Үндэслэлгүйгээр хөрөнгөжсөн этгээдийг хөрөнгийг улсын орлого болгожээ. Тодруулбал, Авлигатай тэмцэх газраас явуулсан хяналт шалгалтаар нийтийн албан тушаалтны хууль ёсны дагуу олсон болохоо үндэслэлтэй тайлбарлаж чадаагүй зөрчлийг тогтоожээ. 

        Нийтийн албан тушаалтан А нь "Toyota Lexus RX-450” автомашиныг худалдан авсан үнийн дүнгийн 45,000,000 төгрөгийн эх үүсвэрийг хууль ёсны дагуу олсноо үндэслэлтэй тайлбарлаж чадаагүй  байна. Өөрөөр хэлбэл, үндэслэлгүйгээр хөрөнгөжсөн гэдэг нь тогтоогджээ.  АТГ-аас нийтийн албан тушаалтан А-гийн хууль ёсны дагуу олсон эсэхээ үндэслэлтэй тайлбарлаж чадаагүй 45,000,000 төгрөгийг улсын орлого болгуулахаар шүүхэд хүсэлт гаргасан байна. Дүүргийн эрүү, иргэний хэргийн хялбар ажиллагааны анхан шатны тойргийн шүүхээс уг асуудлыг хянан үзэж, Шүүхийн тухай хуулийн 22 дугаар зүйлийн 22.5 дахь хэсэг, Авлигын эсрэг хуулийн 33 дугаар зүйлийн 33.2 дахь хэсэг, Зөрчлийн тухай хуулийн 4.1 дүгээр зүйлийн 3 дахь хэсэгт заасныг удирдлага болгон Авлигатай тэмцэх газрын барьцаа, хохирлын дансанд байршуулсан 45,000,000 төгрөгийг улсын төсөвт төвлөрүүлэхээр шийдвэрлэжээ.

            Тэгвэл орлогоо нотолж чадахгүй, 45 сая төгрөгийн автомашинаа хураалгасан этгээд Баянгол дүүргийн Худалдан авах ажиллагааны албаны ахлах мэргэжилтэн А.Алтангэрэл гэгч байжээ. Тэрбээр өнгөрсөн 2025 оны нэгдүгээр сард уг албан тушаалд томилогдсон байна. Харин 2024 онд Худалдан авах ажиллагаан албанд ажиллаж эхэлжээ.

            А.Алтангэрэл хөрөнгө орлогоо мэдүүлэхдээ жилийн 39 сая төгрөгийн орлоготой, гэр бүлийн орлого нь 104 сая төгрөг гэж мэдүүлсэн байна. Мөн 529 сая төгрөгөөр үнэлэгдэх хоёр орон сууцтай, гурван авто машинтай гэжээ. Ингэхдээ Жийп болон туулах чадвар өндөр, Lexus, RX 450- 1,Суудлын жижиг машин,BMW, 328I- 1,Жийп болон туулах чадвар өндөр,Subaru, Outback- 1 гэсэн бөгөөд 180 сая төгрөгийн үнэлгээтэй гэж мэдүүлжээ. Үүнээс гадна дотоодын хадгаламжинд долоон сая төгрөг, 20 сая төгрөгийн зээлтэй гэжээ.

            Ингэж мэдүүлсэн учир АТГ-ын мөрдөгчид нягталж, сүүлд авсан Lexus, RX 450 автомашиных нь эх үүсвэрийг шалгаж, тодруулж эхэлжээ. Ингээд 45 сая төгрөгийн үнэлгээтэй автомашинаа хэрхэн, ямар мөнгөөр авснаа тайлбарлаж чадаагүй учир улсын орлого болгон хураасан байна.

А.АЛТАНГЭРЭЛ: 45 САЯ ТӨГРӨГИЙН АВТОМАШИН ХУРААЛГАСАН ЭСЭХЭЭ ТОДРУУЛЧИХААД ЭРГЭЭД ХЭЛЬЕ

            Ахлах мэргэжилтэн А.Алтангэрэл сахилгын шийтгэл ногдуулаагүй бөгөөд хэвийн ажлаа хийж байгаа гэнэ. Угтаа дотоод хяналт, шалгалтаар хэнээс, хэр хэмжээний мөнгө авсан, хахууль авсан уу зэргийг шалгах ёстой. Гэтэл шалгалтын ажиллагаа явагдаагүй гэнэ.

Бид 45 сая төгрөгийн автомашинаа хураалгасан ахлах мэргэжилтэн А.Алтангэрэлтэй холбогдож, энэ асуудлаар тодруулахад “Сайн мэдэхгүй, тодруулчихаад эргээд хэлье” гэв.