Австралийн хөрөнгийн биржид бүртгэлтэй "Jade Gas" компани Тавантолгойн орд дахь нүүрсний давхаргын метан хийн төслийн нэгдүгээр шатны ажлыг эхлүүлэхээр бэлдэж байна. Төслийн эхний шатанд нийт 175 цооног өрөмдөж, бааз, авто зам, холбоо дохиолол болон 150 сая ам.долларын өртөг бүхий шингэрүүлсэн байгалийн хийн (LNG) үйлдвэр барихаар төлөвлөжээ.

    Эхний ээлжинд баригдах LNG үйлдвэр нь 40 орчим цооногийн хийг эдийн засгийн эргэлтэд оруулах бөгөөд цаашид олборлолт нэмэгдэхийн хэрээр үйлдвэрийн хүчин чадлыг үе шаттайгаар өргөжүүлэх юм.  Энэхүү төсөл нь дотоодын дизель түлшийг орлуулах, улмаар бүс нутгийн эрчим хүчний аюулгүй байдлыг хангахад чухал ач холбогдолтойд тооцогдож байна.

    Түүнчлэн "Jade Gas" талбайн үйл ажиллагаагаа дэмжих болон Хонконгийн хөрөнгийн биржид давхар бүртгүүлэх бэлтгэл ажлыг санхүүжүүлэх зорилгоор 11 сая австрали долларын нэмэлт хөрөнгө оруулалтыг амжилттай босгоод байна.