Төвийг сахих бодлоготой манай орны нийслэл хотын замаар хойд хөршийн бүрэн зэвсэглэсэн хуягтийн цуваа улсынхаа туг, далбааг намируулан явах аж.

ОХУ-ын бүрэн зэвсэглэсэн цэргийн хүчин, танк, хуягтуудтайгаа Монгол Улсын хилээр орж ирлээ. Их сүр үзүүлсэн танк, хуяг болсон тус цэргийн хүч  Монгол, ОХУ-ын хамтарсан “Сэлэнгэ-2022” хээрийн сургуульд оролцохоор ирж байгаа гэнэ. Хоёр талаас 500, 500 цэрэг оролцож байгаа гэх ч, хэдхэн хоногийн өмнө Монголын хил давсан хойд хөршийн цэргүүд бүрэн зэвсэглэсэн дээрээ танк, хуягт зэрэг байлдааны техник авчирсан нь олон хүний дургүйцлийг төрүүлээд байна.

                 Олон дунд "Ийм хамтарсан цэргийн сургууль болж л байдаг биз дээ" гэх ч хүн бий. Харин геополитикийн хурцадмал байдалтай, эмзэг цагт харийн зэвсэглэсэн цэргүүд танк, хуягттайгаа Монголын хилээр нэвтэрч ороод нийслэл хотын замаар сүртэй гэгч нь жагсаж яваагаас харахад байдаг л нэг сургууль биш болжээ.

-ОХУ-ЫН ЦЭРГИЙН ХҮЧНИЙГ ХИЛЭЭРЭЭ НЭВТРҮҮЛЖ, МОНГОЛ УЛС ДЭЛХИЙГЭЭС НҮҮР БУРУУЛЛАА-

Монгол зон хэзээнээс л хойд хөршийнхөнд элэгтэй. Хаана ч, хэзээ ч байсан "Манай орос ах нар" гээд л хүлээж авах. Харин тэр болгонд нь сүртэй гэгч нь талархаж, "ханд" өгөөд байдаггүй орос "ах" нарт одоо л Монголын хэрэг гарсан бололтой бүрэн зэвсэглэсэн цэрэг, танк, хуягтаа оруулж ирээд сүрийг үзүүлж, бардаж, гайхуулж байна даа.

                 Өнгөрсөн хоёрдугаар сард ОХУ-ын цэргийн хүчин Украины хилээр нэвтэрсэн. Улмаар Зүүн Европт геополитикийн хурцадмал байдал үүсэж, НҮБ, НАТО-гоос эхлүүлээд дэлхий ОХУ-ын эсрэг зогсож, олон ч хориг арга хэмжээ тавьж байлаа. Тэр үеэс нэг их удалгүй хойд хөрш маань дэлхийн түүхэн дэх хамгийн их хоригтой улс болсныг уншигч та санаж байгаа биз ээ.

Зүүн Европт дайн эхлүүлснээс хойш ОХУ гадаад харилцаа, эдийн засагтаа их хэмжээ хохирол амссан. Харин тэр үеэс л тийм ч сайн харилцаатай бус БНХАУ-ыг "ах"-аа болгох болов. Тэгэхээр Монгол Улс ч мөнхийн хоёр хөрш гэгддэг ОХУ, БНХАУ хоёулантай нь "ах дүү" болж таарах. Цэргийн хүчээ өөр улс руу оруулж, олон улсын үзэж байгаагаар түрэмгийлэл үйлдсэн ОХУ-ын цэргийн хүчнийг "найр" тавин угтсанаараа манай орон Украинд олон мянган хүн эрсдэж, хот, тосгон сүйдэж байгааг дэмжсэн хэрэг боллоо.

-МОНГОЛ УЛС ГУРАВДАГЧ ХӨРШИЙН БОДЛОГОО НУРААЖ БАЙНА-

Монгол Улс ардчилсан хувьсгал гарснаас хойш л төвийг сахисан, гуравдагч хөршийн бодлого баримталж ирсэн. Гэтэл олон жилийн нөр их түүхтэй хоёр бодлогоо нураах нь ээ.

                 Дайн ч зарлалгүй Украин руу цэргээ оруулсан ОХУ-ын дээрх үйлдлийг олон улс түрэмгийлэл гэж үзсэн. Уг нь манай орон НҮБ-ын Ерөнхий Ассамблейн санал хураалтад хоёр ч удаа ОХУ, Украины асуудалд төвийг сахиж байгаа гэж мэдэгдэж байлаа. Гэсэн ч олон улсын "гэмт хэрэгтэн" болоход ойрхон байгаа ОХУ-ын цэргийн хүчнийг хилээрээ нэвтрүүлж, энэ эмзэг цагт хамтарсан цэргийн сургууль хийж байгаа нь Монгол Улс "автомат"-аар ОХУ-ын талыг, өөрөөр хэлбэл Украин дахь түрэмгийллийг дэмжсэн байр суурьт хүргэж байна.

Мөн үүгээр ч зогсохгүй төвийг сахисан байр сууриасаа гуравдагч хөршийн бодлогоо баримталж байсан Монгол Улсад хэрэггүй цэргийн сургууль болох шиг. Хоёрдугаар сарын сүүлээр эх орныхоо тайван жагсаал хийж байсан Монголд суугаа Украины иргэд ч "Ардчилсан улсаас эх орноо дэмжиж байна" гэж хэлж байсан шигээ байхгүй нь лав. Эх орон руу нь халдаж, түрэмгийлсэн орос цэргүүдийн хилээрээ оруулаад танк, хуягт гээд бүрэн зэвсэгтэй нь нийслэлийнхээ замаар явуулж байгааг харсан манай улсад суугаа гаднын орны иргэд ч бидэнд итгэхээ болих нь. 

Энхийн цагт түрэмгийлэл үйлдсэн хойд хөршөө "дэмжигч" болчихлоо. Харин одоо хамтарсан цэргийн сургууль хийх гэж орос "ах" нартаа "найр" тавин угтсан нь буруутаж, гуравдагч хөрш ч, гадаад харилцаа ч үгүй, дэлхийгээс хаалттай орон болох вий.