Хүндийн өргөлтийн ОУХМ Отгонбаярын Дархижавтай ярилцлаа. Тэрбээр 2019 онд залуучуудын ДАШТ-ээс 71 кг-ын жинд огцом өргөлтөөр хүрэл медальтай хүртэж байв. Мөн 2022 онд насанд хүрэгчдийн Ази тивийн аварга шалгаруулах тэмцээнээс 76 кг-ын жинд огцом өргөлтөөр мөнгөн медаль хүртэж байв. 2018 онд Тайландын эзэн хааны цомын тэмцээнээс 69 кг-ын жинд огцом өргөлтөөр алтан медаль хүртэж байсан манай улсын нэгэн цаг үеийн шилдэг хүндийн өргөлтийн мастеруудын нэг юм.

–Манай уншигчдад өөрийгөө танилцуулахгүй юу?

       -Сайн байна уу. Намайг Отгонбаярын Дархижав гэдэг.

 –Аль нутгийн хүүхэд вэ?

      -Би “Унаган” Улаанбаатар хотын хүүхэд. Харин аав, ээж маань Завхан аймгийн гаралтай хүмүүс байдаг. Тийм болохоор би аав, ээжийнхээ нутгаар Завханынх гэж явдаг.

-Одоо хэдэн настай вэ?

      -Одоо би 25 настай. 2000 онд Улаанбаатар хотод төрсөн.

-Хүндийн өргөлтийн спортын ямар зэрэг , цолтой тамирчин бэ?

      -Хүндийн өргөлтийн спортын ОУХМ цолтой. Биеийн тамир, спортын “Тэргүүний ажилтан”.

-Хэдэн настайдаа хүндийн өргөлтөөр хичээллэж эхэлсэн бэ?

      -Анх 13 настай байх үедээ хүндийн өргөлтийн спортоор хичээллэж эхэлсэн.

–Хүндийн өргөлтөөс өмнө өөр спортын төрлөөр хичээллэж байсан уу?

      -Хүндийн өргөлтөөс өөр спортын төрлөөр хичээллэх гэж үзсэн. Гэхдээ надад таарч, тохирохгүй ч байсан гэх юм уу. Өөрөө үргэлжлүүлэн бэлтгэл хийх сонирхолгүй байсан болохоор больсон. Дунд сургуулийн тамирын багш нар чөлөөт бөхийн тэмцээнүүдэд оруулах их дуртай байлаа. Би харин жудо бөхөөр барилдах гэж оролдож үзээд больсон.

 –Анх яагаад хүндийн өргөлтийн спортыг сонгож хичээллэх болсон юм бэ?

     -Анх энэ спортын тухай ямар ч ойлголтгүй байсан. Монголд хүнд төмөр өргөдөг хүмүүс байдаг гэдгийг ч мэдээгүй. Тохиолдлоор авга эгчийнхээ гэрт очсон чинь үеэл эгч маань хүндийн өргөлтийн спортоор хичээллэдэг болж таарсан.

   Эгч миний хажууд ирж зогсоод “Чи чинь ямар өндөр юм бэ. Одоо хэдэн настай билээ. Үеийнхэн дундаа биерхүү юм байна, штанг өргүүлчихье ах аа” гээд ааваас маань гуйсан. Тэгээд л эгчийгээ дагаад анх удаа хүндийн өргөлтийн зааланд хөл тавьж байлаа.  Тэгсэн чинь хүндийн өргөлтийн заалны энд, тэндгүй түс, тас гээд  хүнд төмөр шатангууд унаад л, тамирчид хөлсөө гартал бэлтгэл хийгээд, надад их сонирхолтой санагдсан.

–Хүндийн өргөлтийн спортоосоо түр хөндийрсөн үү, Хэзээ эргэн ирэх вэ?

      -Хүндийн өргөлтийн спортоос түр хөндийрөөгүй. Бүр мөсөн больсон гэж хэлж болно. Бүр мөсөн больсон гэхээр л хүнд сонсогдож байна уу.

-Одоо ямар спортын төрлөөр хичээллэж байгаа вэ?

     -Одоогоор ямар нэгэн спортоор хичээллээгүй байгаа. Гэхдээ тамирчин хүн байсны хувьд хөнгөн дасгалыг бол хийж эхэлнэ.

 –Хүндийн өргөлтийн спортоор хичээллэсэн үеэс хойших томоохон амжилтаасаа сонирхуулахгүй юу?

      -2022 онд насанд хүрэгчдийн Ази тивийн аварга шалгаруулах тэмцээний 76 кг-ын жинд огцом өргөлтөөр хүрэл медаль хүртэж байсан. 2019 оны залуучуудын ДАШТ-ий 71 кг-ын жинд огцом өргөлтөөр мөнгөн медаль хүртсэн. 2018 онд Тайландын эзэн хааны цомын тэмцээний 69 кг-ын жинд огцом өргөлтөөр алтан медаль хүртэж байв.

    Харин дотоодын тэмцээн, уралдаанаас гэвэл өсвөр үе, залуучууд, насанд хүрэгчдийн улсын аварга, Монголын бүх ард түмний спартакиадын аварга, Монголын хүүхдийг их наадмын аваргын алтан медаль хүртсэн гэх мэт амжилтуудыг гаргаж байсан

-Хүндийн өргөлтийн анхны багш нь хэн бэ?

    -Миний хүндийн өргөлтийн анхны багш маань ОУХМ Д.Чинзориг гэж хүн байдаг. Мөн багшийн минь аав Я.Дөрвөнжин багш маань хамт бэлтгэл сургуулилалт хийлгэдэг байсан. Багшийнхаа удирдлага дор бэлтгэл хийдэг байх даа дотоодын урлдаан, тэмцээний бүх амжилтыг гаргаад  Үндэсний шигшээ багт орж байсан.

-Одоо ямар клуб, нийгэмлэгт харъяалагдаж байгаа юу?

      -Одоогоор спортоор хичээллэхгүй байгаа болохоор ямар нэгэн клуб, нийгэмлэгийн харъяалалгүй энгийн хүн болсон.