18 НАСТАЙ ХҮҮГИЙН ХЭРГИЙН ТАЛААРХ МЭДҮҮЛЭГ ЗӨРӨӨД БАЙГАА ГЭВ

      18 настай хүү гэртээ байхдаа найзууддаа зодуулж, тархиндаа хүнд гэмтэл авч Төв аймгийн эмнэлэгт хүргэгдсэн. Тодруулбал, хүү бусдад зодуулсны улмаас шархаа даалгүй эмнэлэгт нас барсан гэх мэдээлэл гарсан. Энэ талаар ЦЕГ-ын Хэвлэл мэдээллийн төвийн мэргэжилтнээс тодруулахад “Наймдугаар сарын 25-нд мориноосоо унаж, тархиндаа хүнд гэмтэл авч, Төв аймгийн эмнэлэгт хүргэгдсэн залуу эмнэлэгт эмчилгээ хийлгэж байгаад хэдхэн хоногийн өмнө нас барсан. Талийгаач бусдад зодуулж нас бараагүй болох нь шалгалтын явцад тогтоогдсон. Харин олон нийтийн сүлжээгээр цацагдсан худал мэдээллийг тухайн аймагт лайв хийдэг иргэн олон нийтэд цацсан байсан. Тус хэргийг цагдаагийн алба хаагчид үргэлжлүүлэн шалгаж байгаа” гэсэн юм.

     Харин бусад эх сурвалжийн мэдээллээр “Талийгаач өнгөрсөн хавар Төв аймгийн Хүмүүн цогцолбор сургуулийг төгссөн. Ээжтэйгээ хоёулаа амьдардаг, айлын ганц хүү байсан. Цагдаа нарт мэдүүлэг өгч байгаа хүмүүсийн мэдүүлэг нь зөрөөд байгаа гэж сонссон. Тухайн үед нь би хамт байгаагүй болохоор юу болсныг нь сайн мэдэхгүй байна. Зарим нь ангийнхаа хүүхдүүдэд зодуулж нас барсан гэж ярьж байна лээ. Тэр нь баттай биш болохоор тодорхой мэдээлэл өгөх боломжгүй байна. Ар гэрийнхэнд нь маш хүнд байгаа” гэсэн юм.

     Дээрх хэргээс гадна сүүлийн үед нийгмийг цочирдуулж, айдаст автуулсан онц ноцтой гэмт хэргийн бодит жишээ олон нийтийн сүлжээгээр цацагдсан. Хэргийг эргэн сануулбал, 2024 оны зургадугаар сард 20 настай Ц.Дагвадорж нь 32 настай эмэгтэй болон 16 настай охиныг хэдхэн хоногийн зайтай онц хэрцгийгээр хөнөөсөн байдаг. Өөрөөр хэлбэл, 2024 оны зургадугаар сарын 8-9 шилжих шөнө З гэх 32 настай эмэгтэйг гэрт нь хөнөөж, хүнсний скочоор ороон хувцасны шүүгээнд нь хийсэн байсан гэх. Талийгаач эмэгтэйг ар гэрийнхэн нь болон хууль хяналтынхан ололгүй олон хоносон учир цогцос нь өмхийрсөн байдалтай гэрээсээ олджээ. Харин дээрх хэрэг болсноос 12 хоногийн дараа буюу 2024 оны зургадугаар сарын 21-ний шөнө Ц.Дагвадорж нь архидан согтуурсан үедээ Хан-Уул дүүргийн II хороонд оршин суух 16 настай Ш гэх охиныг онц хэрцгийгээр хөнөөж, цогцсыг нь чемоданд хийсэн байсныг цагдаагийнхан илрүүлсэн байдаг. Нийгмийг айдаст автуулсан хэргийн талаар ЦЕГ-ын Хэвлэл мэдээлэл, олон нийттэй харилцах төвийн ахлах мэргэжилтэн Г.Пүрэвдэлгэр “Чингэлтэй дүүргийн 19 дүгээр хорооны нутаг дэвсгэрт оршин суух 20 настай Ц.Дагвадорж нь Сүхбаатар дүүргийн I хорооны нутаг дэвсгэрт 2024 оны зургадугаар сарын 8-9 нд шилжих шөнө 32 настай З-г хөнөөсөн. Мөн Хан-Уул дүүргийн II хорооны нутаг дэвсгэрт мөн сарын 20-21-нд шилжих шөнө 16 настай эмэгтэй Ш-ийн амийг онц хэрцгийгээр хохироосон болох нь мөрдөн шалгах ажиллагаагаар тогтоогдсон. Тиймээс цагдаагийн байгууллагынхан дээрх хэргийг үргэлжлүүлэн шалгаж байна. Дээрх хэргүүдийн нөхцөл байдлаас шалтгаалан гэмт хэргийг шуурхай, бүрэн гүйцэт шалгах, нотлох баримтуудыг баталгаажуулах зорилгоор ЦЕГ-ын Тэргүүн дэд даргын ажлын хэсэг байгуулах тушаалаар Эрүүгийн цагдаагийн алба, Мөрдөн байцаах алба, Хан-Уул, Сүхбаатар дүүргийн Цагдаагийн хэлтсийн алба хаагчдаас бүрдсэн ажлын хэсэг байгуулан мөрдөн шалгах ажиллагааг үргэлжлүүлж байна” гэсэн юм.

    Мөн өчигдөр Сүхбаатарын талбай дээр зул өргөх үеэр “Gem mall” худалдааны төвд хутгалуулж, нас барсан эмэгтэйн ээж оролцохоо мэдэгдэж, өөрийн байр сууриа илэрхийлсэн. Ингэхдээ “Нөхрийнхөө гарт харгис хэрцгийгээр олон удаа хутгалуулж, амиа алдсан хайртай охины минь шүүх хурал энэ сарын 17-нд болно. “Авраарай, туслаарай” гээд амь тэмцэж байхад нь ойрхон байсан хүмүүс тусалж аврахын оронд жүжиг үзэж байгаа мэт гар утсаараа бичлэг хийгээд зогсож байсан гэж бодохоор үнэхээр их харамсдаг. Хэрвээ охиныг минь аврах гэж оролдсон бол охин минь амь мултран үлдэх байсан байх гэж аав, ээж нь өдөр, шөнөгүй харуусан сууна. Үзэсгэлэнтэй охиныхоо төлөө аав, ээж нь эцсээ хүртэл, амьсгалаа тасартал явах болно” гэсэн байдаг.