УИХ-ын чуулган хуралдаанаар нүүрсний түр хорооны ажиллах хугацааг сунгах эсэх талаар хэлэлцэж байна. Хуралдааны үеэр УИХ-ын гишүүн С.Чинзориг  нүүрсний асуудалтай холбоотой саналаа хэллээ.

      Тэрбээр “Түр хороог сунгах асуудлыг дэмжиж байна. Гэхдээ бид гаднаа жагсагчидтай амаргүй нөхцөл байдалтай ажиллаж байна. Энэ нүүрсний хулгайтай тэмц, холбогдсон улстөрчдийг нэрлэ, хариуцлага тооц гэж байгаа. Ийм нөхцөлд түр хороог сунгах талаар яригдаж байна. Гэхдээ түр хороо байгуулагдаад зургаан сарын хугацаа өнгөрсөн. Тэгэхээр энэ түр хорооны даргаас энэ хугацаанд ямар ажил хийсэн, ямар  үр дүнд хүрсэн эсэх. Та бүхний хийж чадахгүй байгаа, зайлшгүй УИХ-аас дэмжлэг авах, ямар асуудлууд байна гэдгийг асуумаар байна. Тухайлбал, гэрээний нууцлалтай холбоотой асуудал дээр хэдэн нууцлалаас гарсан болон гараагүй гэрээ байгаа. Төмөр замын бүтээн байгуулалттай холбоотой, үнийн зөрөөний  асуудлууд ярьдаг. Тэгэхээр энэ төмөр замын гэрээ ил байгаа юм уу. Ер нь түр хороо яагаад УИХ-ын гишүүд болон ард иргэдэд мэдээлэл өгөхгүй байна. Түр хороонд байгаа гишүүд улс төр хийгээд байгаа гэх хардлага надад төрж байна” гэлээ.