Шведийн химич, инженер, зохион бүтээгч, хүмүүнлэгийн үйлстэн, эрдэмтэн Альфред Нобелийн нэрэмжит шагналд шалгарсан дэлхийн шилдгүүдийг тодруулах 120 дахь удаагийн Нобелийн шагнал гардуулах ёслол эхэлсэн. Тэгвэл энэ  сарын 7-нд Нобелийн шагнал гардуулах хорооноос 2021 оны утга зохиолын шилдгийг нэрлэсэн билээ. 2021 оны утга зохиолын Нобелийн шагналыг Танзанийн зохиолч Абдулразак Гурна хүртсэн. Түүнийг “Колончлол, түүний үр дагавар, дүрвэгсдийн хувь тавилан, соёл уламжлал, тивүүдийн дундах эвлэршгүй, энэрэнгүй байдлыг нэвтрүүлснийх нь төлөө” хэмээн шагнасан байдаг.

Нобелийн шагналтныг зарласны дараа Нобелийн шагнал гардуулах хорооны эрдэм шинжилгээний ажилтан Адам Смит шинэхэн Нобелийн шагналтан Абрулразак Гурнатай ярилцсан. Уншигч та бүхэнд 2021 оны утга зохиолын Нобелийн шагналтан Абрулразак Гурнагийн ярилцлагаас онцлох эшлэлүүдийг хүргэж байна.

“Би “Энэ жилийн Нобелийн шагналыг хэн авах бол” гээд их сониучирхаж байсан ч нэрийг зарлахад нь хараагүй. Эхэндээ хүмүүс над руу залгаж хэлж байхад нь тоглож байна л гэж ойлгосон. Гэхдээ үгүй. Хэдий зайлж, зугтмаар байсан ч энэ зугтаж ч чадахгүй, зайлж ч чадахгүй тийм том шагнал”

“Европчууд өөрсдөө өөр оронд очвол энгийн зүйл. Харин Африкаас ч юм уу хэн нэгэн Европ руу очих юм бол хачирхалтай зүйл гэж бодно. Дэлхий дээрх дүрвэгсдийн ойлголтын зөрчил ийм л байдаг”

“Би дүрвэгсдийг үзэн ядах, хөөж байгааг нэг төрлийн “харамч зан” гэж боддог. Нэг л дэлхийд амьдарч байж бусадтайгаа газар нутаг, эх дэлхийгээ хуваалцаж болох л байсан”

“Дэлхий дээрх олон сая дүрвэгчийг хүмүүс зүгээр л “ядуу хүн” гэж хардаг. Гэвч тийм биш. Тэдний хэчнээн нь над шиг авьяастай байхыг үгүйсгэхгүй”

“Утга зохиолыг үзэн ядаж, хүчээр зохиол бичиж чадахгүй”

“Амьдралын үнэ цэн, аз жаргалыг ямар нэгэн юм олох, түүнээсээ таашаал авах, ятгалтад оршдог гэж боддог”

Абдулразак Гурна нь 1948 онд Энэтхэгийн далайн Занзибар арал дээр өсөж, 1960-аад оны сүүлчээр Англи руу дүрвэсэн аж. Тэрбээр дүрвэгсдийн амьдралын талаарх 10 роман, хэд хэдэн богино өгүүллэг бичиж, олон улсад хэвлүүлсэн билээ.