Монгол Улс “Токио-2020” зуны олимп, Паралимпын наадамд оролцохоор спортын 12 төрөлд 30 эрх аваад байна. Эрх авсан болон Үндэсний шигшээ багийн тамирчдад нэг удаагийн мөнгөн тэтгэлэг олгох, цалинг нь нэмэх асуудлыг Засгийн газрын хуралдаанаар хэлэлцэх болсноо Монгол Улсын Ерөнхий сайд, Олимпын наадамд бэлтгэх үндэсний хорооны дарга Л.Оюун-Эрдэнэ хэллээ. Тухайлбал, эрх авсан тамирчин тус бүрд 10 сая төгрөгийн нэг удаагийн дэмжлэг үзүүлэх, ҮШБ-гийн тамирчдын цалинг 1.5 сая төгрөг болгож нэмэхээр болж буй аж.

 

Засгийн газраас тамирчдын бэлтгэл сургуулилтыг эрүүл ахуй, халдвар хамгааллын дор шинжлэх ухааны үндэслэлтэй, зөв төлөвлөлтөд тулгуурлаж зохион байгуулна. Мөн нийт баг, тамирчдыг PCR шинжилгээ, дархлаажуулалтад  хамруулах, эрхийн оноо цуглуулах болон эрх олгох олон улсын тэмцээнд оролцох багийн бүрэлдэхүүнийг улс хооронд зорчих тусгай үүргийн нислэгийн хуваарьт багтаах зэргийг албаны хүмүүст үүрэг болголоо.