УДЭТ-ын жүжигчин С.Болд-Эрдэнэд Монгол Улсын Гавьяат жүжигчин цол тэмдэг хүртээхээр болжээ.

Урлагийн гэр бүлээс гаралтай чадварлаг жүжигчин тэрбээр дэлхийн сонгодог бүтээл Уильям Шекспирийн зохиол Гамлет жүжгийн гол дүр болох Гамлетын дүрээрээ олны хүндэтгэл хүлээсэн билээ. Түүнээс гадна дэлхийн болон монголын сонгодог зохиолын гол, туслах дүрүүдэд өөрийн гэсэн өнгө төрхийг харуулж, орчин цагийн драмын урлагт шинэ дүр төрхийг бүтээж буй нэгэн юм. Тэрбээр зөвхөн драмын урлагт төдийгүй дэлгэцийн бүтээлүүдэд тоглож, олны сэтгэлд хоногшсон олон дүрийг бүтээгээд буй. Тухайлбал Орхидос, Хоёр амь,  2000, Ноён солиот, Үл таних эмэгтэй зэрэг дэлгэцийн бүтээлүүүдэд гол болон туслах дүр бүтээсэн.

Түүний аав УГЗ, найруулагч С.Сугар монголын драмын урлагт жинтэй уран бүтээлүүдийг найруулан, драмын урлаг шинэчлэл хийсэн хэмээн үнэлэгддэг билээ. Түүнчлэн С.Болд-Эрдэнийн эгч СТА С.Болормаа нь сайн жүжигчнээс гадна авьяаслаг зохиолч гэдгээ батлан харуулсан. Тодруулбал, С.Болд-Эрдэнэ, С.Болормаа нар Хөлтрөг уран сайхны киног хамтран бүтээсэн.