Монгол Улсын Шадар сайд Н.Номтойбаяр стандартын хэрэгжилтийг сайжруулах чиглэлээр боловсруулсан хуулийн төсөл болон эрх зүйн шинэчлэлийн талаар мэдээлэл өглөө. Тэрбээр уг хуулийн төсөл батлагдсанаар стандартын шаардлагыг бүх салбарт илүү хатуу мөрдүүлж, хэрэгжилтэд тавих хяналтыг эрчимжүүлэх бодлого хэрэгжинэ гэдгийг онцолсон байна.

   Мөн энэхүү шинэчлэл нь иргэдийг эрүүл, аюулгүй орчинд ажиллаж, амьдрах нөхцөлөөр хангахад бодит ахиц авчирна гэдгийг дурдлаа.

   Тухайлбал, стандартын шаардлага хангаагүй барилга, байгууламжийг улсын комисс хүлээн авахгүй бөгөөд улсын төсвөөс санхүүжилт олгохгүй байх зарчмыг мөрдөхөөр тусгажээ. Ингэснээр барилгын чанар, аюулгүй байдлыг дээшлүүлж, стандартын хэрэгжилтэд тавих төрийн хяналтыг шинэ шатанд гаргах зорилготой юм.

   Түүнчлэн стандартын тогтолцоог боловсронгуй болгож, хууль эрх зүйн шинэчлэлийг үе шаттай хэрэгжүүлснээр үйлдвэрлэл, бүтээн байгуулалт, төрийн үйлчилгээний чанар, аюулгүй байдал, байгууллагын хариуцлагыг нэмэгдүүлэхэд чиглэн ажиллаж байгааг Шадар сайд онцоллоо.