• Өнөөдөр 2024-03-29

Ч.МӨНГӨНЖИГҮҮР: Шүхэрчин ааваараа бахархаж өссөн болохоор шүхрийн спортод дуртай болсон

2023-02-28,   451

       Цэнхэр тэнгэрт шувуу шиг дүүлэх нь хэн бүрийн хүсэл болов уу. Эрх чөлөөг мэдэрч, хязгааргүй орчинд бүхнийг өндөр дээрээс ажиглаж, хацар элбэх салхи, хамгийн цэнгэг агаарыг хүртэхийг хүсдэг. Энэ үлгэрийн мэт мэдрэмжийг мэдэрдэг шүхэрчин Ч.Мөнгөнжигүүртэй бид ярилцлаа. Тэрбээр намайн жил тус аюултай хэр нь сэтгэл догдлуулсан спортоор хичээллэж байгаа гэнэ. Түүний гэр бүлийнхэндээ сар шинийн мэндчилгээ дэвшүүлэн гэрийнхээ дээгүүр шүхрээр нисэж байгаа дүрс бичлэг цахим сүлжээнд олон эерэг хандалт аваад байгаа билээ.

-Сар шинэдээ сайхан шинэлсэн үү. Таны гэрийнхэндээ баяр мэнд хүргэж гэрийнхээ дээгүүр нисэж байгаа дүрс бичлэг цахим хуудаснаа эерэг хандалт авсан шүү дээ. Тус мэндчилгээний талаар ярихгүй юү?

                -Сар шинэ сайхан боллоо, би уг спортоор хичээллээд найман жил болжээ. Одоо уулын шүхрийн спортын багш, дасгалжуулагчаар ажиллаж байна. Би Сэлэнгэ нутгийн хүүхэд. Ээж ах нар минь нутагтаа ажиллаж, амьдарч байгаа. Жил болгон сар шинээр ээждээ очиж үнсүүлдэг. Энэ жил дүрс бичлэг дээр гарч байгаа нислэгийн хөдөлгүүрийг авсан юм. Тэгээд гэрийнхэндээ сонин болгож, мэндчилгээ хүргэж нислэг хийсэн дээ.

-Зориулалтын бус газар ниссэн учраас гэрлийн шон, цахилгааны утас саад болсон уу. Гэрийнхэн нь мэндчилгээг нь хэрхэн хүлээж авсан бэ?

                -Аюулгүй байдлыг харж, тооцоолж шүхрээр ниссэн. Энэ спортоор хичээллэдэг хүн бүрийн хамгийн эхний алхам нь өөрийн болон бусдын аюулгүй байдлыг хангах байдаг. Өмнө нь нисэж басан учраас их зүйл бэлдээгүй ээ. Харин гэр бүлийнхэндээ зориулж анх удаа нислэг хийлээ. Гэрийнхнээс гадна ирсэн зочид, намайг харсан хүмүүст их сонирхолтой санагдаж, огшсон гэсэн. Тэр дундаа хүүхдүүдэд их таалагдсан байсан.

-Шүрхийн спортын юу нь таны сонирхлыг татсан юм бэ?

                -Би шүрхийн спортоор сонирхож хичээллээд найман жил, хоббигоо ажил болгоод дөрвөн жил болж байна. Угтаа би чинь эрх зүйч мэргэжилтэй хүн. Аав минь шүхэрчин хүн байсан нь нөлөөлсөн дөө. Ер нь хүн бүрд нисэх мөрөөдөл байдаг байх. Цэнхэр тэнгэрт нисэхийг мөрөөддөг хүүхэд бүрийн бодол, мөрөөдөл надад ч бас байлаа. Мөрөөдөлөө л биелүүлсэн хэрэг юм уу даа.

-Анхны нислэгээ санадаг уу. Тухайн үед ямар мэдрэмж авч байсан бэ?

                -Хүн бүр надаас анх нисэхдээ ямар мэдрэмж авч байсан талаар асуудаг. Би төдийлөн сайн санадаггүй юм. Гэхдээ анх нисэхдээ ч айж байгаагүй, дурлаж, хүсэж нисэж байлаа. Хэдий би санахгүй байгаа шавь нартаа, анх нислэг хийх гэж байгаа хүн бүрд анхны мэдрэмжээ дахин авч чадахгүй учраас бүү мартаарай гэж захидаг.

- Шүхэртэй ниссэн хамгийн өндөр цэг нь хэдэн метр байсан бэ?

                -Миний хамгийн өндөр цэг газраас дээшээ 2000 метр байсан даа.

-Нисэж байхдаа юуны талаар боддог вэ. Бүхнийг дээрээс харах үед  ямар мэдрэмж төрдөг вэ?

                -Нисэж байхдаа өөрөөрөө бахархах мэдрэмжийг л их авсан даа. Одоо бол ажил болгон хийж байгаа учраас анх нисэж байгаа хүн шиг хөөрч, догдолсон мэдрэмжээ тайлбарлаж чадахгүй байх.

-Шүхэрээр нисэхийн тулд мэргэжлийн үнэмлэх, сургалт шаарддаг уу. Юун дээр хамгийн их анхаарах шаардлагатай вэ?

                -Тодорхой хэмжээний өндөрт нисэж байгаа учраас аюулгүй нисэх заавар сургалтад заавал суудаг. Сургалтаар заасан зааврыг ягштал мөрдөх хэрэгтэй. Сургалт нь тухайн нисгэгчийн аюулгүй байдлыг хангаж заавар гаргаж байгаа шүү дээ. Манай төрөлд шүхрийн эвхэх бол харьцангуй гайгүй байдаг.

-Нисгэгчээс шаарддаг зүйл нь юу юу байдаг вэ. Шүхрээр тодорхой өндөр дээрээс нисэж байгаа учраас биеийн жингээ барих шаардлага байдаг уу?

                -Эрүүл мэндийн байдал хамгийн чухал. Мөн 14-өөс дээш насныхан нисэх заалттай байгаа. Жин их байх нь таатай зүйл биш хэдий ч нисгэгч өөрийн биеийн жинд тохирсон шүхрийг сонгох боломжтой.

-Шүхэртэй нисэхэд тохиромжтой улирал цаг агаарын байдал нь хэзээ вэ. Монгол Улсад энэ төрлийн спортын хөгжил хэр байгаа вэ. Цаашид хөгжих боломж байдаг уу?

                -Мэргэжлийн нисгэгчийн зүгээс манай улсын хувьд өвлийн улирал нислэг хийхэд хамгийн тохиромжтой байдаг. 2023 он уулын шүхрийн нислэгийн хувьд хөгжлийн шинэ түвшинд хүрэх жил  болж байна. Энэ жил хөдөлгүүртэй нислэг, татлагатай нислэг гэх мэт шинэ нислэгийн төрлүүдийн нэвтрүүлэн ажиллаж байна.

-Уулын шүхрийн нислэгээр хүнтэй хамт нисэх үйлчилгээ байдаг юм билээ. Тогтвортой үйл ажиллагаа явуулж байгаа юу?

                -Хүн авч нисэж байгаа учраас тухайн хүнийг анхаарах, аюулгүй байдлыг хангах  нь нэн тэргүүний ажил. Үйл ажиллагаа тогтмол явагдаж байгаа. Жирэмсэн болон  тулгуур эрхтний бэртэлтэй бол нислэг хийх хориотой байдаг.

-Уулын шүхрийн спортын клуб байдаг юм билээ. Клуб нь  хэдэн хүнтэй үйл ажиллагаагаа явуулж байгаа вэ. Бүгд сонирхлоороо нэгдсэн хүн байдаг уу?

                -Одоо 80 орчим шавь нар бэлтгэн гаргаж байна. Клубт харьяалагдаж хүмүүс бүгд л нэг хүсэл зорилготой хүмүүс байдаг даа.  Уг спортыг Монголын аялал жуулчлалын нэг бүтээгдэхүүн болгохоор шинэчлэл хийж байгаа.

-Ярилцлага өгсөн танд баярлалаа.

                -Баярлалаа.

 

 


Ч.МӨНГӨНЖИГҮҮР: Шүхэрчин ааваараа бахархаж өссөн болохоор шүхрийн спортод дуртай болсон
АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд ergelt.mn хариуцлага хүлээхгүй.

Нийт сэтгэгдэл: 0
Шинэ мэдээ
Нийтлэлчид
Монгол Улс, Улаанбаатар хот, Сүхбаатар дүүрэг, VIII хороо, "Ардын эрх"-ийн байр, Гуравдугаар давхарт Эргэлт.мн редакц
7509-1188