Хууль тогтоох дээд байгууллага УИХ-д 16 жил суусан улстөрчид эхнээсээ халаагаа өгч, үргэлжлүүлээд улс төрд залгамж халаагаа бэлддэг ужгирсан тогтолцоо манайд бий болж байна. Өөрөөр хэлбэл, ус төрд насаараа зүтгэсэн УИХ-ын гишүүд тэтгэвэртээ гарахдаа өөрсдийн угсаа залгамжлах үе удмаа бэлдээд буудаг, эсвэл Элчиин сайдын суудалтай буцдаг бичигдээгүй хууль Монголын төрд уламжлагдаж байна. Адаглаад 10 жил улс төрд зүтгэдэггүй юм гэхэд араасаа залгамж халаа бэлдэх, шинэ моод ч дэлгэрч байна. Угтаа бол Монголын төрд тэдэнд өртэй юм шиг аягладаг улстөрчидийн цуваа уртаас урт үргэлжилж байна.

        Энэ удаагийн сонгуулиар улс төр дэх загамж халаа дахин үргэлжлэх юм. Аав нь насаараа УИХ-д сонгогдож, сайд, даргын суудалд тухалчихаад араасаа хүүхдүүдээ залгамжлуулахаар зүтгүүлж буй улстөрчдийн буухиаг эргэн сануулъя.

УИХ-ЫН ДАРГА АСАН Р.ГОНЧИГДОРЖИЙН ОХИН УЯНГАХИШИГ

     Тэрбээр МУИС-ийн Хууль зүйн сургуулийг хуульч мэргэжлээр сурч төгссөн. Магистрын зэргийг Германы Бонн хотын их сургуульд хамгаалсан. Хуулийн компанид мэргэжлээрээ 10 гаруй жил ажилласан. Үүний дараа “Шунхлай групп”-ийн Үйл ажиллагаа хариуцсан захирлаар хоёр жил, Голомт банкны Хуулийн хэлтсийн захирлаар гурван жил ажилласан. Одоо “Инвескор Капитал” үнэт цаасны компанийн гүйцэтгэх захирлаар ажиллаж байгаа гэх. Түүний аав Р.Гончигдорж нь Монголын нэрт математикч, шинжлэх ухааны хөгжилд үнэтэй хувь нэмэр оруулсан эрдэмтнээс гадна УИХ-ын гишүүн, УИХ-ын дарга, Ардчилсан намын даргын албыг хашиж ирсэн туршлагатай парламентч гэдгийг олон нийт мэднэ. Харин одоо Г.Уянгахишиг аавынхаа үйл хэргийг үргэлжлүүлэхээр УИХ-ын гишүүн болохоор хүч үзэж байгаа. Тэрбээр ХҮН намын жагсаалтын эхний 10 дугаарт эрэмбэлэгдээд байна. Өөрөөр хэлбэл, ХҮН намаас тойргоос нэр дэвшигчидээс таван суудал авахад түүнийг УИХ-д суух эрх бүрэн нээгдэх юм. Тиймдээ ч ХҮН намаас жагсаалтын дээгүүрт эрэмбэлэгдээд буй.

ЕРӨНХИЙЛӨГЧ АСАН Н.ЭНХБАЯРЫН ХҮҮ УИХ-ЫН ГИШҮҮН БАТШУГАР

     Н.Энхбаярын хүү Э.Батшугар Ерөнхийлөгч Х.Баттулгын зөвлөхөөр томилогдож улстөрд орж ирсэн гэхэд болно. Тэрбээр одоо УИХ-ын гишүүн, Инноваци цахим бодлогын байнгын хорооны даргаар ажиллаж байгаа. Түүний хувьд Монголбанкны дэд ерөнхийлөгчөөр ажиллаж байсан туршлагатай, хуульч мэргэжилтэй юм. Тэрбээр Сонгинохайрхан дүүргийн УИХ-ын нөхөн сонгуульд МАН-аас нэр дэвшиж гишүүн болсон. Энэ удаагийн сонгуульд тэрбээр 11 дүгээр тойрог буюу Сонгинохайрхан дүүрэгт нэр дэвшиж байгаа юм.

УИХ-ЫН ГИШҮҮН Ц.ШИНЭБАЯР АГСНЫ ХҮҮ БЯМБАСҮРЭН

      УИХ-ын гишүүн, Хамуг Монголын Хөдөлмөрийн намын дарга асан Ц.Шинэбаярын хүү Бямбасүрэн Дорнод, Сүхбаатар, Хэнтий аймагт Ардчилсан намаас нэр дэвшиж байгаа. Түүний аав 2008-2012 онд Дорнод аймгаас сонгогдож, УИХ-ын гишүүн болж байжээ. Харин Бямбасүрэн АНУ-д ахлах сургуулиа дүүргэж, улмаар Англи, Австралийн Их сургуульд бакалавр, магистрт суралцан эдийн засагч мэргэжил эзэмшжээ. Эхнэр Ч.Ариунсэлэнгэ болон хүү, охиныхоо хамт Чойбалсан хотдоо аж төрж, 1996 онд аавынхаа үүсгэн байгуулсан “Найнги” компанийн үйл ажиллагааг  үргэлжлүүлэн авч яваа аж.

УИХ-ЫН ГИШҮҮН АСАН Н.БАТБАЯРЫН ОХИН ЖАРГАЛАН

       УИХ-ын гишүүн, Эдийн засгийн хөгжлийн сайд асан Н.Батбаярын охин Жаргалан Ардчилсан намаас нэр дэвшиж байгаа. Тэрбээр Колумбын их сургуулийг эдийн засагч мэргэжлээр дүүргэсэн. "Монгол түлхүүр" ХХК-ийн гүйцэтгэх захирал,  Ардчилсан эмэгтэйчүүдийн холбооны тэргүүн дэд ерөнхийлөгч, АН-ын ҮБХ-ны гишүүний сонгуульт ажилтай. Түүнийг УИХ-ын гишүүн асан Н.Батбаярын охин гэдгээр нь олон нийт илүүтэй танина. Б.Жаргалангийн хувьд Ардчилсан эмэгтэйчүүдийн холбооны тэргүүнээр сонгогдсон. УИХ-ын сонгуульд Ардчилсан намын жагсаалтын эхний 20-т багтаж байна. Түүнийг жагсаалтад эмэгтэйчүүдээ төлөөлөн дээгүүрт эрэмбэлэгдэнэ гэх таамаг байсан ч эхний 10-т багтаагүй. Гэвч тэрбээр жагсаалтад чамлахааргүй дугаарт эрэмбэлэгдсэн учир УИХ-д суух магадлал өндөр байгаа юм.