Японы мэргэжлийн гар бөмбөгийн багийн тамирчин Южи Нишида бол өнөө үеийн залуусын баатруудын нэг. Тэрбээр өдгөө 20 настай бөгөөд 18 настайгаасаа мэргэжлийн “JTEKT Stings” багт тоглож, бүх Японы шигшээ багт уригдсан юм. Тухайн багуудад элссэн эхнийхээ тоглолтоос гарааны зургаан тоглогчид багтсан нь түүнийг дасгалжуулагчид хэрхэн үнэлж буйг нь харуулж буй биз ээ. Баруун жигүүрийн довтлогчийн байрлалд тоглодог түүний өндөр 186 см боловч бөмбөг цохих өндөр нь 347.5 см хүрч, 335 см өндөрт хаалт хийж чаддагаараа бусад багийн дасгалжуулагчдын анхаарлын төвд оржээ.

2018 оны ДАШТ-нд шигшээ багийнхаа гарааны тоглогчоор тоглохдоо өөрийн авьяас, потенциалыг харуулж чадсан ч багийн амжилт нь тийм ч сайн байсангүй. Харин өнгөрсөн жилийн Азийн аварга шалгаруулах тэмцээнд амжилттай оролцож, хүрэл медаль авсных нь дараа нэр хүнд нь дахин сэргэсэн билээ. Тухайн тэмцээний үеэр нэг тоглолтод 30 оноо авсан хамгийн залуу тоглогчоор тэр түүхэнд нэрээ үлдээжээ. Тэрбээр нэгэн ярилцлагадаа “Анх эгчийгээ гудамжинд гар бөмбөг тоглож байхыг хараад энэ спортыг сонирхох болсон” хэмээн ярьсан байдаг. Тэр цагаас хойш Южи Нишида гар бөмбөгийн спортоор хичээллэж, жигүүрийн болон холбогчийн байрлалд тоглон өөрийгөө хөгжүүлж байв. Ахлах сургуулиудын аварга шалгаруулах тэмцээнд оролцсоных нь дараа түүнийг “19-өөс доош насныхны ДАШТ”-ны багаас дуудаж, тус тэмцээнд 19-өөс доош насны Японы шигшээ баг алтан медаль авснаар Нишидагийн карьер өөрөөр эргэв. Ахлах сургуулиа төгссөний дараа гар бөмбөгийн спортыг чухалчлан авдаг их, дээд сургуульд элсэх хүсэлтэй байсан түүнд мэргэжлийн багийн урилга иржээ. 2019 оны ДАШТ-нд өөрийн байрлалдаа шилдэг тоглогчийн шагнал хүртэж, олон судлаачийн үзэж буйгаар “Дэлхийн гар бөмбөгийн спортын түүхэнд үлдэх шилдэг тоглогчдын нэг”-ээр цоллуулаад буй. Эгчийнхээ сонирхлыг даган энэ спортыг сонирхсон түүний хүндэлж, биширдэг хүн бол Японы мэргэжлийн гар бөмбөгийн тамирчин Юки Ишикава. Өдгөө хүндэлж, биширдэг тоглогчтойгоо нэгэн багт улсынхаа нэрийг дэлхий дахинд гаргаж яваа тэрбээр манай үеийнхний баатруудын нэг яах аргагүй мөн билээ.