Монгол, Тажикистаны харилцаанд шинэ өнгө нэмсэн төрийн айлчлал үргэлжилж байна. Хоёр улсын төрийн тэргүүний албан ёсны хэлэлцээ нь өнгөрсөн хугацааны ололтоо бататгаад зогсохгүй, ирээдүйн хамтын ажиллагааны шинэ гарцуудыг нээсэн ач холбогдолтой уулзалт боллоо. Айлчлалын хүрээнд худалдаа, эдийн засаг, боловсрол, байгаль орчин, хөдөө аж ахуй, геологи, зам тээвэр, залуучууд, спорт зэрэг салбарыг хамарсан 11 баримт бичигт гарын үсэг зурсан нь хоёр улсын иргэдийн амьдралд ойр, бодит үр өгөөжтэй болгох чухал алхам болж байна.

   Монголоос малын мах, махан бүтээгдэхүүн, ноос, ноолуур, арьс шир Тажикистаны зах зээлд илүү өргөн хүрээнд хүрэх боломж нээгдэж, Тажикистанаас өндөр чанартай жимс, жимсгэнэ, хөвөн, нэхмэлийн бүтээгдэхүүн Монголын зах зээлд тогтвортой нийлүүлэх нөхцөл бүрдэж байна. Үүнээс ч илүү үнэ цэнтэй нь Монголын ноолуур, Тажикистаны хөвөнг нэгтгэн нэмүү өртөг шингэсэн хамтарсан үйлдвэрлэлийн эхлэлийг тавьж буй явдал юм.

   Төрийн айлчлалын хүрээнд Монгол Улс, Бүгд Найрамдах Тажикистан Улсын Худалдаа, эдийн засаг, шинжлэх ухаан, техникийн хамтын ажиллагааны Засгийн газар хоорондын комиссын анхдугаар хуралдааныг зохион байгууллаа. "Монгол-Тажикистаны бизнес форум" нь айлчлалын үр дүнг эдийн засгийн хамтын ажиллагаатай холбосон онцлох үйл явдал байлаа. Бизнесийн зөвлөл байгуулах, компаниудын хамтын ажиллагааг өргөжүүлэх, хөрөнгө оруулалтын шинэ боломжуудыг нээх тохиролцоонууд нь хоёр улсын хувийн хэвшилд шинэ зах зээл, шинэ түншлэл, шинэ боломжийг нээж байна.

   Соёл урлаг ч энэхүү айлчлалын нэгэн гүүр болж байна. Тажикистаны уран бүтээлчдийн тоглолт, үзэсгэлэн нь хоёр улсын ард түмнийг урлагаар ойртуулж, нөхөрлөлийг улам бататган, соёл, аялал жуулчлал, боловсролын хамтын ажиллагаанд чухал хувь нэмэр орууллаа. Монгол, Тажикистаны хамтын ажиллагааны энэ шинэ хуудас хоёр орны ард түмний нөхөрлөл, харилцан итгэлцэл, хамтын хөгжлийн бат бөх суурь болж үлдэнэ гэдэгт итгэлтэй байна.