Нийслэлийн хэмжээнд өнгөрсөн хоногт гурван удаагийн гал түймрийн дуудлага бүртгэгдэж, Онцгой байдлын алба хаагчид шуурхай ажиллан галыг унтраажээ.

   Тодруулбал, Баянзүрх дүүргийн тавдугаар хороонд хогийн сувагт утаа гарч байна гэсэн дуудлага 19:03 цагт ирсэн байна. Дуудлагын дагуу тус дүүргийн Онцгой байдлын хэлтсийн 63 дугаар ангийн алба хаагчид ажиллахад 2х2 метрийн хэмжээтэй хогийн сувагт хог шатаж байсныг унтраасан бөгөөд утаажилтын бүсээс 22 иргэн /13 том хүн, есөн хүүхэд/-ийг аюулгүй газарт гаргажээ.

   Мөн Хан-Уул дүүргийн 24 дүгээр хороонд байрны гадна фасад шатаж байна гэсэн дуудлага 23:45 цагт бүртгэгдсэн байна. Гал түймрийн голомтод тус дүүргийн Онцгой байдлын хэлтсийн 14 дүгээр ангийн алба хаагчид ажиллаж, 6х6 метрийн хэмжээтэй байрны гадна фасадад гарсан галыг бүрэн унтраасан байна.

   Харин өнөөдөр буюу долоодугаар сарын 21-ний өдрийн 05:35 цагт Баянзүрх дүүргийн 5 дугаар хороонд автомашин шатаж байна гэсэн дуудлага иржээ. Алба хаагчид очиход иргэн Г-гийн эзэмшлийн "Toyota Prius 41" загварын автомашины хөдөлгүүрийн хэсэг болон ойролцоох 2х2 метрийн хэмжээтэй хогийн сувагт хог шатаж байсныг унтраасан байна. Мөн утаажилтын бүсээс 11 иргэн /долоон том хүн, дөрвөн хүүхэд/-ийг аюулгүй газарт гарган ажиллажээ.