Өөрийн сонирхол, мөрөөдлөө даган кино найруулагчаар ажиллаж буй залуу уран бүтээлч бол Б.Буянбат юм. Тэрбээр график, дизайны чиглэлээр  мэргэжил эзэмшсэн ч сонирхлынхоо дагуу кино найруулагчаар ажиллаж байгаа аж. Залуу уран бүтээлч Б.Буянбат “Гэгээн учрал”, “Ghost” зэрэг уран сайхны киноны найруулагчаар ажилласан. Тэгвэл тэр гурав дахь уран бүтээл болох “Снежинка” уран сайхны киногоо үзэгчдийн хүртээл болгоод удаагүй байна. Түүнтэй уран бүтээлийнх талаар цөөн хором ярилцлаа.

-Шинэхэн киногоо нээсэн танд баяр хүргэе. “Зэв” уран бүтээлийн нэгдлийг байгуулж, уран бүтээлээ турвиж байгаа юм байна. Уг нэгдлийг байгуулаад хэдэн жил болж байгаа вэ?

         -“Зэв” фильм нь сургуулиа төгсөөд удаагүй залуу уран бүтээлчдийн нэгдэл юм. Бид уг нэгдлээ байгуулаад гурван жилийн болж байна. Энэ хугацаанд  дэлгэцийн гурван уран бүтээл дээр ажиллаж, үзэгчдийн хүртээл болгоод байна. “Гэгээн учрал”, “Ghost” уран сайхны кинон дээр ажилласан. Сая “Снежинка” уран сайхны кино нээлтээ хийлээ.

-Та график дизайны мэргэжлээр суралцсан юм билээ. Яагаад кино урлагийн салбар руу урван орох болов?

       -Аав минь зураач. Тиймдээ ч би багаасаа зурах дуртай байв. Аавыгаа дурайгаад зургийн хэрэгсэл дэлгээд суудаг хүүхэд байсан. Арван жилдээ зураг зурж, сийлбэр хийдэг байлаа. Ингээд Шинжлэх ухаан технологийн их сургуулийн  график дизайны ангид элсэн орсон. Тэнд суралцах хугацаандаа компьютер графикийн талаар чамгүй мэдлэгтэй болсон. Гэхдээ багаасаа хүсэж, мөрөөдсөн зүйл бол урлагийн хүн болох байв. Ингээд киноны арын албанд ажиллаж, өөрийн гэсэн уран бүтээлтэй болох зорилго тавьсан даа.

-Ямар киноны арын албанд ажилласан юм бэ?

       -Миний хувьд хамгийн анх “37-р точка” уран сайхны киноны арын албанд ажиллаж байсан. Өмнө дууны клип, зар сурталчилгааны найруулга дээр ажилладаг байлаа. Уг кинонд ажилласнаараа баг хамт олон гэж юу байдаг, хэрхэн хамтарч ажилладаг гэдгийг  сурсан. Миний хувьд хамгийн том сургууль болсон. “37-р точка” кино бол миний кино урлагт дурлах болсон анхны алхам. Сайн багтай ажилласан болохоор дараагийн уран бүтээлээ хийхэд  минь том түлхэц болсон.

Сайн багтай ажилласан болохоор дараагийн уран бүтээлээ хийхэд  минь том түлхэц болсон.

-Таны ямар төрлийн кино үзэх дуртай вэ?

           -Ер нь уянгын, романтик кино үзэх дуртай.

-Бахархаж, үлгэр жишээ  явдаг уран бүтээлч бий юү?

    -Б.Гарамханд найруулагч маш сайн зөвлөж, тусалдаг мундаг хүн. “Фантастик” продакшны найруулагч, жүжигчин Б.Тамир ахаас найруулагчийн ур чадварын талаар суралцсан. Киноны баг хамт олноо хэрхэн  удирдан чиглүүлж ажиллах, харилцаа хандлага хэр чухал болохыг түүнээс л сурсан. Маш сайн удирдагч, маш сайн найруулагч гэж боддог.

-“Снежинка” уран сайхны киноны найруулга дээр хэрхэн ажилласан бэ?

          -“Снежинка” уран сайхны кино өнгөрсөн, ирээдүй цагийг харуулдаг. Өнгөрсөн бол дурсамж, ирээдүй боломж гэдэг санааг гаргаж өгсөн. “Цаг хугацаагаар аялах боломж байвал ямар гоё вэ” ийм боломж байхгүй ч дурсамж дотор чинь бүх зүйл байгаа шүү гэдгийг илэрхийлсэн. Яг энэ цаг хугацааг гаргаж өгөхийн тулд 1990 он болон 2000 оныг харьцуулсан. Энэ киног үзсэн хүн бүр өнгөрсөн дурсамжаа дахин нэг санагалзаж, алдсан оносон зүйлээ тунгааж, ирээдүйд ирэх боломжоо хараасай гэх бодсон.

-“Снежинка” киноны зураг авалт хэр хугацаанд үргэлжилсэн бэ?

         -Кино нэг жилийн дараа бэлэн боллоо. Өнгөрсөн жилийн яг энэ үед кино зураг авалтын ажил эхэлж байлаа. Яг жилийн ой дээрээ нээлтээ хийсэн дээ.

-Танай баг хамт олон одоо ямар уран бүтээл дээр ажиллаж байгаа вэ?

        -Манай баг “Мад” нэртэй уран сайхны кинон дээр ажиллаж байгаа.

 -Ярилцсанд баярлалаа.

         -Баярлалаа.

Б.ЭНХЖАРГАЛ