ДЭЭЛЭЭР ГОЁДОГ Б.БАТЦЭЦЭГ САЙД МЭДЛЭГГҮЙГЭЭСЭЭ БОЛООД  Д.ЦОГТБААТАР ГИШҮҮНД ЗАГНУУЛАВ

   Б.Батцэцэг сайд Монгол Улсын гадаад харилцааг “самарчихсан” юм биш үү. Одоо болтол юунд, яах гэж гарын үсэг зурах гэж байгаагаа мэдэхгүй гишүүдэд загнуулаад сууж байх юм. Саяхан Хууль зүйн байнгын хорооны хурал дээр УИХ-ын гишүүн Д.Ганбат “Манай улс олон конвенцед нэгдэж байгаа. Засгийн газар үүнийг судалсан уу. Конвенцод нэгдсэн бол түүнийг улсаараа дагаж, мөрдөж, биелүүлэх үүрэгтэй. Бид Үндсэн хуулиа хүртэл биелүүлдэггүй шүү дээ” гэтэл Гадаад харилцааны сайд Б.Батцэцэг “Манайх тухайн конвенцод нэгдэж орох биш гарын үсэг зурах асуудлыг хэлэлцүүлж байгаа. Эхлээд гарын үсгээ зурна. Одоогоор 33 улс гарын үсгээ зурчихсан байгаа. Нэгдэж орох нь дараагийн асуудал” гэсэн юм. Гэтэл УИХ-ын гишүүн Д.Цогтбаатар “Бид аливаа конвенцод орох гэж биш гарын үсэг зурах гэж УИХ-аас зөвшөөрөл авна гэдэг чинь юу гэсэн үг вэ. Үүнийг гаднынхан сонсвол юу гэж ойлгох вэ. Таны хариулт эрх зүйн хувьд ноцтой үр дагавар дагуулж байна. Асуудлаа мэдэхгүй байж УИХ дээр олон юм ярих юм. Асуудлаа мэдэхгүй, ажлаа мэдэхгүй конвенцод нэгдэх талаар ярьж болохгүй” гэж загнасан. Б.Батцэцэг сайд түүний асуусан асуултанд нь ч хариулж чадахгүй хөгөө чирсэн мөртлөө Д.Цогтбаатар гишүүнд “Надад дургүйг чинь мэднэ” гэж гоморхсон. Ямартай ч өнгөрсөн дөрвөн жилийн хугацаанд юунд, яах гэж гарын үсэг зурах гэж байгаа, ажил нь ямар шатандаа явааг гишүүдэд бүрэн зөв ойлгуулж чадахгүй байгааг нь харахад түүнийг чамалмаар. Ажлаа мэдэхгүй Гадаад харилцааны сайдаар ажилласан гэхээр Монгол Улсын гадаад харилцаа хэрхэн сайжирсан байх вэ, нүдэн балай чих нь дүлий юм шиг байсан сайд өнгөрсөн дөрвөн жилийн хугацаанд Монгол Улсын гадаад харилцаанд авууштай юу хийсэн бэ. Өөрийгөө гоёж, сурталчилгаагаа А, Б-гүй хийлгэж байсан сайдын дээрх үг, үйлдлээс харахад гадаад харилцааны асуудал дээрдэх нь битгий хэл дордоогүй байгаасай гэж бодоход хүргэж байна.

ЭНГИЙНЭЭС ЭНГИЙН ХАРАГДАХ ГЭЖ ХИЧЭЭСЭН Б.БАТЦЭЦЭГ САЙД ХҮҮХДҮҮДЭЭ СОНГУУЛИЙН СУРТАЛЧИЛГААНД "АШИГЛАВ"

     Уг нь, шилдэг дипломатч мэтээр өөрийгөө ойлгуулдаг, төрийн үйл ажиллагаанд оролцохдоо дээлээр гангардаг гэдгээрээ бусдын нүдэнд тусаж байсан. Иргэд ч түүний дээлтэй зогсож байгааг хараад муугүй байлаа. Тэр утгаараа Монгол Улсын гадаад харилцаа хөгжөөд байна, хөгжөөд байна гэтэл сайд нь юу ч мэдэхгүй гишүүдэд загнуулаад сууж байхыг хараад халагламаар болсон хүн олон. Тэрбээр энэ жилийн сонгуульд Өвөрхангай, Архангай, Баянхонгор аймгаас нэр дэвшихээр саяхан иргэдтэй уулзалт хийж, хөдөөгүүр явсан. Сурталчилгааныхаа үеэр Өвөрхангайн бэр гэдгээ мөн зарлаж амжсан. Тэгээд сурталчилгааны багийнхандаа бэрийн тухай дуу дуулахыг хүртэл олны өмнө захиалж байна лээ. Үүгээр зогсохгүй сонгуулийн сурталчилгаандаа хүүхдүүдээ хүртэл ашиглаад авсан. Саяхан отрын мал тууж яваа бага хүүтэйгээ хөдөө хээр уулзаж буй мэтээр дүрс авхуулж, олон нийтэд цацасан нь зарим хүний инээдийг барсан. Тэрбээр хүүхдүүдээ өвөл, зунгүй хөдөө байлгалдаг, бараг хичээлд нь явуулдаггүй ухааны юм ярьж байх нь сонгуулийн сурталчилгаандаа хэт улайрсныг нь илтгэх мэт.  Бас хөдөөнийхний өмнө сөгдөж суугаад тамхилах нь, бусдын биед дотно хүрч, энгийнээс энгийн харагдах гэж хичээж буйг нь илчилж байлаа. 

ХУВИЙН КОМПАНИУДАА ТӨСВИЙН МӨНГӨӨР "УГЖДАГ"-ААРАА АЛДАРТАЙ Б.БАТЦЭЦЭГ

   Түүнийг Гадаад харилцааны дэд сайд байхад нь хувийн компаниуд нь 41 тендерт ялж, 3.2 тэрбум төгрөг авч байсан баримтыг манай сайтын сэтгүүлч олон нийтэд ил болгож байлаа. Тухайлбал, "Монголын үнэт цаас хэвлэл" ХХК, "Мөнхийн үсэг" ХХК, "Азхур" ХХК-иуд нь төсвийн 12 тендер авчихсан байх жишээний. 

1. “Мөнхийн үсэг” ХХК

Өнгөрсөн сард их дээд сургуулиуд төгсөлтийн баяраа хийх үеэр Б.Батцэцэгийн “Мөнхийн үсэг” ХХК нь төрийн өмчийн их сургуулиудыг ромбо, диплом хэвлэх тендерүүдийг “түүжээ”. 

Жишээ нь,

• МУБИС-ийн 2021-2022 оны хичээлийн жилийн төгсөлтийн ромбо, дипломын хавтас нийлүүлэх 60.0 сая төгрөгийн тендер

• МУИС-ийн 2021-2022 оны хичээлийн жилийн төгсөлтийн ромбо, диплом нийлүүлэх 124 сая төгрөгийн тендер зэргийг “Мөнхийн үсэг” ХХК авсан байна. 

2. “Аз хур” ХХК

      Ерөнхий сайд Л.Оюун-Эрдэнэ төрийн байгууллагууд, төрийн өмчит үйлдвэрүүдийн газруудыг хэмнэлтийн горимд шилжүүлж буйгаа зарлаж, бичгийн цаас, принтерийн хорны хэрэглээгээ хүртэл багасгахыг “лоозондож” байсан цаг саяхан. Хоржоонтой нь, Гадаад харилцааны сайд Б.Батцэцэгийн “Аз хур” ХХК-ийнх нь зөвхөн энэ онд шалгарсан төрийн байгууллагуудад бичгийн цаас нийлүүлэх тендерүүдийг нь түүхэд л төсөвт өртөг нь талийж байна. 

Жишээ нь, 

• “Багануур зүүн өмнөд бүсийн цахилгаан түгээх сүлжээ” ТӨХК- Бичгийн цаас нийлүүлэх 23.5 сая төгрөгийн тендер

• Говь-алтай аймгийн нэгдсэн эмнэлэг- Бичиг хэргийн материал нийлүүлэх 27.8 сая төгрөгийн тендер

• Гэмтэл согог судлалын үндэсний төв- Бичгийн цаас нийлүүлэх 28.0 сая төгрөгийн тендер

• Зам тээврийн хөгжлийн төв- Бичиг хэргийн материал нийлүүлэх 23.0 сая төгрөгийн тендер

• Монголын иргэний агаарын тээвэр- Бичгийн цаас, бичиг хэргийн материал нийлүүлэх 57.5 сая төгрөгийн тендер

• Харилцаа холбооны зохицуулах хороо- Бичгийн цаас, дугтуй нийлүүлэх 13.2 сая төгрөгийн тендер

• Цагдаагийн ерөнхий газар- Бичгийн цаас нийлүүлэх 49.6 сая төгрөгийн тендер

• Эх, хүүхдийн эрүүл мэндийн үндэсний төв- Бичиг хэргийн материал нийлүүлэх 36.7 сая төгрөгийн тендер зэрэгт тус тус шалгарсан байна. 

3. “Монголын үнэт цаас хэвлэл” ХХК

      Гадаад харилцааны сайд Б.Батцэцэгийн хэвлэлийн компаниуд Улсын бүртгэлийн ерөнхий газартай байсхийгээд нэр холбогддог гэмтэй. Тэгвэл “Монголын үнэт цаас хэвлэл” ХХК нь он гарсаар Улсын бүртгэлийн ерөнхий газрын хоёр ч тендерт шалгараад амжжээ. 

Жишээ нь, 

• Улсын бүртгэлийн ерөнхий газар- Улсын мэдээллийн маягт хэвлэх /Гэрчилгээ, үнэмлэх, лавлагаа, маягт/ 761 сая төгрөгийн тендер

- Гэрчилгээний хавтас- 118.2 сая

- Архивын баримтын хавтас- 219.4 сая төгрөгийн тендерт тус тус шалгарсан байна. 

Энэ талаарх дэлгэрэнгүй мэдээллийг https://ergelt.mn/news/22/single/22520 энд дарж уншина уу.