Гадаад харилцааны сайд Б.Батцэцэг НҮБ-ын Хөгжлийн хөтөлбөр (UNDP)-ийн Суурин төлөөлөгч Матилда Димовскаг томилолтын хугацаа нь дуусаж буйтай нь холбогдуулан хүлээн авч уулзлаа. Уулзалтын үеэр Монгол Улс, НҮБ-ын Хөгжлийн хөтөлбөрийн хамтын ажиллагаа жил ирэх тусам өргөжин бэхжиж, цахим шилжилтыг онцлов. Мөн уур амьсгалын өөрчлөлтөд дасан зохицох, гамшгийн эрсдэлийг бууруулах, засаглалын шинэчлэл, тогтвортой хөгжил зэрэг олон чухал чиглэлд бодит ахиц дэвшил гарсныг сайшаан тэмдэглэлээ.

   Мөн Монгол Улсын хөгжил, олон улсын хамтын ажиллагааг бэхжүүлэх үйлсэд оруулсан үнэтэй хувь нэмрийг нь өндрөөр үнэлж, Монгол Улсын Ерөнхийлөгчийн зарлигаар хүртээсэн "Найрамдал" медалийг Суурин төлөөлөгч Матилда Димовскад гардуулан өглөө.

   Түүнчлэн Монгол Улсад ажиллах хугацаандаа манай улсын хөгжилд үнэтэй хувь нэмэр оруулж, чин сэтгэлээсээ хамтран ажилласанд нь талархал илэрхийлэн, Гадаад харилцааны яамны "Алтан гэрэгэ"-г дурсгал болгон гардууллаа. Суурин төлөөлөгч Матилда Димовскад цаашдын ажил, амьдралд нь өндөр амжилт, аз жаргал, сайн сайхан бүхнийг хүсэн ерөөв.