Ардчилсан намын Үндэсний бодлогын хороо хоёр өдөр хуралдсан ч намынхаа Ерөнхий нарийн бичгийн даргыг, дэд дарга нартайгаа тодруулж чадалгүй тарлаа. Ардчилсан намд шинэ манлайлагч төрнө гэдэг амаргүй л дээ. Тэр тусмаа хүчээр авах гэж үзвэл бүүр ч эвгүйднэ. Намын даргаар сонгогдоод удаагүй О.Цогтгэрэл үүнийг өнгөрсөн баасан гарагт болсон хурлын үеэр  тод харуулав. 

      Өөрөөр хэлбэл, өнгөрсөн сард Ардчилсан намын дотоод сонгуулиа зохион байгуулж, Үндэсний бодлогын хорооны гишүүдээ, намын шат шатны дарга нараа сонгох ажлыг зохион байгуулсан. Улмаар намын дүрмийн дагуу Ерөнхий нарийн бичгийн даргаа дэд дарга нартайгаа сонгох хурлыг зохион байгуулсан ч Удирдах зөвлөлийн  гишүүдээ сонгоод генсекээ тодруулж чадалгүй хурлаа өндөрлүүлсэн нь энэ. Гол нь тэд энэ удаад дэд даргынхаа тоог цөөлж,  таван дэд дарга тодруулах байв.

         Гол нь Ардчилсан намын шинэ дарга О.Цогтгэрэл намдаа том байх гэж, өөрийн хүмүүсээр багаа бүрдүүлэх гэж хэтэрхий улайрсандаа ийн генсекээ томилж чадаагүй хурлаа дуусгаад байгааг намынхан жиг жуг гэж байна.

         Ардчилсан намын дотоод ардчилал, бичигдээгүй дүрэм нь ердөө энэ л дээ. Эрх баригч МАН-ынхан нэг удирдлагаар нэг чигтэй гар өргөн олонхын саналаар дэмжиж даргаа, дотоод удирдлагуудаа, намын бүтцээ зурдаг бол Ардчилсан намынхан хэзээнээс фракцаас төлөөллүүдээ багтааж, эв нэгдлээ хангаж ирснээр намынхандаа хүлээн зөвшөөрөгдөх дүрэмтэй явж ирсэн. Тиймээс л өнгөрсөн хугацаанд Ардчилсан намын даргаар ажилласан цөөн хэд нь лидер болж үнэлэгдээд, нэг талыг барьж, хэтэрхий улайрсан нь өнөөдөр намынхаа хурлаар ч шагайх эрхгүй болцгоосныг олон жишээ батална.

         Үнэндээ энэ дүрмээсээ хазайх гэж зүтгэсэн О.Цогтгэрэл ч тэдний араас мад тавиуллаа. Өөрөөр хэлбэл, Ардчилсан намын Үндсэний бодлогын хорооны хурлаар О.Цогтгэрэл одоогийн намын Ерөнхий нарийн бичгийн даргыг түр орлон гүйцэтгэгч Д.Амарбаясгаланг нэр дэвшүүлсэн. Гэвч Д.Амарбаясгалан 147 хүний санал авч, 153 хүн эсэргүүцснээр намынхаа гишүүдээс дэмжлэг авч чадалгүй бүдэрсэн. Улмаар дараагийн өдөр нь А.Батпүрэвийн Ерөнхий нарийн  бичгийн даргад нэр дэвшүүлэх санал гарсан ч санал хураалт явуулалгүй, Ерөнхий нарийн бичгийн даргын томилгоог нэг сарын хугацаанд хойшлуулсан.

        Хэрэвзээ хоёр дахь удаагаа санал болгосон нэр дэвшигч дахин олонхын дэмжлэг авч чадахгүй бол одоогийн намын дарга О.Цогтгэрэлийн нам доторх нөлөөлөл төдий чинээгээр буурна гэсэн үг. Тиймээс А.Батпүрэвийг санал болгосон ч санал хураалгүй хурлаа хойшлуулаад байна. А.Батпүрэвийг  санал дэвшүүлэхийн өмнө Ардчилсан намын Үндэсний бодлогын хорооны хурал нэлээд ширүүсч, С.Баярцогт, Д.Мөнх-Эрдэнэ нар О.Цогтгэрэлийн дэвшүүлсэн хүмүүсийг эсэргүүцсэн гэх. Цаашлаад өмнөх санал хураалт болсон Д.Амарсайханы саналын хүчинтэй болсон эсэх дээр ч ширүүхэн маргаан  гарсан сурагтай.

        Улмаар Төрийн ордонд тоотой үзэгдэж, чуулганы хуралдаандаа суудаггүй гэх дуулианы “бай” болоод буй УИХ-ын гишүүн Х.Баттулга Үндэсний бодлогын хорооны хурал дээр ирж суусаар эцэстээ намын генсекийн томилгоог хойшлуулсан гэх мэдээлэл бий.

      Дүрмээрээ Ардчилсан намынхан сарын дараа намынхаа генсекийн оруулж ирж, дахин хуралдана. Харин гишүүдийнх нь зүгээс намын дэд дарга, генсекийг томилохдоо фракцын төлөөллүүдиг багтаах ёстой гэсэн хатуу шаардлага тавьж байгаагаа мэдэгдсэн.

           Энэ талаар ҮБX-ын xуралдааны үеэр Сэлэнгэ аймгийн АН-ын дарга С.Баярцогт "АН ирэx сонгуулиудад ялаxын тулд эв нэгдэлтэй байx xэрэгтэй. Эв нэгдлийг xангаx гол xүчин зүйл бол бүxий л фракцуудын төлөөллийг намын удирдлагын түвшинд оруулаx ёстой. Гэтэл одоо бүxий л удирдлага нэг фракцад төвлөрлөө. О.Цогтгэрэл бол "Нэг Монгол" фракцын төлөөлөл. Ерөнxий нарийн бичгийн даргаа "Grand Монгол" фракцаас тодруулаарай гэж xэлж байсан. Энэ бол ялалтын гол суурь. Xэрэв тэгэxгүй бол зөв ч юм xийсэн буруу ч юм xийсэн шүүмжлэл иxэсдэг. Миний эсрэг сөрөг 'PR"-ыг ерөнxийлөгч асан X.Баттулгын гар xөл болсон нөxдүүд xийдэг. Үүний үр дүнд шууд яллаад шоронд xүртэл xийдэг байсан. АН-д эрүүл саруул залуучууд олноор ирсэн" хэмээн сануулсан. Тэгэхээр  сарын  дараа О.Цогтгэрэл фракцуудынхаа төлөөллөлд эрх мэдлийн бялуу хуваалтаа ижил тэнцүү хуваахгүй бол ахиад Ардчилсан намыг 10, 20 хэсэг хувааж мэднэ. Тиймээс генсекийн суудал өрсөлдөөнтэй байна.

        Тэд тохиролцооны генсек томилох уу, намынхандаа фракцыын төлөөллүүдийнхээ эрх ашгийг хангасан хүнээ генсекээр томилох уу гэдгээс Ардчилсан намынхны ирэх сонгуулийн зураглал  бүрэн харагдана гэсэн үг. Уг нь О.Цогтгэрэл Д.Амарбаясгалан гэх хамгийн ойрын хүнээс зүтгүүлсэн ч АН-ын гишүүдийнхээ ч дэмжлэггүй байлаа. Адаглаад намдаа хүлээн зөвшөөрөгдөхгүй бол Ардчилсан нам ирэх сонгуулиар ахиад хагарч болохгүй цаг хугацаанд ирчихсэн гэдгийг сануулах нь илүүц биз ээ.

         Эцэст нь, тэд Ерөнхийлөгчийн санаачилсан УИХ-ын гишүүнийг эгүүлэн татах асуудлыг хойшлуулан байж намын дотоод хурлаа хийсэн ч үр дүнд хүрсэнгүй.