Ховд аймгийн Буянт сумын Өгөөмөр багийн “Хөх булан” гэдэг газарт шинээр баригдаж байсан барилгын багана, таазны хэсэг нурж, таван хүн дарагджээ.

Энэ тухай дуудлага мэдээлэл Онцгой байдлын газарт өчигдөр буюу тавдугаар сарын 3-ний 20:43 цагт ирсэн байна. Дуудлагын дагуу Ховд аймгийн Онцгой байдлын газрын Эрэн хайх, аврах ангийн алба хаагчид тус өдрийн 21:30 цагт очиход 20х30 метрийн хэмжээтэй, цутгалтаа хийж байсан нэг давхар цементийн үйлдвэрийн барилгын тулгуур багана, таазны хэсэг нурж, тухайн барилгад ажиллаж байсан ажилчин 25 настай, эрэгтэй Г, 31 настай, эрэгтэй Б, 25 настай, эрэгтэй Э, 22 настай, эрэгтэй Г, 51 настай, эрэгтэй Т нар барилгын хийцэд дарагдсан байжээ. Бэртсэн дөрвөн хүний биеийн байдал хэвийн, нэг хүний биеийн байдал хүндэвтэр байгаа бөгөөд Баруун бүсийн оношилгоо эмчилгээний төвд эмчлүүлж байна.

Одоогоор тус барилгын үйл ажиллагааг зогсоож, битүүлжилсэн бөгөөд өнөөдөр Ховд аймгаас ажлын хэсэг очиж ажиллах гэнэ.