“Шинэ сэргэлтийн бодлогын хэрэгжилтийг орон нутагт эрчимжүүлэх нь” нэгдсэн зөвлөгөөнд Боловсрол, шинжлэх ухааны сайд Л.Энх-Амгалан оролцож салбарын мэдээллийг орон нутгийн удирдлагуудад өгчээ.

 

  Мөн энэ үеэр аймаг, нийслэлийн Засаг дарга нартай 2021 онд байгуулсан гэрээг дүгнэсэн ба боловсролын салбарын хэрэгжүүлэх зорилт, үйл ажиллагааг орон нутагт төлөөлөн хэрэгжүүлэхэд гарсан ололт амжилтыг онцолжээ.

 

  Гэрээний биелэлтийг 100 оноогоор дүгнэвэл аймгууд 53.3-94.1 хувьтай үнэлэгджээ. Дундаж онооны зөрүү 40 хүртэл буюу их байгаа нь аймаг, нийслэлийн ажил харилцан адилгүй ялгаатай байгааг харуулж байна. Дархан-Уул аймаг, Улаанбаатар хот, Дундговь, Хэнтий, Завхан 90-ээс дээш оноогоор, Баянхонгор, Баян-Өлгий аймаг 50 гаруй оноогоор, бусад аймгууд 70-89 оноогоор үнэлэгдсэн.

 

  Боловсрол, шинжлэх ухааны сайд Л.Энх-Амгалан хэлэхдээ “Насан туршийн боловсролын үйл ажиллагааг дэмжих болон хөгжлийн бэрхшээлтэй иргэдийг боловсролд тэгш хамруулах чиглэлээр тодорхой үр дүнтэй ажил хийгдээгүй. Тиймээс орон нутгийн зүгээс багш, удирдах ажилтныг тогтвор суурьшилтай ажиллуулах, тэдэнд орон сууц болон бусад дэмжлэг үзүүлэх талаар үр дүнд хүрсэн ажлууд аймаг, нийслэлийн аль алинд нь хийгдээгүй байгаад анхаарч ажиллах нь зүйтэй юм. Мөн өмнөх жилүүдийн хамтын ажиллагаанд зөв дүгнэлт хийх нь энэ жилийн хамтын ажиллагааг илүү сайжруулахад чухал нөлөө үзүүлэх ач холболтой” гэжээ.

 

Эх сурвалж: Боловсрол, шинжлэх ухааны яам