Монголын үндэсний бөхийн холбооны Цэцдийн зөвлөл өнгөрөгч долоо хоногийн бямба гарагт хуралдаж барилдааны дүрэмд өөрчлөлт тухайд хэд хэдэн санал гаргасан билээ. Тодруулбал, барилдааны дүрмээс “барьц сонгох” заалтыг хасч, камераар шүүх заалт оруулсан. Түүнчлэн барилдааны явцад бөхчүүдээс допингийн шинжилгээ авч, хэрэв допинг илэрсэн тохиолдолд тухайн бөхийн барилдах эрхийг дөрвөн жилээр хасч, 40 сая төгрөгөөр торгохоор барилдааны дүрэмд тусгасан. Тэгвэл уг шийдвэрийг энэ сарын 29-нд болох Их эеийн хурлаар эцэслэх юм байна. Улмаар Үндэсний их баяр наадмын тухай хуульд нэмэлт өөрчлөлт оруулах хуулийн төслийг хууль санаачлагчдад өргөн барих аж.

Их эеийн хуралд улсын заан, гарьд, арслан, аварга цолтон болон МҮБХ-ны тэргүүлэгчдээр ажилласан гишүүд оролцох юм байна. Түүнчлэн аймаг бүрээс харцага, начин, аймгийн цолтон, бөхийн зүтгэлтний төлөөлөл тав, аймгуудын холбооноос хоёр төлөөлөгч оролцох аж.