нутгийнхаа нөхцөл байдлын талаар мэдээлэл өглөө. Тэрбээр “Аймгийн  Газрын харилцаа, барилга хот байгуулалтын газрын хэлтэс нь улсын болон орон нутгийн төсвөөр орон нутагт хэрэгжиж байгаа төсөл, үйл ажиллагаанд хяналт тавин ажилладаг. Манай аймгийн хэлтсийн хувьд 24 мянга километр явж, давтагдсан тоогоор 460 орчим хяналтын ажлыг хийж хэрэгжүүллээ. Манай аймаг улсын төсвөөр 21 төслийн арга хэмжээ одоогоор хэрэгжиж байна.  Үүнээс зургаа нь өнгөрсөн онд ашиглалтад орсон бол хоёр нь соёлын төвийн  барилга, хоёр сумын инженерийн дээд бүтэцийн барилга ашиглалтад орсон. Манай Дорнод аймаг барилгажилт ихтэй хот байдаг. Инженерийн дэд бүтцийн асуудал хамгийн их тулгамддаг” гэсэн юм.