Эргэлт.мн мэдээллийн сайт “Орон нутгийн сонгууль-2024”-ийг угтан аймаг, дүүргийн ИТХ-ын төлөөлөгчдийн талаарх баримтыг цувралаар хүргэж буй. Тэгвэл энэ удаагийн дугаарт Ховд аймгийн ИТХ-ын төлөөлөгч нарын төсвийн мөнгө тонож, тендер түүдэг баримтыг хүргэж байна. Улс орны хөгжлийн хамгийн анхан шатны байгууллага, орон нутгийнхаа гал тогоог хариуцах ёстой төлөөлөгч нар улс төрд ормогцоо улсын төсөв руу уралдаж, тендер түүж, бизнесээ цэцэглүүлдэг байдал газар авчээ. Ховд аймгийн ИТХ-ын төлөөлөгч нар томоохон барилгын компаниудаараа дамжуулан тендер түүсэн баримтыг хүргэе.

ИТХ-ЫН ТӨЛӨӨЛӨГЧ ГОМБОЖАВЫН  ЦЭДЭНБАЛ

Г.Цэдэнбал нь Ховд аймгийн Жаргалант сумын уугуул. 2000 онд БҮДС-ийг дүүргэж, "Газарчин" дээд сургуульд мэргэжил дээшлүүлсэн. ХААИС-ийн багш, "Хүч" нийгэмлэг, "Алтайн хүчтэн" клубийн багш, “Залаа Алтай” ХХК-ийн захирал, Ховд аймгийн Үндэсний бөхийн холбооны тэргүүн, Ховд аймгийн Биеийн тамир, спортын газрын даргаар ажиллаж байсан гэх намтартай.

Түүний хувьд “Залаа Алтай” ХХК-аараа дамжуулж, тендер түүдэг юм байна. Тодруулбал, тус компанийг 2009 онд үүсгэн байгуулж, захирлаар нь ажиллаж байгаад 2016 онд эхнэр Чойжилын Нямцэцэгийн нэр дээр шилжүүлсэн байдаг. "Залаа Алтай" ХХК Ховд аймаг дахь барилгын тендерийг ингэж түүжээ.

• Ховд аймаг дахь шүүхийн Тамгын газрын барилгын гадна хана дулаалж фасад, хийх засварын ажил- 149 сая төгрөгийн тендер
• Сургуулийн барилгын их засвар /Ховд, Цэцэг сум/- 464 сая төгрөгийн тендер
• Сургуулийн барилгын их засвар /Ховд, Цэцэг сум/- 462 сая төгрөгийн тендер
• Уурхайд баригдах автогражын барилга- 495 сая төгрөгийн тендер
• Ховд салбарт оффисын барилга барих-350 сая төгрөгийн тендер
• Цахилгаан дамжуулах агаарын шугамын өргөтгөл, дэд станц, ухаалаг тоолуур суурилуулах /Ховд, Жаргалант сум/-77 сая төгрөгийн тендер
• Цогт-Овоо сум, ЗДТГ-ын барилгыг шинээр барих- 2.4 тэрбум төгрөгийн тендерт шалгарсан байна.

ИТХ-ЫН ТӨЛӨӨЛӨГЧ ТОГТОХЫН ЖАРГАЛСАЙХАН

        Т.Жаргалсайхан нь Ховд аймгийн Жаргаланд сумын уугуул, Дархан хотын Техикийн их сургуулийг төгссөн. Дархан хотын Хар төмөрлөгийн үйлдвэрийн диспетчер, Улаанбаатар хотын Гаалийн газрын Гаалийн шалгагч, Замын-Үүд дэх Гаалийн газрын Гаалийн улсын байцаагч, Баян-Өлгийн аймгийн Гаалийн газарт Гаалийн улсын байцаагч, Ховд аймгийн Гаалийн газарт Гаалийн улсын байцагч, Увс аймгийн Гаалийн газарт Гаалийн улсын байцаагчаар ажиллаж байжээ.

      Улмаар 2009 онд “Мотоблок” компанийн инженерээр, "Баялаг буянт" компанийн захирлаар ажиллаж байсан гэх намтартай. Барилга угсралт, засал чимэглэл, худалдааны чиглэлээр үйл ажиллагаа явуулдаг “Мотоблок” компанийг Тогтохын Жаргалсайхан, Тогтохын Бямбажаргал нар эзэмшдэг.

“Мотоблок” компани нь мөн төсвийн хөрөнгө бүхий төрийн тендерийг тэрбумаар нь түүдэг байна. Тодруулбал,

• Хүүхдийн эмнэлгийн барилга, 50 ор /Ховд, Жаргалант сум/-4.4 тэрбум төгрөгийн  тендер
• Сэлэнгэ амралт, аялал жуучлалын цогцолборын Сэлэнгэ амралтын баазын өвлийн байр өргөтгөх ажил (ЭҮТӨҮГ/202101897)- 2.9 тэрбум төгрөгийг тендер
• Хөгжил политехник коллежийн барилга /Ховд, Жаргалант/ (ХНХЯ/202009079)- 889 сая төгрөгийн тендерт тус тус шалгарчээ.

ИТХ-ЫН ТӨЛӨӨЛӨГЧ ТУХЫН БЕРГЕНБАЙ

Т.Бергенбай нь Ховд аймгийн Жаргалант сумын "Прогресс" сургуулийг төгсөөд, ХААИС-ийг дүүргэжээ. Тэрбээр  2020 онд 31 настай ИТХ-д нэр дэвшиж сонгогдсоноор Ховд аймгийн хамгийн залуу төлөөлөгч болсон байна. Түүнийг Ховд аймгийн шатахууны “магнат” гэж хэлж болно. Тэрбээр "Толхын ойл" ХХК-ийн менежер, 2018 оноос "Кеналхын" ХХК-ийн захирлаар ажилласан гэх намтартай. “Толхын ойл” компани нь түүний төрсөн ах Тухын Дырдубай нэр дээр бүртгэлтэй. Тус компанийн тендерийн түүхийг дурдвал

• Соёлын төвийн барилга, 250 суудал /Ховд, Дөргөн сум/ (БСШУСЯ/201801034)-Нэг тэрбум төгрөгийг тендер
• Сургуулийн барилгын засвар /Ховд, Ховд сум/ (БСШУСЯ/201805358)- 72 сая төгрөг
• Соёлын төвийн барилга, 250 суудал /Ховд, Дөргөн сум/-Нэг тэрбум төгрөгийн тендер
• Сумын төвийн гудамж талбайн гэрэлтүүлэг, тохижилт /Ховд, Дуут сум/-224 сая төгрөг
• Сумын төвийн гудамж талбайн гэрэлтүүлэг, тохижилт /Ховд, Дуут сум/-224 сая төгрөгийн тендер
• Цэцэрлэгийн барилга, 150 ор /Ховд, Булган сум, Баянсудал баг/ (БШУЯ/202212142)- 3.7 тэрбум төгрөгийн тендерт шалгарсан байна.

Дээрх баримтуудаас Ховд аймгийн ИТХ-ын төлөөлөгч нар нь өнгөрсөн хугацаанд иргэдийг төлөөлөх үүргээ хэрхэн биелүүлсэн талаар дүгнэлтээ хийж, дүнгээ тавина биз ээ.