Засгийн газрын өнөөдрийн хуралдаанаас гаргасан шийдвэрийг Сангийн сайд Б.Жавхлан танилцууллаа.

              Тэрбээр “Засгийн газрын өнөөдрийн хуралдаанаар түүхэн тогтоол батлагдлаа. Өөрөөр хэлбэл, сүүлийн хорь гаруй жил уул уурхайн баялгаа бүрдүүлж эхэлснээс хойш Монголын ард түмэн баялагтаа эзэн болох цаг мөч өнөөдрийн Засгийн газрын тогтоол батлагдсанаар хэрэгжиж эхэлж байна. УИХ-аар Үндэсний баялгийн сангийн тухай хууль батлагдсан. Үүнтэй холбогдуулж тус хуулийг хэрэгжүүлэх зарим арга хэмжээний тухай зогсоолыг өнөөдөр эцэслэн баталлаа. Ингэхдээ хуримтлалын санд зохицуулалт хийх тогтоол гарлаа. 2023 оны хуримтлалын санг бүрдүүлэх үүрэг бүхий Эрдэнэс Монгол ХХК 500 тэрбум төгрөг хүртэлх мөнгийг уг санд хуримтлуулж, орон сууцны хөтөлбөрийг санхүүжүүлж, хөрөнгө оруулалт хийхээр шийдвэрлэлээ. Монгол Улс 2021, 2022 онуудад хамгийн өндөр ипотек буюу 750 тэрбум төгрөг гаргаж байсан. Энэ жил харин Төв банк эх үүсвэр гаргаж 500 хүртэлх тэрбум төгрөг, эргэн төлөлтөөс буюу банкууд өөрсдийн эх үүсвэрээрээ 200 тэрбум төгрөг хүртэл гээд нийтдээ 1.2 их наяд төгрөгийн ипотекийн зээлийн эх үүсвэртэй болж байна. Энэ бол өмнө нь бий болж байгаагүй боломж юм. Одоо нийт банкаас судалгаа авахад 17 мянган иргэний хүсэлт судлагдаж байгаа юм байна. Жилдээ нэг 5-6 мянган зээл гардаг. Харин нэг их наяд гарсан учир 17 мянган хүсэлтээ өгсөн иргэдээс банкныхаа шалгуурыг давсан тохиолдолд 10 гаруй мянган иргэний гар дээр зээл очих боломж бүрдэж байна. Төв банк дээр сангуудын данс нээгдсэн байгаа. Ирэх даваа гарагаас эхний гүйлгээ хийгдэж эхэлнэ" гэв.