Сөрөг хүчин шиг сөрөг хүчин байж, эрх баригч намын эсрэг бат зогсож байх ёстой Ардчилсан нам МАН-тай нийлэх дээрээ тулав. Нэгэн цагт дээрээ даргагүй, дотооддоо зодоонтой, дэмжлэг, дэмжигчидгүй байснаа бодвол даргатай, дэмжигчидтэй болсон ч "сөрөх" хүчин байх эсэхдээ асуудалтай хэвээр. Сонгуулийн санал хураалт эхлэхээс өмнө "Алдагдсан найман жилийн алдааг засна" гэж ухуулж явсан ч алдаа засах нь битгий хэл, эрх баригч намтай "өвөр түрийндээ" орж, нийлэх дээрээ тулж доош орох ч гэж дээ, Ардчилсан намынхан.

                                    2024 оны УИХ-ын ээлжит сонгууль өнгөрсөн долоо хоногт болж өндөрлөлөө. Бид анхны 126 УИХ-ын гишүүнийг сонгуулийн холимог тогтолцоогоор сонгов. Нэг талаараа эрх баригч намын дахин дөрвөн жил засгийн эрх барих болсон ч нөгөөтээгүүр хүчний тэнцвэрийг хангасан шинэ парламенттай болсон талаар улс төр шинжээчид бичиж байна.

Тухайлбал, шинэ парламентад хөгжлийн бэрхшээлтэй иргэнээс эхлээд багш, инженер гээд нийгмийн олон бүлгийн төлөөөллөө багтаасан. Мөн эмэгтэйчүүдийн төлөөлөл 38.8 хувьтай нэр дэвшиж, 25.4 хувиар сонгогдсон нь манай УИХ-ын түүхэндээ шинэ амжилт болов. Түүнчлэн шинэ парламентад Монгол Ардын нам 68, Ардчилсан нам 42, Хөдөлмөрийн үндэсний нам найм, Иргэний зориг ногоон нам дөрөв, Үндэсний эвсэл дөрвөн суудалтай болсон билээ.

Харин ес дэх удаагийн парламентын сонгуулиар сонгогдсон "нялх" гишүүд тангаргаа өргөөд удаагүй байгаа энэ үед эрх баригч намын зүгээс хамтарсан Засгийн газар байгуулах санал тавив.

Угтаа бол "уначихгүйг" хичээсэн эрх баригч намын эл саналд нааштай хандах нь байтугай хариу ч өгөлгүй дуусгах нь сөрөг хүчин. Гэтэл Ардчилсан нам "Алдааг нь засна" гэж байсан эрх баригч намтайгаа гар гараасаа хөтлөлцөөд хамтарсан Засгийн газар байгуулах нь дамжиггүй болж байгаа гэнэ. Улс төр шинжээч, судлаачдын прогнозыг харж үзвэл, эрх баригч МАН АН, ХҮН-таы эвсэж Засгийн газар байгуулна гэснээрээ байгуулах бөгөөд хамтарсан Засгийн газар гэдэг утгаараа бүтцээ ч нэмэх юм байна. Улмаар хамтарсан Засгийн газраа гаднын хэд хэдэн орны жишгээр 20 яамтай байгуулж, МАН 60 хувьд нь суугаад үлдсэн 40 хувиа АН, ХҮН хоёрт хувааж өгөх тохироотой байгаа гэнэ.

-АРДЧИЛСАН НАМД ХҮЧТЭЙ СӨРӨГ ХҮЧИН БАЙХААС ИЛҮҮ ТАМГА, ТЭМДЭГНИЙ ХЭРҮҮЛ НЬ ҮНЭТЭЙ БОЛОЛТОЙ-

         Өнгөрсөн 34 жилийн хугацаанд Ардчилсан нам мандахдаа мандаж, унахдаа унаж явсан ч ийм улбайж, сулбайсан, унж дорой, унтаа зориггүй, зорилгогүй байсангүй. Үе үеийн ардчиллын удирдлагууд “эрх мэдэлгүй” байсан ч эр зоригоороо өнөөгийн Ардчиллыг бүтээсэн гэдэгтэй санал нийлэх хүн олон биз. Үнэндээ цүнхэндээ тамгагүй байсан ч тэд ийм амбицгүй, зориггүй, тэмцэлгүй, аймхай, хулчгар бүр эрх баригч намтайгаа хамтарсан Засгийн газар байгуулахаар байгаагүй л болов уу. Харин одоогийн Ардчилсан намд дотоод ардчилал, намын төлөвшил гэж огт байхгүй болжээ. Бүр үүнийгээ ч намын дарга, удирдлагууд нь алхам тутамдаа "зарлаж", харуулдаг болов. Ард түмэн өнөөгийн Ардчилсан намаас манлайлал, улс төрийн зангараг, намын төлөвшил гэж горьдоод ч хэрэггүй юм байна. Эндээс ёроолдоо тултал унасан Ардчилсан нам улс төрд хэр удаан тэсэх вэ гэдэг асуулт үлдэж байна.

Уг нь цагтаа Монголын аль толгойтой, мэдлэгтэй, ур чадвартай боловсон хүчнүүд Ардчилсан намд элсэн орж, сөрөг хүчний үүрэг гүйцэтгэхдээ Ардын намыг айлгадаг, хүчтэй улстөрчдөөр хүрээгээ тэлж байсан. УИХ-д олонх болж, хоёр удаа Засгийн газар байгуулахдаа бүтээн байгуулалтын ажлуудыг зоригтой эхлүүлж, эдийн засагт хөгжлийн шинэ гарц нээж байлаа. Түүхий эдийн үнэ дэлхийн зах зээл дээр нам унаж, экспортын орлого тасалдах хэмжээнд хүрэхэд гадны хөрөнгө оруулалтыг татаж, бонд гаргаж, эдийн засгаа сэргээж болдог гэдгийг үлгэрлэн харуулсан улс төрийн чамбай нүүдэлчид байв. Харамсалтай нь, хэдхэн хүний ашиг сонирхлоос болж, Ардчилсан нам ард түмний дунд нэр хүндээ алдаж, Ардын намын улс төрийн тоглолтын дундаас өндийх тэнхэлгүй өөхөнд боосон чулуу шиг болцгоов. Тэд дотроо хэдэн фракц болж хуваагдаж нэгнээ л үзэн ядаж, харлуулахаас биш шавар дундаас гаръя гэх тэмцэл хийж байгаа харагдахгүй байна.

                   Мууг зөгнөж, мууг нь хэлж байгаа юм биш. Гэхдээ сөрөг хүчний хувьд "сөрж" байж л сөрөг хүчин болдог. Харин Ардчилсан намын хувьд сөрж, сөрөөд эрх баригч намтай тэмцэлдэхээс илүү тамга, тэмдэгний, дарга, цэргийн хэрүүл нь үнэтэй байдаг бололтой.