Соёл урлагийн их сургуулийг Л.Чаминчулуун, Б.Хишигзаяа багш нарын удирдлага дор 2023 онд төгсөөд аравдугаар сараас эхлэн Монгол Улсын Хүүхэлдэйн театрт ажиллаж буй "Пиноккио" хүүхэлдэйн жүжгийн гол дүрийг бүтээж буй залуу уран бүтээлч Д.Сугирбаатартай ярилцлаа.

“Пиноккио” жүжигт тоглох санал анх ирэхэд ямар сэтгэгдэл төрсөн бэ?

– Хүүхэлдэйн жүжиг учраас тайзан дээр шууд жүжиглэж, дуулж явах шаардлагатай тул бага зэрэг айдас төрсөн. Пиноккио гэдэг дүрийг өмнө нь хүүхэлдэйн киноноос мэддэг байсан учраас маш сэргэлэн атлаа гэнэн, цайлган хүүхдийн төсөөлөлтэй байлаа.

Пиноккио бол хүүхдийн гэнэн зан, худал хуурмаг, өсөж төлөвшиж буй үйл явцыг илэрхийлдэг дүр. Үүнийг тайзан дээр гаргахад хамгийн хэцүү нь юу байв?

– Муу үлгэр дуурайлалд автаж, буруу замаар явж байгаад цэнхэр дагинад “би сайн хүүхэд болмоор байна” хэмээн хэлдэг хэрнээ цэнгэлийн орон руу татагддаг хэсэг бий. Энэ үед дүрийнхээ дотоод эргэлзээг илэрхийлэх нь надад хамгийн хэцүү санагдсан. Тиймээс хүүхдийн гэнэн хонгор зан, юмсыг анх удаа харж, мэдэрч буй мэт сэтгэлзүйн бэлтгэл хийж, дүрдээ орохыг хичээсэн.

Гурван жүжигчин хамтарч Пиноккиогийн дүрийг бүтээсэн. Бие биеэ хэрхэн мэдэрч жүжиглэв?

– Би толгой болон эх биеийг, Э.Билгүүн эгч маань хоёр хөл, хоёр гарыг, харин жүжигчин Г.Хонгорзул тус тус хариуцаж авсан. Билгүүн эгчийн хийсэн өчүүхэн жижиг хөдөлгөөнийг ч би шууд мэдэрч, гурвуулаа нэгэн цул болсон мэт мэдрэмж төрдөг байсан нь маш сэтгэл хөдлөм байлаа. Өмнө нь “Морин хуур” хүүхэлдэйн драмд хамт тоглож байсан маань ч нөлөөлсөн болов уу.

Хүүхдийн жүжигт тоглох нь насанд хүрэгчдэд зориулсан жүжгээс юугаараа ялгаатай вэ?

– Том хүмүүс жүжгийг шүүн, дүгнэж үздэг бол хүүхдүүдийн хувьд бүх зүйл шинэ, содон байдаг. Тэд жүжгийн нэг хэсэг болж, бидэнтэй хамт хөгжилддөг. Тиймээс хүүхдүүдэд аль болох үнэн, чин сэтгэлээсээ тоглохыг л зорьдог.

Энэ жүжгээр дамжуулж үзэгчдэд ямар мессеж хүргэхийг хүссэн бэ?

– Хэрвээ Пиноккио шиг аавыгаа гомдоосон бол яах ёстой вэ, хичээлдээ шамдаж, хичээвэл хүсэл мөрөөдөлдөө хүрч болдог гэдгийг хүүхдүүд ойлгоосой гэж хүссэн. Жүжгийн төгсгөлд би Пиноккиогийн хувцсаа өмссөн хэвээр жинхэнэ жаал хүү болж гарч ирдэг. Жүжиг дууссаны дараа хүүхдүүд “та жинхэнэ жаал хүү боллоо, баяр хүргэе” гэж хэлэхэд тэдний итгэл, хүсэл тэмүүллийг алдах эрх надад байхгүй юм байна гэдгийг улам илүү ойлгож, илүү их хичээх урам зориг авсан.

Цаашид хүүхдэд зориулсан уран бүтээлд дахин тоглох сонирхол бий юу? Таны цаашдын зорилго юу вэ?

– “Морин хуур” хүүхэлдэйн драм шиг уран бүтээл, эсвэл гадаадын алдартай зохиолуудад тоглох сонирхол бий. Цаашид олон улсад Монгол Улс авьяастай, гайхалтай уран бүтээлчидтэй орон гэдгийг харуулах нь миний зорилго.

Жүжигчин хүн бүр бүтээхийг хүсдэг дүртэй байдаг. Таны хувьд тэр нь хэн бэ?

– Францын алдарт зохиолч Жан Батист Мольерийн “Аргагүйн эрхэнд оточ” сонгодог инээдмийн жүжгийн Сканрелийн дүрийг мэргэжлийн тайзан дээр бүтээхийг хүсдэг.

Ярилцсанд баярлалаа.

– Баярлалаа.