Бид Соёлын гавьяат зүтгэлсэн, зохиолч Гун-Аажавын Аюурзаныг "Эргэлт" сэтгүүлийнхээ анхны дугаарт онцлон ярилцаж, "Эргэлтийн хоймор" буландаа нийтэлж байсан билээ.  Бид түүний манай сэтгүүлчид өгсөн “Миний сул тал бол өөртөө үргэлж итгэлтэй байдал” хэмээх ярилцлагаас 10 эшлэлийг онцлон уншигч та бүхэнд хүргэж байна. 

-Өөрийг нь мэддэг, ойлгодог, хайрладаг тийм хүмүүсийнхээ дунд л хүн өөрийнхөөрөө байж чаддаг.

-Дүр гэдэг бол үг үйлд­лээрээ биш, бодол санаагаараа тодордог зохиогчийн дотоод “би” юм.

-Зохиолч хүн анхнаасаа өөртэй нь хамт байсан тэр “би” хэмээх дүртэйгээ нийлж л зохиолынхоо утга санааг олдог.

-80 гарсан ч яруу найрагч хэвээрээ, шүлэгт шимтсэн янзаараа явж чадаж байж л хүн уран бүтээлч байдгийг гэнэт ойлгох шиг болсон. 

-Гурваас илүү тооны жинхэнэ түвшний зохиол бичиж чадвал л сая жинхэнэ зохиолч гэгдэх боломжтой.

-Зохиолч хүнд өөрийнхөө тухай, тэр дундаа зохиолынхоо тухай ярих нь тааламжгүй үр дагавар авчир­даг. 

 -Бүх зүйлийг сөргөөр харж байгаа бол тэр өөрөө сөрөг хүн. Бусдыг муугаар боддог л бол өөрөө муу хүн. 

-Хэрэв чамд бүх зүйл муухай сэтгэгдэл төрүүлдэг бол, дотоод ертөнцдөө гэгээ тусгаж, өөрийгөө эртхэн засч залж авахгүй бол, ойр тойрны чинь хүмүүст энэ сөрөг араншин халдварласаар л, сэм сэмхэн газар авсаар л байх болно.

-Амьдрал өөрөө их сонирхолтой, сайхан зүйл. Нэг жаахан хүүхэд учиргүй тусч царайлаад орцны хаалга барьчихсан хүлээж байх нь ч, гараад алхахад хажуугаар нэг шувуу нисээд өнгөрөх нь ч, үүлэн чөлөөгөөр нар гялсхийх нь ч сайхан зүйл.

- Хүнийг гомдоох үгийг нэгэнт хэлчихсэн бол цайруулах аргагүй"  хэмээн ярьсан байдаг. 

     Ташрамд дурдахад, зохиолч Г.Аюурзанын "Бөөгийн домог" романыг франц хэлээр хэвлэжээ.Тус роман нь  2010 онд анх уншигчдад хүрч байсан билэээ. Тэрбээр энэ тухай “Нууцат арал”, “Парисын Дар эхийн сүм”, “Монте-Кристо гүн”, “Бяцхан хунтайж”, “Жамаараа яваа ертөнц”-ийг шимтэн уншиж явсан хүүхэд насанд минь “Энэ номууд бичигдсэн хэлээр хожим чиний зохиол хэвлэгдэнэ ээ” гэж хэн нэгэн хэлсэн бол би яавч итгэхгүй байсан даа. Орчуулахад амаргүй зохиолыг зоригтой сонгосон Р.Мөнхзул, романыг минь анх уншсан цагаасаа л франц хэлт уншигчдын хүртээл болгох гэж тууштай зүтгэсэн Жэгом Бушодоо гүн талархаж байна" гэсэн байна.

    Харин түүний гэргий Л.Өлзийтөгс өөрийн цахим хуудастаа “Бөөгийн домог”-ийн франц хэвлэлийг хүлээн авлаа. Хамгийн дуртай монгол роман минь. Бас редакторласан номуудаас минь хамгийн шилдэг нь. Миний редакторласан ном учраас миний хүү л гэсэн үг" хэмээсэн байв.