"ШАР ГЭГЭЭ", "ГАЛБИНГАА", "ЗАДЛААГҮЙ ЗАХИА", "АМЬДРАЛД ХАЙРТАЙ" КИНОНЫ АЯЛГУУГ ХИЙСЭН Б.САНЧИР

2026-04-09, 44

“Яруу арт” продакшны ээлжит бүтээл “Амьдралд хайртай” киног маргааш нээнэ. Хөгжмийн зохиолч Б.Санчирын хөгжим, дууных нь аялгуу дээр нь ажилласан “Шар гэгээ”, “Галбингаа”, “Задлаагүй захиа” зэрэг олон сайхан бүтээлийг бид мэдэх билээ. Тэгвэл дараагийн нэгэн бүтээл нь энэ кино байна. Түүний аялгуугаар хамтдаа аялцгаая.

-ШАР ГЭГЭЭ-

Соёлын гавьяат зүтгэлтэн, яруу найрагч Ш.Гүрбазар гуайн зохиол, найруулагч Б.Батдэлгэрийн найруулсан энэ сайхан бүтээлийн хөгжим, дуу нь одоо ч сонсоход сэтгэлд дотно эгшиглэнэ.

“Алтраад байгаа шар гэгээ

Алаг газрын хаяаг аргадана даа

Ээ хүний заяанд

Энэрлийн хяруу хайлах юм даа…” гээд үг, аялгуу нь аргадсан, ахуй соёл, хүний мөн чанар, энэрэл хайрыг багтаан дуулсан нь хэн бүхний сэтгэлд хүрч чадсан. Э.Дашням дуучин ч сайхан хүргэж чадсан. Эндээс л Б.Санчир хөгжмийн зохиолч үзэгч, сонсогчдод илүүтэй ойртож, мэдрэмж, өнгө аясаараа ялгарч эхэлсэн. Монгол ахуй, дүрслэл, үг хэллэгтэй кино ойрын жилүүдэд ихэд ховордсоны дотор тодорч гарч ирсэн уран бүтээл бол “Шар гэгээ”. Үр удам гэдэг хүнд хэчнээн чухлыг, зарим зүйл хүсээд ч ирдэггүйг өгүүлэх энэ бүтээлийн агуулгыг хөгжим, дуу нь бүрэн багтаасан. Хөгжим төгс зохицож гэмээнэ сая тэр бүтээл бидний чих, сэтгэлд шингэн очиж, хоногшдог. Одоо ч үүнийг бичиж байхад “Шар гэгээ” дууны аялгуу сэтгэлд эгшиглэж, сонсогдсоор байна.

-ГАЛБИНГАА-

Эмэгтэй хүн, эх хүний үрээ гэсэн үүрд мөнхийн ширгэшгүй сэтгэлийг мөн л амьдралын мөн чанар, чин үнэн хүсэл, тавилан заяатай сүлэн аялгуулж, түүнийг нь Г.Эрдэнэчимэг дуучны нарийн торгон мэдрэмж, уянгалаг хоолойгоор хүргэсэн “Галбингаа” киноны дуу ч мөн Б.Санчир хөгжмийн зохиолчийнх. Эх хүний үр хүүхдээ гэсэн нандин сэтгэл, хэзээ ч хувирашгүй хайрыг торгон илэрхийлсэн аялгуу энэ байсан. Тийм эмзэг, хэн ч үл халдам өндөрт оршдог эх хүний сэтгэл, үртэй болохын хүслэн болсон их хүсэл, хясал сорилт, ээж байхын жаргалыг амсаж буй тэр агшин гээд цөмийг нь багтаан эгшиглэх энэ дууны аялгуу олон ч ээжид хүч тамир, итгэл сэтгэл бэлэглэсэн нь гарцаагүй. Үнэхээр сонсох тусам зүрх сэтгэл рүү урсаж, нэгийг бодогдуулж байдагтай нь хэн бүхэн санал нийлнэ байх. Ахуйгаас, хүний мөн чанараас эхийн сэтгэл рүү нүүж, тэнд эмэгтэй хүний дотоод чинад руу ч хүрч, хөгжмөө хийн, аялгуугаа бичиж, өөрийн гэсэн давтагдашгүй орон зайгаа бүтээсээр. Эхний энэ хоёр бүтээл л гэхэд хэзээд ч сонссон хүний сэтгэлийн утсыг хөндөж, догдлоон жаргааж, уяруулан ухааруулж чадах бүтээлүүд юм.

-ЗАДЛААГҮЙ ЗАХИА-

Харин энэ бүтээлд аавын тухай нэгэн сайхан дууны аялгууг хийж, бүр өөрөө дуулсан. Эцэг хүний уул чанар, дотоод сэтгэл, хүлээлт, тэсвэр тэвчээрийг тэр “Аав уул” дуунд багтаан эгшиглүүлсэн.

“Намрын модод миний л адил уйтгарлаад

Намайг санасан аавын минь настай хийсээ юу

Таныхаа зүсэлсэн уулсын бэлээр хөвөрч

Элбэг дээлийнх нь энгэрт өслөө…” гээд аав хүний сэтгэл, үр хүүхдээ санаж, хайрлах хайр, зөөлөн хатуу зан чанар, байр байдлыг уултай зүйрлэж, тодотгон дуулсан нь мөн л үзэгчдийн сэтгэлд очиж чадсан. Ингээд харахаар тэр яах аргагүй хүний сэтгэлд амьдарч, хоногшин тогтсон бүтээлийн эзэн юм байна.

Аялгууг нь хийсэн киноны дуу болгон нь хит болж чаджээ. Мэдээж өөрөө ч цөөнгүй дууг үзэгчдэд хүргэсэн. Тухайлбал, “Зандан хүрэн” дууны сонирхолтой, шинэлэг нэгэн хувилбар түүнийх. Энэ мэтээр уран бүтээл нь амжилттай үргэлжилж байна. “Амьдралд хайртай” киноны нээлтэн дээр ч мөн түүний аялгууг нь хийсэн цоо шинэ нэгэн бүтээл МУГЖ Т.Ариунаагийн дуулалтаар хүрэх гэж буй юм билээ. Хүний мөн чанар, аав, ээж, ахуй соёлыг дуундаа шингээн бичсэн тэр одоо харин амьдрал, түүний мөн чанарын туххй ямар бүтээл дэлгэх бол. Энэ бүгд цөм хөгжмийн зохиолч Б.Санчирын аялгуу, түүний илэрхийллүүд.

"ШАР ГЭГЭЭ", "ГАЛБИНГАА", "ЗАДЛААГҮЙ ЗАХИА", "АМЬДРАЛД ХАЙРТАЙ" КИНОНЫ АЯЛГУУГ ХИЙСЭН Б.САНЧИР

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.