Хяналт шалгалтын дүнд зөрчил гаргасан 8627 гадаадын иргэнд Зөрчлийн тухай хуульд заасны дагуу торгууль ногдуулж, 27 аж ахуйн нэгж, байгууллагад зөрчлөө арилгах тухай албан шаардлага хүргүүлсэн байна.

   Зөрчилд холбогдсон гадаадын иргэдийн 91.1 хувь нь уригч байгууллага, 8.6 хувь нь уригч иргэн, 0.2 хувь нь хувь хүнтэй холбоотой зөрчилд бүртгэгджээ. Зөрчлийн төрлөөр нь авч үзвэл, оршин суух зөвшөөрлийн хугацааг хэтрүүлсэн тохиолдол 46.1 хувь, хуульд заасан хугацаанд оршин суух зөвшөөрөл аваагүй зөрчил 41.3 хувийг тус тус эзэлж байна.

   Түүнчлэн оршин суух зөвшөөрлийн хугацаа дууссан ч Монгол Улсаас гарахаас зайлсхийсэн, эрх бүхий байгууллагын зөвшөөрөлгүй хөдөлмөр эрхэлсэн, ирсэн зорилгоосоо өөр үйл ажиллагаа явуулсан зэрэг үндэслэлээр 33 улсын 465 гадаадын иргэнийг Монгол Улсад дахин нэвтрэх эрхийг нь тодорхой хугацаагаар хязгаарлан албадан гаргажээ.

   Өнгөрсөн оны мөн үетэй харьцуулахад зөрчилд холбогдсон гадаадын иргэдийн тоо 25.1 хувиар, зөрчил гаргасан уригч хуулийн этгээдийн тоо 16.5 хувиар өссөн байна. Харин зөрчил гаргасан уригч иргэдийн тоо 10 хувиар, албадан гаргасан гадаадын иргэдийн тоо 0.9 хувиар буурсан үзүүлэлттэй гарчээ.