ДЭЛХИЙ, САРЫГ ХҮН ТӨРӨЛХТӨНД ДЭРГЭДЭЭС НЬ ХАРУУЛЖ ЧАДСАН “АРТЕМИС-II” НИСГЭГЧИД

2026-04-08, 1666

Хүн төрөлхтөн сарыг зорьж, сар руу нисэж байгаагүй юм биш, нисэж байсан. Сарыг зорьсон нисгэгчид өөрсдийн нөөц бололцоо, чадах чинээгээрээ саранд хүрч, түүний тухай түүхэнд тэмдэглэн үлдээсэн байдаг. Тэгвэл энэ түүхэн амжилтын хамгийн дээд рекордыг “Артемис-II” нислэгт оролцож буй Наса агентлагийн сансрын нисгэгчид бүтээж чадсан бахдам гавьяатай, тэдний ачаар сарны нөгөө талыг дэлхий даяараа харж чадсан гайхалтай өдрүүд үргэлжилж байна.

Тодорхой өгүүлбэл, хүнтөрөлхтөн өмнө нь хэзээ ч харж байгаагүй сарны алслагдсан бүсэд хүрснээрээ, дэлхийгээс 406.770 км холдож, дээд амжилт тогтоосноороо онцгой юм. Сарны алслагдсан хэсэгт хүрч чадсан нисгэгчид гадаргууг нь нарийвчлан харж зургийг нь дарж Наса агентлаг руу илгээсэн нь өдгөө энэ зургууд.

|Орион хөлөг|

ТҮҮХЭН ГАВЬЯАТАЙ НИСГЭГЧИД

Сарыг зорьсон энэ баг “Орион” хөлгөөр 10 хоног сарны аялал хийхээр зорьсон байдаг. Түүхэн энэ үйл явдлын гол баатрууд бол НАСА агентлагийн сансрын нисэгч Рид Уайзмен, Виктор Гловер, Кристина Кох болон Канадын Жереми Хансен нар юм. Аяллын гурав дахь хоног дээр нь Насагийн сувгаар сансрын нисгэгчдийн сэтгэгдлийг хүргэсэн байна. Энэ үеэр багийн ахлагч хөлгийн ахмад, багийн ахлагч Рид Уайзмен “Дээрээс харахад дэлхий үнэхээр үзэсгэлэнтэй. Африк Европ Ази гэсэн хил хязгаар алга. Бид бүгд нэг гариг дээр амьдарч байгаа нэг л хүн төрөлхтөн” гэсэн байна. Тэд ийнхүү 10 хоног сарыг тойрох даалгавраа амжилттай биелүүлж, энэ хугацаанд олон ч туршилтыг хийсээр буцаж буй юм байна.

-1970 онд “Аполло 13”-ын тогтоосон 400 мянган клометрын дээд амжилтыг “Артемис-II” нислэгт оролцож буй Наса агентлагийн сансрын нисгэгчид давж чадсан-

Тэд сарны ард талд хүрч, зураг авснаас гадна сонирхолтой нэгэн мэдээлэл нь тэндээс шинээр илрүүлсэн хоёр тогоонд нисгэгчид нэр санал болгосон гэнэ. Тэд нэгэнд нь капсулынхаа нэр болох "Integrity" нөгөөд нь багийн ахлагч Рийд Вайзманы 2020 онд хорт хавдраар нас барсан эхнэрийн дурсгалд зориулж Кэрролл нэрийг өгчээ. Нэр өгөх тухай ярианы мөчид командлагч Вайзман нулимс дуслуулж, дөрвөн сансрын нисгэгч тэврэлдэн уйлсан нь шууд дамжуулалтын үеэр бичигдсэн гэдгийг ч тус агентлагаас онцолсон.

Энэ удаагийн нислэгээр багийнхан 1970 онд “Аполло 13”-ын тогтоосон 400 мянган клометрын дээд амжилтыг давсан нь хүний хүсэл мөрөөдөл хязгааргүйгээс гадна техник технологийн дэвшил илүү өндөр түвшинд хөгжиж, хүн төрөлхтөн юунд ч хүрч, юуг ч бүтээж чадахыг харуулсан бахдам үйл явдал юм.

ДЭЛХИЙ, САРЫГ ХҮН ТӨРӨЛХТӨНД ДЭРГЭДЭЭС НЬ ХАРУУЛЖ ЧАДСАН “АРТЕМИС-II” НИСГЭГЧИД

АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.