УИХ-ын гишүүн асан Ц.Цэрэнпунцагийн хүү Санжаачойпэл, “Эрэл”-ийн Б.Эрдэнэбатын хүү Тэмүүлэн, “Таванбогд”-ын Ц.Баатарсайханы хүү Амарсайхан нар бүлэглэн танхайрч, мансуурсан үедээ бусдын эрүүл мэндэд ноцтой гэмтэл учруулсан хэрэгт шалгагдаж байгаа. Одоогийн байдлаар Ц.Цэрэнпунцагийн хүү Санжаачойпэл эрүүл мэндийн шалтгаанаар батлан даалтад гараад байна. Харин Б.Тэмүүлэн, Б.Алтан-Очир нар 30 хоног цагдан хоригдож байгаа юм. Түүнчлэн “Таванбогд”-ын Ц.Баатарсайханы хүү, “Говь” ХК-ийн гүйцэтгэх захирал Б.Амарсайхан хил даван зугтаж, сураггүй болоод байгаа билээ. Тэрбээр “Эхнэрийн биеийн байдал муу байна. Долдугаар сарын 28-нд буцаж ирнэ” гэсэн өргөдөл бичээд, хэрэг гардаг өдөр хилээр гарсан ч одоог хүртэл сураггүй байгаа юм. Хуулийн байгууллагаас Б.Амарсайханы гадаад паспортыг хүчингүй болгож, хилээр орж ирэхийг нь хүлээж байна.

       Хэргийг тодруулбал, долдугаар сарын 18-19-нд шилжих шөнө Сүхбаатар дүүргийн гуравдугаар хорооны нутаг дэвсгэрт үйл ажиллагаа явуулдаг “Канте” шөнийн цэнгээний газрын гадаа хохирогчийг зодож, танхайрсан байдаг. Зодуулсан хүүгийн биеийн байдал хүнд, ГССҮТ-д эмчлүүлж байгаад гадаад руу эмчилгээнд явсан билээ. Хохирогчийн нүүрний яс бутарч, нүд нь харахгүй болсон талаар ар гэрийнхэн нь мэдэгдээд байсан юм.

 Тэгвэл хохирогч залуугийн аав Д.Дашзэвэгтэй холбогдож, хүүгийнх нь биеийн байдлын талаар тодруулахад “Миний хүүгийн биеийн байдал дээрдэж байгаа. Хүү минь эдгэж байна. Бүрэн эдгэрэхэд цаг хугацаа шаардлагатай. Мэс засалд орж, амжилттай болсон. Мэс заслын эмч хэлэхдээ “Хүүгийн чинь нүдний харааг бүх боломжоороо дахин сэргээсэн” гэж хэлсэн” гэв.